Церковный календарь
Новости


2019-08-18 / russportal
И. А. Ильинъ. "Наши задачи". Томъ 1-й. Статья 130-я (1956)
2019-08-18 / russportal
И. А. Ильинъ. "Наши задачи". Томъ 1-й. Статья 129-я (1956)
2019-08-18 / russportal
Ген. А. И. Деникинъ. «Очерки Русской Смуты». Томъ 3-й. Глава 8-я (1924)
2019-08-18 / russportal
Ген. А. И. Деникинъ. «Очерки Русской Смуты». Томъ 3-й. Глава 7-я (1924)
2019-08-17 / russportal
Ген. П. Н. Красновъ. "Отъ Двуглаваго Орла..." Томъ IV-й, Ч. 8-я, Гл. 15-я (1922)
2019-08-17 / russportal
Ген. П. Н. Красновъ. "Отъ Двуглаваго Орла..." Томъ IV-й, Ч. 8-я, Гл. 14-я (1922)
2019-08-17 / russportal
Архіеп. Аверкій (Таушевъ). "Слова и рѣчи". Томъ 3-й. Слово 102-е (1975)
2019-08-17 / russportal
Архіеп. Аверкій (Таушевъ). "Слова и рѣчи". Томъ 3-й. Слово 101-е (1975)
2019-08-17 / russportal
Архіеп. Аверкій (Таушевъ). "Слова и рѣчи". Томъ 3-й. Слово 100-е (1975)
2019-08-17 / russportal
Архіеп. Аверкій (Таушевъ). "Слова и рѣчи". Томъ 3-й. Слово 99-е (1975)
2019-08-17 / russportal
Архіеп. Аверкій (Таушевъ). "Слова и рѣчи". Томъ 3-й. Слово 98-е (1975)
2019-08-17 / russportal
Архіеп. Аверкій (Таушевъ). "Слова и рѣчи". Томъ 3-й. Слово 97-е (1975)
2019-08-16 / russportal
Ген. П. Н. Красновъ. "Отъ Двуглаваго Орла..." Томъ IV-й, Ч. 8-я, Гл. 13-я (1922)
2019-08-16 / russportal
Ген. П. Н. Красновъ. "Отъ Двуглаваго Орла..." Томъ IV-й, Ч. 8-я, Гл. 12-я (1922)
2019-08-16 / russportal
Ген. П. Н. Красновъ. "Отъ Двуглаваго Орла..." Томъ IV-й, Ч. 8-я, Гл. 11-я (1922)
2019-08-16 / russportal
Ген. П. Н. Красновъ. "Отъ Двуглаваго Орла..." Томъ IV-й, Ч. 8-я, Гл. 10-я (1922)
Новости въ видѣ
RSS-канала: .
Сегодня - воскресенiе, 18 августа 2019 г. Сейчасъ на порталѣ посѣтителей - 6.
Церковно-учительная литература

КНИГА, ГЛАГОЛЕМАЯ «ЗЛАТОУСТЪ»,
Въ не́йже вся́ко ухищре́ніе Боже́ственнаго Писа́нія, истолко́вано святы́мъ вели́кимъ Іоа́нномъ Златоу́стомъ и про́чими святы́ми отцы́.

СЛОВО 10.
Во вто́рникъ 1-я недѣ́ли поста́, поуче́ніе свята́го Іоа́нна Златоу́стаго «да преста́немъ отъ грѣ́хъ на́шихъ».

Мно́гу печа́ль и́мамъ въ се́рдцѣ свое́мъ ва́съ ра́ди, ча́да моя́, поне́же ви́жу вы́ ника́коже премѣни́вшася отъ дѣ́лъ свои́хъ неподо́бныхъ. Не та́ко бо скорби́тъ ма́ти, ви́дящи ча́да своя́ боля́ща, я́коже а́зъ грѣ́шный оте́цъ ва́шъ, ви́дя ва́съ, /л. 23/ ча́да своя́, боля́ща беззако́нными дѣ́лы. Мно́гажды бо глаго́лахъ ва́мъ, хотя́ отвлещи́ ва́съ отъ злы́хъ обы́чаевъ ва́шихъ, но николи́же ви́жду вы́ премѣ́ньшася. Аще кто́ отъ ва́съ разбо́йникъ, разбо́я не оста́етъ; а́ще кто́ кра́детъ, татьбы́ не оста́етъ; а́ще кто́ не́нависть къ дру́гу и́мать, вражду́я не почива́етъ; а́ще ли кто́ восхища́я и гра́бя, не насы́тится; а́ще ли кто́ рѣ́зы е́млетъ, не преста́етъ; а́ще ли кто́ любы́ дѣ́я, прелюбодѣ́йства не отлуча́ется. То́ ка́ко утѣ́шуся, ви́дя вы́ о́тъ Бога отлу́чьшася и удали́вшася отъ до́брыхъ дѣ́лъ? Ка́ко обра́дуюся, сѣ́явъ до́брое сѣ́мя въ сердца́ ва́ша, Боже́ственнаго Писа́нія словеса́, и николи́же ва́съ ви́жу прозя́бша и плода́ добра́ породи́вша? Но молю́ вы́, бра́тіе и сы́нове, преста́ните отъ уны́нія, и обнови́теся до́брымъ обновле́ніемъ, преста́ните зла́я творя́ще, убо́йтеся Сотво́ршаго вы́, вострепещи́те суда́ стра́шнаго. Къ Кому́ гряде́мъ, и къ Кому́ приближа́емся отходя́ще свѣ́та сего́? Что́ рече́мъ и что́ отвѣща́емъ? Стра́шно бо е́сть, ча́да, впа́сти въ ру́цѣ Бо́га жи́ва! Или́ не ви́димъ, что́ въ се́мъ житіи́ пріи́де на ны́? И еще́ /л. 23 об./ каковы́ о́тъ Бога на себе́ ка́зни не приведо́хомъ? Не плѣне́на ли бы́сть земля́ на́ша, и не взя́ти ли бы́ша гра́ды на́ша? Отцы́ же и бра́тія на́ша, не вско́рѣ ли тру́піемъ на́ землю падо́ша? Жены́ же и ча́да на́ша не веде́ны ли бы́ша въ плѣ́нъ, въ чужíя зе́мли? А оста́вшіяся, не порабоще́ни ли бы́хомъ отъ иноплеме́нникъ? Се́ уже́ ко сту́ лѣ́тъ приближа́емся, томле́нія, и му́ки, и да́ни тя́жки на ны́ не престаю́тъ; гла́ды же и мо́рове не то́кмо на́мъ, но и ското́мъ на́шимъ нахо́дятъ. Въ сла́дость хлѣ́ба своего́ изъя́сти не мо́жемъ, воздыха́ніе на́ше и печа́ль су́шитъ ко́сти на́ша. Кто́ же ны́ до сего́ доведе́? Вѣ́сте и са́ми, что́ на́ше беззако́ніе и грѣси́, на́ше непослуша́ніе и непокоре́ніе. Молю́ вы, бра́тіе, вни́дите въ ра́зумы ва́ша ко́ждо ва́съ, и узри́те серде́чныма очи́ма дѣ́ла ва́ша зла́я, возненави́дите и отве́ржите и́хъ отъ себе́, и къ покая́нію притеци́те. Тогда́ и гнѣ́въ Бо́жій утоли́тся, и ми́лость Госпо́дня изліе́тся на ны́, и казни́ми бу́дутъ томя́щіи на́съ. Мы́ же въ ра́дости здѣ́ поживе́мъ, /л. 24/ и по отше́ствіи сего́ свѣ́та въ весе́ліе пре́йдемъ, а́ки ча́да ко Отцу́ и Бо́гу своему́, и Ца́рствіе небе́сное наслѣ́димъ, его́ же ра́ди о́тъ Бога со́здани бы́хомъ. Вели́ки ны́ сотвори́ Госпо́дь, мы́ же преслуша́ніемъ ма́лы предъ Бо́гомъ сотвори́хомся. Да не погуби́мъ, бра́тіе, да́ннаго на́мъ отъ Бо́га вели́чества ослуша́ніемъ: не послу́шницы бу́демъ то́чію, но и творцы́ зако́ну. Аще ли чи́мъ и попо́лзнемся, но вско́рѣ воспря́немъ, воспомя́немся, и къ покая́нію притеце́мъ, любо́вь къ Бо́гу принесе́мъ и прослези́мся, ми́лостыню по си́лѣ сотвори́мъ, бѣ́днымъ, ели́ко мо́жемъ, по́мощь сотвори́мъ и отъ бѣ́дъ изба́вимъ, и всегда́ въ любви́ Бо́жіи пребу́демъ, и ми́рно поживе́мъ. Аще та́цы пребу́демъ, гнѣ́въ Бо́жій на милосе́рдіе преложи́мъ. Слы́шимъ, бра́тіе, бы́вшій вели́кій гра́дъ Ниневíю, по́лнъ мно́жества люде́й, и́же напо́лнишася беззако́нія, и поги́бли бы́ша. Бо́гу же не хотя́щу до конца́ погуби́ти и́хъ, посла́ къ ни́мъ проро́ка Іо́ну, да проповѣ́дуетъ и́мъ поги́бель гра́да и́хъ, я́ко Содо́ма и Гомо́ра. Они́ же, слы́шавше про́повѣдь Іо́нину, вско́рѣ премѣни́шася отъ зло́бъ свои́хъ, и потреби́ша беззако́нія своя́ /л. 24 об./ покая́ніемъ, посто́мъ и моли́твами, и пла́чемъ вели́кимъ и слеза́ми, отъ ю́ныхъ до ста́рыхъ, и ссу́щихъ млеко́ младе́нцевъ, и си́мъ на три́ дни́ не да́ша я́сти, и ското́мъ по́стъ сотвори́ша. И тѣ́мъ Бо́га умоли́ша, и я́рость Госпо́дню на милосе́рдіе Бо́жіе премѣни́ша, и поги́бели, и томле́нія отъ Него́ свободи́шася. Бо́гъ бо ви́дѣхъ и́хъ, всѣ́мъ се́рдцемъ, и по́мысломъ, и дѣ́ломъ, обрати́вшихся отъ зло́бъ свои́хъ, посла́ и́мъ ми́лость ми́лостемъ. Мы́ же что́ о си́хъ рече́мъ? Чего́ не ви́дѣхомъ и что́ надъ на́ми не сотвори́ся? И чи́мъ не наказа́ на́съ Госпо́дь Бо́гъ на́шъ, хотя́ на́съ премѣни́ти отъ беззако́ній на́шихъ? И нѣ́сть ни еди́наго лѣ́та, егда́ не казни́ми о́тъ Бога бы́хомъ за своя́ согрѣше́нія. И никогда́же лиши́хомся зла́го на́шего обы́чая, но всегда́ во грѣсѣ́хъ пребыва́емъ, и на покая́ніе ника́коже обраща́емся. Въ се́мъ вѣ́цѣ всегда́ о́тъ Бога казни́ми быва́емъ, а въ бу́дущемъ негаси́мый о́гнь воспріи́мемъ. Тѣ́мъ же молю́ вы, бра́тіе, преста́немъ отсе́лѣ прогнѣ́вающе Бо́га. Аще же мно́зи и пра́ведніи на се́мъ свѣ́тѣ ра́вно /л. 25/ съ согрѣша́ющими ка́зни отъ Бо́га воспріима́ютъ, но свѣтлѣ́йшихъ вѣнце́въ о́тъ Господа спо́добятся; грѣ́шникомъ же на бо́льшее муче́ніе. Се́ же слы́шавше, бра́тіе, убо́йтеся и вострепещи́те, преста́ните отъ зло́бъ ва́шихъ, и сотвори́те до́брая дѣла́. Са́мъ бо Госпо́дь рече́: обрати́теся ко Мнѣ́ и Азъ обращу́ся къ ва́мъ. Ми́лостивъ бо е́сть Госпо́дь Бо́гъ на́шъ, ожида́етъ на́шего къ Себѣ́ обраще́нія, спасти́ и поми́ловати, и отъ бѣ́дъ изба́вити на́съ хотя́. Мы́ же съ Дави́домъ рече́мъ: Го́споди, ви́ждь на́ше смире́ніе, и отпусти́ грѣхи́ на́ша. Обрати́ ны, Бо́же, Спаси́телю на́шъ, да не во́ вѣки прогнѣ́ваешися на ны́ о́тъ рода въ ро́дъ. Ты́ бо еси́ Бо́гъ на́шъ, и вси́ Тя́ прославля́емъ, со безнача́льнымъ Ти́ Отце́мъ, и съ пресвяты́мъ и благи́мъ и животворя́щимъ Ти́ Ду́хомъ, ны́нѣ и при́сно и во́ вѣки вѣко́мъ, ами́нь.

Источникъ: Кни́га, глаго́лемая «Златоу́стъ», въ не́йже вся́ко ухищре́ніе Боже́ственнаго Писа́нія, истолко́вано святы́мъ вели́кимъ Іоа́нномъ Златоу́стомъ и про́чими святы́ми отцы́. — М.: При Свя́то-Тро́ицко-Введе́нской це́ркви, въ тѵпогра́фіи единовѣ́рцевъ, 1910. — Л. 22 об. – 25.

Назадъ / Къ оглавленію / Впередъ


Наверхъ / Къ титульной страницѣ

0



«Слава Россіи»
Малый герб Российской империи
Помощь Порталу
Просимъ Васъ поддержать нашъ Порталъ
© 2004-2019 г.