Церковный календарь
Новости


2019-08-19 / russportal
Ген. П. Н. Красновъ. "Отъ Двуглаваго Орла..." Томъ IV-й, Ч. 8-я, Гл. 23-я (1922)
2019-08-19 / russportal
Ген. П. Н. Красновъ. "Отъ Двуглаваго Орла..." Томъ IV-й, Ч. 8-я, Гл. 22-я (1922)
2019-08-19 / russportal
Ген. А. И. Деникинъ. «Очерки Русской Смуты». Томъ 3-й. Глава 10-я (1924)
2019-08-19 / russportal
Ген. А. И. Деникинъ. «Очерки Русской Смуты». Томъ 3-й. Глава 9-я (1924)
2019-08-18 / russportal
Ген. П. Н. Красновъ. "Отъ Двуглаваго Орла..." Томъ IV-й, Ч. 8-я, Гл. 21-я (1922)
2019-08-18 / russportal
Ген. П. Н. Красновъ. "Отъ Двуглаваго Орла..." Томъ IV-й, Ч. 8-я, Гл. 20-я (1922)
2019-08-18 / russportal
Ген. П. Н. Красновъ. "Отъ Двуглаваго Орла..." Томъ IV-й, Ч. 8-я, Гл. 19-я (1922)
2019-08-18 / russportal
Ген. П. Н. Красновъ. "Отъ Двуглаваго Орла..." Томъ IV-й, Ч. 8-я, Гл. 18-я (1922)
2019-08-18 / russportal
Ген. П. Н. Красновъ. "Отъ Двуглаваго Орла..." Томъ IV-й, Ч. 8-я, Гл. 17-я (1922)
2019-08-18 / russportal
Ген. П. Н. Красновъ. "Отъ Двуглаваго Орла..." Томъ IV-й, Ч. 8-я, Гл. 16-я (1922)
2019-08-18 / russportal
И. А. Ильинъ. "Наши задачи". Томъ 1-й. Статья 130-я (1956)
2019-08-18 / russportal
И. А. Ильинъ. "Наши задачи". Томъ 1-й. Статья 129-я (1956)
2019-08-18 / russportal
Ген. А. И. Деникинъ. «Очерки Русской Смуты». Томъ 3-й. Глава 8-я (1924)
2019-08-18 / russportal
Ген. А. И. Деникинъ. «Очерки Русской Смуты». Томъ 3-й. Глава 7-я (1924)
2019-08-17 / russportal
Ген. П. Н. Красновъ. "Отъ Двуглаваго Орла..." Томъ IV-й, Ч. 8-я, Гл. 15-я (1922)
2019-08-17 / russportal
Ген. П. Н. Красновъ. "Отъ Двуглаваго Орла..." Томъ IV-й, Ч. 8-я, Гл. 14-я (1922)
Новости въ видѣ
RSS-канала: .
Сегодня - вторникъ, 20 августа 2019 г. Сейчасъ на порталѣ посѣтителей - 5.
Церковно-богослужебныя книги

ОКТОИХЪ, СИРѢЧЬ ОСМОГЛАСНИКЪ.
Кни́га моле́бна, cодержа́щая въ себѣ́ подоба́ющее возслѣ́дованіе Воскре́сныя слу́жбы осми́ гласо́въ съ шестію́ дне́й.
Ча́сть 1-я: съ 1-го гла́са по 4-й. (Тисне́ніе 4-е. М.: Сѵнода́льная Тѵпогра́фія, 1898.)

ГЛАСЪ 4-Й.
СЛУЖБА ВЪ СУББОТУ, ВСѢМЪ СВЯТЫМЪ И УСОПШИМЪ.

ВЪ ПЯТОКЪ ВЕЧЕРА,
Нача́ло суббо́тныя слу́жбы и все́ послѣ́дованіе Вече́рни и Утрени, и о се́мъ пи́санъ ука́зъ въ 1-мъ гла́сѣ.

На Го́споди воззва́хъ... стихи́ры святы́мъ му́ченикомъ и преподо́бнымъ, гла́съ 4. Подо́бенъ: Да́лъ еси́ зна́меніе.

Сти́хъ: Аще беззако́нія на́зриши, Го́споди, Го́споди, кто́ постои́тъ? Яко у Тебе́ очище́ніе е́сть.

Христа́ Человѣколю́бца Страсте́мъ* поревнова́вше, страстоте́рпцы,* тѣлеса́ у́бо на ра́ны преда́сте,* и го́рькимъ му́камъ,* тма́мъ же болѣ́знемъ,* я́ко предзря́ще при́сно рая́ Боже́ственное наслажде́ніе,* пи́щу же неиждива́емую* и вѣ́чнующее благосла́віе,* е́же получи́вше,* моли́теся о воспѣва́ющихъ ва́съ.

Сти́хъ: Имене ра́ди Твоего́ потерпѣ́хъ Тя́, Го́споди, потерпѣ́ душа́ моя́ въ сло́во Твое́, упова́ душа́ моя́ на Го́спода.

И па́ки глаго́ли ту́южде стихи́ру: [Христа́ Человѣколю́бца...]

Сти́хъ: Отъ стра́жи у́треннія до но́щи, отъ стра́жи у́треннія, да упова́етъ Изра́иль на Го́спода.

Па́стыріе всесвяще́нніи,* нача́льнаго Па́стыря сла́вніи* подо́бницы бы́вше Христа́, всѣ́хъ Царя́,* ду́ши усе́рдно о овца́хъ положи́сте.* Бѣды́ лю́тыя претерпѣ́сте,* я́ко бори́ми отъ волко́въ тя́жкихъ,* достоблаже́нніи,* спаса́ете невре́дно богоизбра́нное ста́до.

Ины стихи́ры, му́ченичны. Гла́съ и подо́бенъ то́йже.

Сти́хъ: Яко у Го́спода ми́лость и мно́гое у Него́ избавле́ніе, и То́й изба́витъ Изра́иля отъ всѣ́хъ беззако́ній его́.

Же́ртвы одушевле́нныя,* всесожже́нія слове́сная,* му́ченицы Госпо́дни,* заколе́нія соверше́нная Бо́гу,* Бо́га зна́юща* и Бо́гомъ зна́ема овча́та,* и́хже огра́да волко́мъ невходи́ма,* моли́теся и о на́съ,* упасе́ннымъ бы́ти съ ва́ми* на водѣ́ упокое́нія.

Сти́хъ: Хвали́те Го́спода, вси́ язы́цы, похвали́те Его́, вси́ лю́діе.

Честна́ сме́рть святы́хъ Твои́хъ, Го́споди,* мече́мъ бо, и огне́мъ,* и душе́ю сокруше́нною* пролія́ша кро́ви своя́,* упова́ніе иму́ще на Тя́* воспрія́ти трудо́въ мзду́* и, претерпѣ́вше, прія́ша* отъ Тебе́, Спа́се,* ве́лію ми́лость.

Сти́хъ: Яко утверди́ся ми́лость Его́ на на́съ и и́стина Госпо́дня пребыва́етъ во вѣ́къ.

Иму́ще дерзнове́ніе* ко Спа́су, святíи,* моли́те непреста́нно* за ны́ грѣ́шныя,* оставле́нія прегрѣше́ній прося́ще* и душа́мъ на́шимъ ве́лія ми́лости.

Сла́ва, и ны́нѣ, богоро́диченъ:

Иже Тебе́ ра́ди богооте́цъ проро́къ Дави́дъ пѣ́сненно о Тебѣ́ провозгласи́, вели́чія тебѣ́ Сотво́ршему: предста́ Цари́ца одесну́ю Тебе́. Тя́ бо Ма́терь, Хода́таицу живота́ показа́, безъ отца́ изъ Тебе́ вочеловѣ́читися благоволи́вый Бо́гъ, да Сво́й па́ки обнови́тъ о́бразъ, истлѣ́вшій страстьми́, и заблу́ждшее горохи́щное обрѣ́тъ овча́, на ра́мо воспріи́мъ, къ Отцу́ принесе́тъ, и Своему́ хотѣ́нію, съ небе́сными соедини́тъ си́лами, и спасе́тъ, Богоро́дице, мíръ, Христо́съ имѣ́яй ве́лію и бога́тую ми́лость.

Та́же: Свѣ́те Ти́хій... Проки́менъ дне́.

На стихо́внѣ стихи́ры му́ченичны, гла́съ 4:

Прославля́яйся въ па́мятехъ святы́хъ Твои́хъ, Христе́ Бо́же, и отъ ни́хъ умоле́нъ быва́я, низпосли́ на́мъ ве́лію ми́лость.

[Сти́хъ: Ди́венъ Бо́гъ во святы́хъ Свои́хъ, Бо́гъ Изра́илевъ].

Иже святы́хъ му́ченикъ пріе́мый терпѣ́ніе и отъ на́съ пріими́ пѣ́ніе, Человѣколю́бче, да́руй на́мъ тѣ́хъ моли́твами ве́лію ми́лость.

[Сти́хъ: Ду́ши и́хъ во благи́хъ водворя́тся].

Ме́ртвенъ: Со ду́хи пра́ведныхъ сконча́вшихся ду́ши ра́бъ Твои́хъ, Спа́се, упоко́й, сохраня́я и́хъ во блаже́ннѣй жи́зни, я́же у Тебе́, Человѣколю́бче.

Сла́ва, и ны́нѣ, богоро́диченъ:

Свѣще́ неугаси́мая, престо́ле пра́ведный, Пречи́стая Влады́чице, моли́ спасти́ся душа́мъ на́шимъ.

Та́же: Ны́нѣ отпуща́еши... Трисвято́е, по Отче на́шъ... Тропа́рь и отпу́стъ.


ВЪ ПЯТОКЪ НА ПОВЕЧЕРІИ,
Кано́нъ Пресвятѣ́й Богоро́дицѣ, гла́съ 4.

Пѣ́снь 1.

Ирмо́съ: Триста́ты крѣ́пкія, Рожде́йся отъ Дѣ́вы, безстра́стія во глубинѣ́, души́ трича́стное потопи́, молю́ся, да Тебѣ́, я́ко въ тимпа́нѣ, во умерщвле́ніи тѣлесе́ побѣ́дное воспою́ пѣ́ніе.

[Припѣ́въ: Пресвята́я Богоро́дице, спаси́ на́съ.]

Отъ ка́ла страсте́й, отъ помышле́ній треволне́нія, и отъ стрѣ́лъ лука́ваго, и отъ вся́каго прило́га сопроти́внаго спаси́ ду́шу мою́ окая́нную, Пречи́стая Богороди́тельнице, и огня́ вѣ́чнаго исхити́ мя́.

Возведи́ мя́, Чи́стая, изъ глубины́ прегрѣше́ній и наста́ви къ свѣ́ту Боже́ственныхъ за́повѣдей Спа́са Христа́ и Бо́га, возсія́й ми́ покая́нія спаси́тельную зарю́ и пода́ждь жи́знь вѣ́чную.

Сла́ва: Въ ти́ну лука́вую впа́дся зо́лъ мои́хъ, удавля́юся вельми́ дѣлесы́ лука́выми и нѣ́сть постоя́нія. Влады́чице Дѣ́во Ма́ти, Твое́ю си́лою возведи́ мя, и огня́, и му́ки изба́ви мя́.

И ны́нѣ: Сме́рть и тлю́ потреби́ла еси́, Богоро́дице Всепѣ́тая, нетлѣ́нія Исто́чникъ ро́ждши Христа́, безсме́ртіемъ украси́вша и благода́тію человѣ́ческое естество́, Пренепоро́чная.

Пѣ́снь 3.

Ирмо́съ: Не му́дростію, и си́лою, и бога́тствомъ хва́лимся, но Тобо́ю, Отчею ѵпоста́сною Му́дростію, Христе́: нѣ́сть бо свя́тъ, па́че Тебе́, Человѣколю́бче.

Явльшися, Чи́стая Дѣ́во, души́ моея́ тму́ отыми́, и грѣхо́вныя плени́цы расто́ргни, и спаси́ мя, молю́ся, заступле́ніемъ Твои́мъ.

Коле́блющееся прило́ги стра́стными се́рдце мое́ въ стра́хъ Бо́жій чистѣ́йшій утверди́, Дѣ́во Пренепоро́чная, благоутро́біемъ Твои́мъ.

Сла́ва: Отча́явся по́мощи вся́кія, къ Тебѣ́, Пренепоро́чная, держа́внѣй Храни́тельницѣ и Покро́ву притеко́хъ, не отри́ни у́бо мене́ отъ боже́ственнаго покро́ва Твоего́.

И ны́нѣ: Испещре́на ря́снами златы́ми я́ко Цари́ца, Царя́ и Бо́га одесну́ю ны́нѣ предстои́ши, Влады́чице, моля́щи о рабѣ́хъ Твои́хъ.

Пѣ́снь 4.

Ирмо́съ: Сѣдя́й въ сла́вѣ на Престо́лѣ Божества́ во о́блацѣ ле́гцѣ, прíиде Іису́съ Пребоже́ственный, Нетлѣ́нною Дла́нію и спасе́ зову́щія: сла́ва, Христе́, си́лѣ Твое́й.

Уны́ніемъ одержи́ма мя́, и страсте́й омраче́ніемъ всего́ потемне́на, и грѣхо́мъ порабоще́на, Богоблаже́нная Отрокови́це, свободи́ и присво́й Твоему́ Сы́ну и Бо́гу на́шему.

Умерщвле́на мя́ зло́бою льсти́ваго, Пренепоро́чная, я́ко Жи́знь ро́ждшая оживи́, къ Тебѣ́ бо прибѣго́хъ, и погруже́нна во глубинѣ́ паде́жей возведи́, я́ко ми́лостива, Всенепоро́чная.

Сла́ва: Во гро́бѣ безмѣ́рныхъ сласте́й мои́хъ низлежу́, уны́ніемъ и лѣ́ностію одержи́мь е́смь, но ро́ждшая всѣ́хъ Возставле́ніе, оживи́ мя, Блага́я, и спаси́.

И ны́нѣ: Свяще́нную Тя́ дре́вле проро́къ го́ру Боже́ственную нарече́, Дѣ́во Чи́стая, добродѣ́тельми всю́ осѣне́ну, изъ Нея́же спаси́тельное Сло́во яви́ся въ созда́ніе и просвѣще́ніе ду́шъ на́шихъ.

Пѣ́снь 5.

Ирмо́съ: Нечести́віи не у́зрятъ сла́вы Твоея́, Христе́, но мы́ Тя́, Единоро́дне, Оте́ческія сла́вы Сія́ніе Божества́, отъ но́щи у́тренююще, воспѣва́емъ Тя́, Человѣколю́бче.

Да возвесели́тся, Влады́чице, душа́ моя́ смире́нная боя́тися Твоего́ Сы́на и твори́ти повелѣ́нія Его́ отъ се́рдца, Всенепоро́чная Пречи́стая, моли́твами Твои́ми наста́ви.

Всѣ́мъ се́рдцемъ мои́мъ, Влады́чице Блага́я, исповѣ́датися Изба́вителю сподо́би ду́шу мою́ стра́стную, отгоня́щи невѣ́дѣніе се́рдца моего́, Всенепоро́чная.

Сла́ва: Ду́шу мою́ сохрани́ я́ко зѣ́ницу о́ка подъ кро́вомъ крилу́ Твое́ю, Блага́я Пречи́стая, и духо́въ отъ лука́выхъ томле́нія и муче́нія изба́ви.

И ны́нѣ: Избавля́ющи яви́ся, Пречи́стая, отъ страсте́й наведе́нія и бѣсо́въ лука́выхъ Твоего́ раба́, стяжа́вшаго Тя́ держа́вное Заступле́ніе и Предста́тельницу непосты́дную.

Пѣ́снь 6.

Ирмо́съ: Возопи́, прообразу́я погребе́ніе тридне́вное, проро́къ Іо́на, въ ки́тѣ моля́ся: отъ тли́ изба́ви мя́, Іису́се, Царю́ си́лъ.

Низложи́ и́же при́сно борю́щія мя́, Влады́чице, и о́блакъ лука́выхъ помышле́ній разори́, Со́лнца Пра́веднаго су́щи две́рь, Богома́ти.

Возсія́й ми́ покая́нія зарю́, Влады́чице, и о́блаки злы́хъ помышле́ній мои́хъ разруши́, лю́тыми прельще́ніи привлеко́ма же и растлѣва́ема.

Сла́ва: Утоли́ страсте́й мои́хъ свирѣ́пую во́лну и бу́рю злы́хъ помышле́ній потреби́, тве́рдая всѣ́хъ Предста́тельнице и Покро́ве, Пренепоро́чная.

И ны́нѣ: Умно́жишася па́че песка́ морска́го прегрѣше́нія души́ моея́ и я́ко бре́мя тя́жкое низлага́етъ мя́, но Ты́, Дѣ́во, пре́жде конца́ уще́дривши, спаси́ мя́.

Та́же: Го́споди, поми́луй, три́жды. Сла́ва, и ны́нѣ.

Сѣда́ленъ, гла́съ 4:

Те́плое заступле́ніе, е́же въ бѣда́хъ, и помо́щницу на́шу, и къ Бо́гу премѣне́ніе, Еюже тли́ изба́вихомся, Богоро́дицу, вѣ́рніи, ублажа́емъ.

Пѣ́снь 7.

Ирмо́съ: Авраа́мстіи иногда́ въ Вавило́нѣ о́троцы пе́щный пла́мень попра́ша, пѣ́сньми взыва́юще: оте́цъ на́шихъ Бо́же, благослове́нъ еси́.

Тя́, Богоро́дице Чи́стая, призыва́ю вѣ́рно: смире́нное мое́ соблюди́ се́рдце и изба́ви мя́ пла́мене муче́нія и тмы́ вѣ́чныя.

Раздери́, Дѣ́во Чи́стая, Сы́на Твоего́ копіе́мъ мои́хъ прегрѣше́ній рукописа́ніе и изба́ви мя́, молю́ся, одержа́нія вся́каго въ ча́съ кончи́ны моея́.

Сла́ва: Угаси́, Дѣ́во Чи́стая, мои́хъ сле́зъ струя́ми и Твои́хъ щедро́тъ одожде́ніемъ пе́щь, ю́же ми́ исхода́таи зо́лъ мои́хъ мно́жество бѣсо́вскимъ дѣ́йствомъ.

И ны́нѣ: Изба́ви на́съ искуше́ній находя́щихъ, еди́на Сло́ва Ма́ти Приснодѣ́во, и вся́каго муче́нія, вои́стинну Тя́ разу́мно пою́щихъ во вся́ вѣ́ки.

Пѣ́снь 8.

Ирмо́съ: Изба́вителю всѣ́хъ Всеси́льне, посредѣ́ пла́мене благоче́ствовавшія, снизше́дъ, ороси́лъ еси́ и научи́лъ еси́ пѣ́ти: вся́ дѣла́, благослови́те, по́йте Го́спода.

Ду́шу мою́ боля́щую исцѣли́, и у́мъ омраче́нный просвѣти́, и огня́ исхити́ и вѣ́чныхъ неизглаго́ланныхъ му́къ, Богоро́дице Дѣ́во Богоневѣ́сто.

Прекло́нься безслове́сными страстьми́, во глубину́ поги́бели снидо́хъ и пла́меню сожже́ніе са́мъ ся́ содѣ́лахъ, отъ ни́хже мя́ изба́ви, Богоро́дице Дѣ́во, раба́ Твоего́.

Сла́ва: Зо́лъ мои́хъ пучи́ну изсуши́, милосе́рдія ро́ждши Пучи́ну, Изба́вителя и Го́спода, и плени́цы зо́лъ мои́хъ разрѣши́ пре́жде кончи́ны, Яже Спа́са всѣ́хъ ро́ждшая.

И ны́нѣ: Вопло́щься отъ утро́бы Твоея́ Госпо́дь, госпо́дствуяй тва́рію, и Тебе́, Дѣ́во, Госпожу́ показа́, ви́димымъ же всѣ́мъ и неви́димымъ, я́ко Ма́терь прославля́я Непоро́чную.

Пѣ́снь 9.

Ирмо́съ: Ева у́бо неду́гомъ преслуша́нія кля́тву всели́ла е́сть, Ты́ же, Дѣ́во Богоро́дице, прозябе́ніемъ чревоноше́нія мíрови благослове́ніе процвѣла́ еси́. Тѣ́мъ Тя́ вси́ велича́емъ.

Непло́дное бы́вшее Боже́ственныхъ добродѣ́телей се́рдце мое́, Пречи́стая Богоро́дице Дѣ́во, покажи́ плодоно́сно, Яже отъ непло́дныя ро́ждшаяся, хотѣ́ніемъ вся́ Претворя́ющаго ма́ніемъ, да пою́ Тя, Всепѣ́тую.

Свѣ́томъ Твои́мъ озари́ мя, Пренепоро́чная, ро́ждшая Свѣ́тъ непристу́пный, разжени́ о́блаки страсте́й мои́хъ, и отъ тмы́ несвѣ́тлыя исхити́ мя́, и Боже́ственнаго Свѣ́та сподо́би, я́ко да пою́ Тя́, Ма́ти Дѣ́во.

Сла́ва: Кропле́ніемъ, Чи́стая, Твои́хъ щедро́тъ омы́й гное́нія се́рдца моего́, источа́ти ми́ при́сно сподо́би струи́ сле́зъ мои́хъ, пото́ки страсте́й укроча́ющи и му́ки избавля́ющи.

И ны́нѣ: Благолюби́ваго Бо́га ро́ждши, благолюби́вая Богоро́дице, любве́ мя́ плотскíя лука́выя ны́нѣ вско́рѣ свободи́, Влады́чице, и порабо́ти Боже́ственнѣй во́ли лѣ́ностію погиба́ющаго.

Та́же: Досто́йно е́сть.., и покло́нъ до земли́. Трисвято́е, по Отче на́шъ... Тропа́рь, и про́чее обы́чно, и отпу́стъ.


ВЪ СУББОТУ УТРА,
По 1-мъ стихосло́віи сѣда́льны му́ченичны, гла́съ 4:

Дне́сь а́нгельская во́инства въ па́мять страстоте́рпецъ пріидо́ша вѣ́рныхъ мы́сли просвѣти́ти и вселе́нную благода́тію уясни́ти, отъ ни́хже, Бо́же, умоле́нъ быва́я, да́руй на́мъ ве́лію ми́лость.

Сти́хъ: Ди́венъ Бо́гъ во святы́хъ Свои́хъ, Бо́гъ Изра́илевъ.

Кресто́мъ вооружи́вшеся, страстоте́рпцы Твои́, Христе́ Бо́же на́шъ, побѣди́ша ко́зни началозло́бнаго врага́, возсія́ша я́ко свѣти́ла, человѣ́ки наставля́юще, даю́тъ исцѣле́нія вѣ́рою прося́щимъ. Тѣ́хъ мольба́ми спаси́ ду́ши на́ша.

Сла́ва, и ны́нѣ, богоро́диченъ:

Еже отъ вѣ́ка утае́ное, и а́нгеломъ несвѣ́домое та́инство, Тобо́ю, Богоро́дице, су́щимъ на земли́ яви́ся Бо́гъ, въ несли́тномъ соедине́ніи воплоща́емь, и Кре́стъ во́лею на́съ ра́ди воспріи́мъ, и́мже воскреси́въ первозда́ннаго, спасе́ отъ сме́рти ду́ши на́ша.

По 2-мъ стихосло́віи сѣда́льны, гла́съ 4:

Му́ченицы Твои́, Го́споди, во страда́ніихъ свои́хъ вѣнцы́ прія́ша нетлѣ́нныя отъ Тебе́, Бо́га на́шего, иму́ще бо крѣ́пость Твою́, мучи́телей низложи́ша, сокруши́ша и де́моновъ немощны́я де́рзости; тѣ́хъ моли́твами спаси́ ду́ши на́ша.

Сти́хъ: Мно́ги ско́рби пра́веднымъ, и отъ всѣ́хъ и́хъ изба́витъ я́ Госпо́дь.

Иже во все́мъ мíрѣ му́ченикъ Твои́хъ, я́ко багряни́цею и ви́ссомъ, кровьми́ Це́рковь Твоя́ украси́вшися, тѣ́ми вопіе́тъ Ти́, Христе́ Бо́же: лю́демъ Твои́мъ щедро́ты Твоя́ низпосли́, ми́ръ жи́тельству Твоему́ да́руй и душа́мъ на́шимъ ве́лію ми́лость.

Сти́хъ: Блаже́ни, я́же избра́лъ и прія́лъ еси́, Го́споди, и па́мять и́хъ въ ро́дъ и ро́дъ.

Ду́ши, я́же преста́вилъ еси́, Спа́се, отъ вре́менныхъ, упоко́й, я́ко Благоутро́бенъ, и Всеси́ленъ, и еди́нъ Человѣколю́бецъ, прости́, я́ко Ще́дръ, содѣ́янная и́ми и поми́луй, Ми́лостиве, дѣла́ ру́къ Твои́хъ, моли́твами Богоро́дицы, еди́не Человѣколю́бче.

Сла́ва, и ны́нѣ, богоро́диченъ:

Чи́стая, Всенепоро́чная и Неискусому́жная, Яже еди́на Безлѣ́тнаго Сы́на и Сло́ва Бо́жія въ лѣ́то ро́ждшая, Сего́ со святы́ми и честны́ми патріа́рхи, и му́ченики, и проро́ки, и преподо́бными моли́ дарова́ти на́мъ очище́ніе и ве́лію ми́лость.

Кано́нъ святы́мъ му́ченикомъ, и святи́телемъ, и проро́комъ, и преподо́бнымъ, его́же краегране́сіе: Свѣ́тло похваля́ю Боже́ственныя Христо́вы дру́ги. Творе́ніе Іо́сифово, гла́съ 4.

Пѣ́снь 1.

Ирмо́съ: Триста́ты крѣ́пкія, Рожде́йся отъ Дѣ́вы, безстра́стія во глубинѣ́, души́ трича́стное потопи́, молю́ся, да Тебѣ́, я́ко въ тимпа́нѣ, во умерщвле́ніи тѣлесе́ побѣ́дное воспою́ пѣ́ніе.

Свѣтлѣ́ется при́сно честна́я Це́рковь по́двиги свѣ́тлыми Госпо́днихъ страда́лецъ, и Христа́, возсія́вшаго Со́лнца отъ Дѣ́вы, и тму́ разгна́вшаго пре́лести, сла́витъ почита́ющи.

Восхва́лимъ вѣ́рно Христо́вы святи́тели, изря́дныя лю́ди упа́сшія до́брѣ; и свѣ́тло да похва́лимъ собо́ръ ве́сь преподо́бно пожи́вшихъ и тѣле́сныя сла́сти умертви́вшихъ ду́хомъ.

Крѣ́пость отъ Бо́га жена́мъ дарова́ся, въ постѣ́ и крѣ́пкомъ страда́ніи врага́ попра́вшимъ благода́тію; тѣ́хъ моли́твами, Го́споди, и проро́къ святы́хъ Твои́хъ, ми́лости Твоя́ всѣ́мъ низпосли́.

Сла́ва: Оправда́й, Христе́, рабы́ Твоя́, я́же пра́веднымъ промышле́ніемъ отъ житія́ тлѣ́ннаго къ нетлѣ́ннѣй жи́зни преве́лъ еси́, со всѣ́ми же Твои́ми пра́ведными ликовствова́ти сподо́би, тѣ́хъ презира́я прегрѣше́нія.

[И ны́нѣ,] богоро́диченъ: Избавля́я на́съ отъ осужде́нія пе́рваго, Сы́нъ Бо́жій благоизво́ли, Чи́стая, и Сы́нъ бы́ти Тво́й. Тѣ́мже и всыни́вшеся Тебе́ ра́ди, Небе́снаго благослови́мъ Отца́, пою́ще Тебе́.

Другíй кано́нъ, усо́пшимъ, [его́же пое́мъ наряду́, идѣ́же нѣ́сть Мине́и], его́же краегране́сіе: Пра́вило четве́ртое, кончи́ну воспомина́я. Гла́съ 4.
Пѣ́снь 1.

Ирмо́съ: Мо́ря чермну́ю пучи́ну невла́жными стопа́ми дре́вній пѣшеше́ствовавъ Изра́иль, крестообра́зными Моисе́овыма рука́ма Амали́кову си́лу въ пусты́ни побѣди́лъ е́сть.

Припѣ́въ: Ди́венъ Бо́гъ во святы́хъ Свои́хъ, Бо́гъ Изра́илевъ.

Держа́й за десну́ю ру́ку ра́бъ Твои́хъ, наста́ви и́хъ на па́жить безсме́ртную, Спа́се, на зрѣ́ніе добро́ты Твоея́, страстоно́сцы му́ченики умоле́нъ быва́я.

Припѣ́въ: Упоко́й, Го́споди, ду́ши усо́пшихъ ра́бъ Твои́хъ.

Неизрече́нную и блаже́нную сла́ву Твою́ преста́вльшіяся вѣ́рою наслѣ́довати сподо́би, Христе́, презира́я прегрѣше́нія и́хъ, и оправда́й благода́тію излія́ніемъ Твоея́ Кро́ве.

Сла́ва: Ме́ртвостію Твое́ю живоно́сною умертви́теля умертви́лъ еси́, Христе́ Бо́же; и́хже прія́тъ и и́мже Твою́ воздая́ жи́знь, Са́мъ ны́нѣ упоко́й вѣ́рныя рабы́ Твоя́.

И ны́нѣ, [богоро́диченъ]: Красе́нъ превысоча́йшими добро́тами, я́ко Бо́жій Сы́нъ, а я́ко изъ Тебе́, Дѣ́во, Воплоти́выйся и на Дре́вѣ пове́шенъ бы́въ, добро́ты не имѣ́яше, сме́рть за всѣ́хъ прія́тъ.

Пѣ́снь 3.

Ирмо́съ: Лу́къ си́льныхъ изнемо́же, и немощству́ющіи препоя́сашася си́лою, сего́ ра́ди утверди́ся въ Го́сподѣ се́рдце мое́.

Якоже а́гнцы, добропобѣ́дніи му́ченицы, заколе́ни бы́вше, Христу́ принесо́шася, закла́вшемуся Агнцу и Сло́ву Бо́жію за всѣ́хъ избавле́ніе.

Уста́ Бо́жія бы́вше, священнотаи́нницы, отъ недосто́йныхъ изведо́ша досто́йныя, уче́ньми свяще́нными просвѣща́юще.

Обрѣ́те преподо́бныхъ сосло́віе воздержа́нія ра́ди пи́щу неиждива́емую, наслади́вшеся зрѣ́ньми и Боже́ственными восхожде́ньми.

Сла́ва: Вся́, Христе́, я́же въ вѣ́рѣ преста́вилъ еси́, мольба́ми всѣ́хъ святы́хъ Твои́хъ упоко́й, презрѣ́въ я́же содѣ́янная въ житіи́ тѣ́хъ прегрѣше́нія.

[И ны́нѣ,] богоро́диченъ: Хвалу́ Бо́гу принесе́мъ, отъ Дѣ́вы ро́ждшемуся пло́тію и же́нъ ли́ки а́нгельскимъ лико́мъ совоку́пльшему.

Инъ.

Ирмо́съ: Не му́дростію, и си́лою, и бога́тствомъ хва́лимся, но Тобо́ю, Отчею ѵпоста́сною Му́дростію, Христе́: нѣ́сть бо свя́тъ, па́че Тебе́, Человѣколю́бче.

Побѣди́вше и́дольскую пре́лесть му́ченицы, Влады́ку и Бо́га ны́нѣ мо́лятъ дарова́ти пре́жде сконча́вшимся Боже́ственный поко́й.

Обраща́ющееся ору́жіе премину́ти благоволи́ и дре́ва живо́тнаго подо́бно прича́стіе улучи́ти, я́же преста́вилъ еси́ рабы́ Твоя́, Влады́ко.

Сла́ва: Въ раи́, Христе́, пи́щи водвори́тися рабо́мъ Твои́мъ сподо́би, идѣ́же гла́съ чи́стъ пра́зднующихъ, согрѣше́ній оставле́ніе тѣ́мъ да́руя.

И ны́нѣ, [богоро́диченъ]: Боже́ственному рождеству́ дѣ́вство сочета́ла еси́, Пречи́стая, Зижди́теля бо вся́ческихъ несказа́нно родила́ еси́, Его́же хотѣ́нію вся́ повину́ются.

Пѣ́снь 4.

Ирмо́съ: Сѣдя́й въ сла́вѣ на Престо́лѣ Божества́ во о́блацѣ ле́гцѣ, прíиде Іису́съ Пребоже́ственный, Нетлѣ́нною Дла́нію и спасе́ зову́щія: сла́ва, Христе́, си́лѣ Твое́й.

Свяще́ннѣйшее просла́вися му́чениковъ сосло́віе, свяще́нно просла́виша у́ды свои́ми Го́спода, отъ всѣ́хъ а́нгелъ сла́вимаго, и мо́лятся изба́витися на́мъ отъ вся́кія ско́рби.

Умъ невеще́ственнаго свѣтозаре́нія сія́ющъ иму́ще, боже́ственніи святи́теліе, но́щь вся́кія пре́лести разруши́сте и неле́стнымъ наставле́ніемъ наста́висте богоизбра́нное ста́до Христо́во къ ра́зуму.

Украси́ся преподо́бныхъ многочи́сленное мно́жество, и возвели́чися боже́ственныхъ же́нъ еди́нственное торжество́, и проро́къ почте́ся собо́ръ святы́й, со а́нгельскими собо́ры соедини́вся, ра́дуяся.

Сла́ва: Ангеломъ согра́ждане бы́вше, святíи му́ченицы, усо́пшимъ всѣ́мъ испроси́те ослабле́ніе, и рая́ Боже́ственнаго вселе́ніе, и прегрѣше́ній коне́чное избавле́ніе.

[И ны́нѣ,] богоро́диченъ: Иже Дѣ́ву Тя́ сохрани́въ по рождествѣ́ нетлѣ́нну, дѣ́вы вся́, Тебе́ обстоя́щія, просла́ви, съ ни́миже непреста́нно моли́ся спасти́ся отъ вся́кія ско́рби и напа́сти душа́мъ на́шимъ.

Инъ.

Ирмо́съ: Вознесе́на Тя́ ви́дѣвши Це́рковь на Крестѣ́, Со́лнце Пра́ведное, ста́ въ чи́нѣ свое́мъ, досто́йно взыва́ющи: сла́ва си́лѣ Твое́й, Го́споди.

Явльшеся му́ченицы я́ко свѣти́льницы, не́бо просвѣща́ютъ церко́вное, и́же и у Спа́са Христа́ про́сятъ дарова́ти усо́пшимъ ослабле́ніе.

Же́злъ си́лы иму́ще Кре́стъ Тво́й, раби́ Твои́ мірско́е мо́ре проидо́ша, и́хже всели́ въ го́ру Твою́, Го́споди, въ не́йже содѣ́лалъ еси́ святы́ню.

Сла́ва: Въ селе́нія вои́стинну возлю́бленная, я́же избра́лъ еси́, Влады́ко, и я́же прія́лъ еси́ рабы́ Твоя́, благоволи́ всели́тися, я́ко Милосе́рдъ, идѣ́же пра́ведныхъ ду́си.

И ны́нѣ, [богоро́диченъ]: Иже ме́ртвыми и живы́ми Облада́яй, вопло́щься я́ко Человѣ́къ изъ Тебе́, Богома́ти, сме́рть претерпѣ́ пло́тію Безсме́ртный, разруши́въ сме́рти си́лу.

Пѣ́снь 5.

Ирмо́съ: Ты́, Го́споди, мо́й Свѣ́тъ, въ мíръ прише́лъ еси́, Свѣ́тъ Святы́й, обраща́яй изъ мра́чна невѣ́дѣнія вѣ́рою воспѣва́ющія Тя́.

Возноси́ми на кре́стъ и колесы́ сокруша́еми, ссѣца́еми же на у́ды, крѣ́пцыи му́ченицы Бо́гу яви́шася не отсѣ́чени.

Спаси́теліе вѣ́рнымъ, святи́теліе, бы́вше, приведо́сте Агнцу и Влады́цѣ, и́хже пасти́ преподо́бнѣ ввѣ́ристеся.

Мяте́жей мірски́хъ отлучи́вшеся, преподо́бніи, умири́сте сердца́ отъ страсте́й и всѣ́хъ Бо́гу сы́нове бы́сте.

Сла́ва: Боже́ственніи проро́цы и же́нъ сосло́віе, Бо́гу угоди́вшіи, пре́жде усо́пшимъ проси́те поко́й.

[И ны́нѣ,] богоро́диченъ: Бо́гъ въ Тя́ всели́вся, Пречи́стая Дѣ́во, содѣ́ла человѣ́ки Своея́ Сла́вы Боже́ственная жили́ща.

Инъ. Ирмо́съ то́йже.

Ты́, Го́споди, Твоего́ влады́чествія просла́вилъ еси́ му́ченики, тѣ́хже ра́ди пре́жде усо́пшія упоко́й, я́ко Благоутро́бенъ.

Нерѣши́мый живо́тъ, кра́сное ра́дованіе и непрестаю́щее весе́ліе пре́жде уме́ршимъ пода́ждь, Многоми́лостиве.

Сла́ва: Еди́не Бла́же и Исто́чниче бла́гости, упоко́й и́же въ вѣ́рѣ и Твое́мъ позна́ніи житіе́ сконча́вшихъ.

И ны́нѣ, [богоро́диченъ]: Пое́мъ Тя́, Богома́ти, Еюже су́щимъ во тмѣ́ возсія́ неизрече́нный и непристу́пный Свѣ́тъ, и любо́вію блажи́мъ.

Пѣ́снь 6.

Ирмо́съ: Пріидо́хъ во глубины́ морскíя, и потопи́ла мя́ е́сть бу́ря мно́гихъ грѣхо́въ, но я́ко Бо́гъ изъ глубины́ возведи́ живо́тъ мо́й, Многоми́лостиве.

Яко прече́стно ка́меніе, му́ченицы, по земли́ прему́дро валя́ющеся, злоче́стія зда́ніе все́ низверго́сте и хра́мы Бо́жія бы́сте.

Отъ руки́ наси́льственныя спаса́ете подру́чники вся́, святи́теліе, пра́ведніи и преподо́бніи, и́же о Христѣ́ ста́до соблюда́юще, сего́ ра́ди ублажа́етеся.

Рече́ніемъ проро́ческимъ послѣ́дующе, же́нъ мно́жество во страда́ніихъ же и въ постѣ́, отъ Жены́ Дѣ́вы Возсія́вшему, Бо́гу Сло́ву угоди́ша.

Сла́ва: Всѣ́мъ Животе́ уме́ршимъ, я́же отъ на́съ въ вѣ́рѣ преше́дшія къ Тебѣ́, Зижди́телю, во свѣ́тѣ со святы́ми Твои́ми, Многоми́лостиве, сподо́би.

[И ны́нѣ,] богоро́диченъ: Усты́, и язы́комъ, и се́рдцемъ исповѣ́даю Тя́, Отрокови́це, Бо́га на́шего Чи́стую Ма́терь, и Твои́мъ хода́тайствомъ изба́ви мя́ вѣ́чнаго осужде́нія.

Инъ.

Ирмо́съ: Пожру́ Ти со гла́сомъ хвале́нія, Го́споди, Це́рковь вопіе́тъ Ти́, отъ бѣсо́вскія кро́ве очи́щшися, ра́ди ми́лости отъ ре́бръ Твои́хъ исте́кшею кро́вію.

Копіе́ Боже́ственная Твоя́ ре́бра пробо́дшее, обраща́ющееся ору́жіе уви́дѣвше, Спа́се, да отсту́питъ отъ ра́бъ Твои́хъ мольба́ми страстоте́рпецъ Твои́хъ.

На Дре́вѣ пове́шенъ бы́въ, Спа́се мо́й, ра́й отве́рзлъ еси́; въ вѣ́рѣ у́бо преста́вленыя въ о́нь всели́, я́ко Ще́дръ, и Твоея́ жи́зни прича́стники покажи́.

Сла́ва: Па́жити живо́тныя сподо́би наслади́тися, и́же къ Тебѣ́, Влады́ко, благоче́стно преходя́щія сме́ртію, и съ пра́ведными, и́же отъ вѣ́ка, сопричти́.

И ны́нѣ, [богоро́диченъ]: Сло́во, я́ко Бо́гъ Сы́й неви́димь, и вопло́щься, ви́димь бы́сть, отъ Дѣ́вы Отрокови́цы Неискусому́жныя, и сме́ртію Свое́ю сме́рть разруши́.

Пѣ́снь 7.

Ирмо́съ: Авраа́мстіи иногда́ въ Вавило́нѣ о́троцы пе́щный пла́мень попра́ша, пѣ́сньми взыва́юще: оте́цъ на́шихъ Бо́же, благослове́нъ еси́.

Влады́ки Христа́ освяще́нныя сосу́ды, Це́ркве забра́ла и столпы́, Госпо́дни му́ченики въ весе́ліи души́ воспои́мъ согла́сно.

Святи́теліе Христо́вы и преподо́бныхъ всѣ́хъ ли́къ боже́ственный ра́дуется съ вы́шними си́лами; тѣ́хъ моли́твами, Христе́, спаса́й пою́щія Тя́.

Терпѣ́ніе благо́е же́нъ преподо́бнѣ и страда́льнѣ просія́вшихъ и вѣ́рою по́стничествовавшихъ, Еву послуша́ніемъ уязви́вшаго низложи́.

Сла́ва: Ты́, Иже а́да Разруши́вый и сме́рть Попра́вый Твое́ю сме́ртію, я́же преста́вилъ еси́ въ вѣ́рѣ упоко́й и рая́ покажи́ жи́тели.

[И ны́нѣ,] богоро́диченъ: Пла́мень, и́же купину́ дре́вле не опаля́ющій, ви́дя законополо́жникъ, науча́шеся о́бразу Рождества́ Твоего́, Богороди́тельнице Дѣ́во, при́сно Благослове́нная.

Инъ.

Ирмо́съ: Въ пещи́ авраа́мстіи о́троцы перси́дстѣй, любо́вію благоче́стія па́че, не́жели пла́менемъ, опаля́еми, взыва́ху: благослове́нъ еси́ въ хра́мѣ сла́вы Твоея́, Го́споди.

Терпѣ́ніе же, и пожда́ніе, и кро́ви всѣ́хъ му́ченикъ избавле́ніе пріе́мъ, благоче́стно усо́пшія у Тебе́ упоко́й, я́ко Ми́лостивъ и Благопремѣни́тель.

Причета́вый къ перворо́днымъ и пра́веднымъ Твои́мъ, Спа́се, ду́ши ра́бъ Твои́хъ, къ Тебѣ́ преста́вленыя, сподо́би непреста́нно Тебе́ наслажда́тися, всѣ́ми Владу́щаго.

Сла́ва: Съ весе́ліемъ, и со дерзнове́ніемъ, и свѣ́тлостію, Сло́ве Бо́жій Изба́вителю, благоволи́, я́ко Бо́гъ, на о́блацѣхъ срѣ́сти Тя́, и́хже Ты́ прія́лъ еси́ ны́нѣ, я́ко Ми́лостивъ.

И ны́нѣ, [богоро́диченъ]: Благослове́нная Богороди́тельнице, Дѣ́во Ма́ти, ра́дуйся, Тебе́ бо ра́ди бы́сть вои́стинну сме́рти потребе́ніе, живо́тъ же неразори́мый уме́ршимъ дарова́ся.

Пѣ́снь 8.

Ирмо́съ: Изба́вителю всѣ́хъ Всеси́льне, посредѣ́ пла́мене благоче́ствовавшія, снизше́дъ, ороси́лъ еси́ и научи́лъ еси́ пѣ́ти: вся́ дѣла́, благослови́те, по́йте Го́спода.

Святи́теліе, проро́цы и му́ченицы, свяще́нный по́двигъ сконча́вшіи, свяще́нное улучи́ша водворе́ніе со а́нгелы, съ ни́миже про́сятъ очище́нія на́мъ всѣ́мъ и ве́лія ми́лости.

Просвѣти́вшеся ду́хомъ преподо́бніи, бѣсо́вскую тму́ погуби́ша, съ ни́миже священному́ченицы и святи́теліе, проро́цы съ пра́ведными Бо́га во хвале́ніи сла́вятъ.

Иже пре́жде безу́міемъ хваля́йся погуби́ти зе́млю и мо́ре, жена́ми всегда́ попира́ется, страда́ніемъ же и посто́мъ послужи́вшими Бо́гу со усе́рдіемъ.

Сла́ва: О всѣ́хъ, Христе́, мо́лимся Ти́, вѣ́рою усо́пшихъ, я́ко Милосе́рдъ, си́хъ къ лико́мъ причти́ спаса́емыхъ, непреста́нно вопію́щихъ: вся́ дѣла́, благослови́те, Госпо́дня, Го́спода.

[И ны́нѣ,] богоро́диченъ: Ми́лости Твоея́ сподо́би мя́, благоми́лостивное Сло́во ро́ждшая, Богороди́тельнице Влады́чице, и вопію́ща мя́ спаси́: вся́ дѣла́, благослови́те, Госпо́дня, Го́спода.

Инъ.

Ирмо́съ: Ру́цѣ распросте́ръ, Даніи́лъ, льво́въ зія́нія въ ро́вѣ затче́; о́гненную же си́лу угаси́ша, добродѣ́телію препоя́савшеся, благоче́стія рачи́тели, о́троцы, взыва́юще: благослови́те, вся́ дѣла́ Госпо́дня, Го́спода.

Му́чениковъ пріе́мля моле́нія и ми́лованіе къ единоплеме́нному, ду́ши упоко́й, Влады́ко, въ вѣ́рѣ Твое́й усо́пшихъ, грѣхи́ презря́ си́хъ, вопію́щихъ Ти́: вся́ дѣла́, благослови́те, Госпо́дня, Го́спода.

Ме́ртвъ, со беззако́нникома вмѣни́вся, ме́ртвымъ источи́лъ еси́ жи́знь безсме́ртную; преста́вленыя у́бо рабы́ Твоя́ о наде́жди воскре́снія, Ца́рствіе Твое́ улучи́ти сподо́би, Спа́се, Тебѣ́ вопію́щихъ: вся́ дѣла́, благослови́те, Госпо́дня, Го́спода.

Сла́ва: Вои́стинну приснотеку́щій Исто́чниче бла́гости, въ небе́сныхъ селе́ніихъ сконча́вшіяся рабы́ Твоя́ и житіе́ тлѣ́нное оста́вльшія, кро́тко, Спа́се, примири́, Тебѣ́ вопію́щія: вся́ дѣла́, благослови́те, Госпо́дня, Го́спода.

И ны́нѣ, [богоро́диченъ]: Еди́на Ты́ яви́лася еси́ на земли́, Дѣ́во пречи́стая и Ма́ти безму́жная, Бо́га бо родила́ еси́, Влады́чице, па́че сло́ва и смы́сла, и вѣ́чную жи́знь ме́ртвымъ источи́ла еси́. Тѣ́мже вси́ Тя́ благослови́мъ, Марíе Богоневѣ́сто.

Пѣ́снь 9.

Ирмо́съ: Ева у́бо неду́гомъ преслуша́нія кля́тву всели́ла е́сть, Ты́ же, Дѣ́во Богоро́дице, прозябе́ніемъ чревоноше́нія мíрови благослове́ніе процвѣла́ еси́. Тѣ́мъ Тя́ вси́ велича́емъ.

Ви́дѣвше Боже́ственныя да́ры му́ченицы и по́чести пріе́млюще вели́кихъ свои́хъ болѣ́зней, ра́дуются, Христа́ велича́юще, си́хъ вои́стинну возвели́чившаго и побѣдоно́сцы показа́вшаго.

Яко святи́тельствующе лю́демъ, поста́влени бы́вше, святи́теліе богопроповѣ́дницы, я́ко просвѣти́вшеся посто́мъ, со́лнца свѣтлѣ́йше, преподо́бніи, просія́сте, вѣ́рныхъ озаря́юще дѣ́лъ вели́кихъ явле́ніемъ.

Со священному́ченики ку́пно и со всѣ́ми проро́ки ублажи́мъ вся́ преподо́бныя, и пра́ведники, и жены́ свѣ́тло угоди́вшія. Тѣ́хъ мольба́ми, Христе́, вопію́ще: изба́ви гее́нны ду́ши на́ша.

Сла́ва: Ея́же сподо́бишася ра́дости святíи, и́же до́брѣ Тебѣ́, Христе́, угоди́вшіи, тоя́ преста́вльшіяся къ Тебѣ́ вѣ́рою сподо́би, тѣ́хъ презира́я согрѣше́нія, Го́споди, еди́не Многоми́лостиве.

[И ны́нѣ,] богоро́диченъ: Явльшися вы́шнихъ херуви́мъ, Всенепоро́чная, превы́шши, я́ко ро́ждши Содержи́теля вся́ческихъ, вы́шши у́мъ мо́й содѣ́лай, на стра́сти плотскíя укрѣпля́ющи мя́, Влады́чняя твори́ти хотѣ́нія.

Инъ. Ирмо́съ то́йже.

Да́лъ еси́ и́стиннымъ страда́льцемъ и му́ченикомъ дерзнове́ніе моли́ти Тя́, Го́споди, да́ждь же вѣ́рою преста́вльшимся Боже́ственное тѣ́хъ ра́ди избавле́ніе, въ мѣ́сто селе́нія свята́го всели́тися да́руя.

Манове́ніемъ вседѣ́тельнымъ, и́же вся́ческая поле́знѣ содѣ́ловая, живы́ми имѣ́я о́бласть и ме́ртвыми госпо́дьствуя, я́ко Всеси́ленъ, учини́, я́же преста́вилъ еси́ рабы́ Твоя́, на вода́хъ поко́йныхъ.

Сла́ва: Иже естество́мъ Сы́й, я́ко Бла́гъ, Иже Бога́тый въ ми́лостехъ и въ бла́гости, изба́ви отъ тмы́ кромѣ́шныя призыва́ющія Твое́ и́мя, вѣ́рою оправда́въ и благода́тію, си́хъ просвѣти́, я́ко Человѣколю́бецъ.

[И ны́нѣ,] богоро́диченъ: Образы, Всенепоро́чная, Твоего́ Рождества́ проро́цы проповѣ́даша, и́нако же друзíи пресла́вно Тебѣ́ нарица́нія слага́юще, Живо́тъ бо во а́дѣ су́щимъ родила́ еси́, держа́ву сме́рти разруша́ющій.

Та́же: Досто́йно е́сть.., и покло́нъ. Ектенія́, и свѣти́ленъ, и псалмы́ обы́чныя.

На хвали́техъ стихи́ры му́ченичны, гла́съ 4:

Кто́ не ужаса́ется зря́, святíи му́ченицы, по́двига до́браго, и́мже подвиза́стеся? Ка́ко во пло́ти су́ще, безпло́тнаго врага́ побѣди́сте, Христа́ исповѣ́дающе и Кресто́мъ вооружи́вшеся? Тѣ́мже досто́йно яви́стеся бѣсо́въ прогони́тели и ва́рваровъ побѣди́тели, непреста́нно моля́щеся спасти́ся душа́мъ на́шимъ.

Ангеломъ соприча́стницы бы́сте, святíи му́ченицы, на суди́щи Христа́ му́жески проповѣ́давше: вся́ бо, я́же въ мíрѣ, оста́висте кра́сная, я́ко не су́ща, вѣ́ру же, я́ко наде́жду, тве́рду удержа́сте. Тѣ́мже и ле́сть отгна́вше, источа́ете вѣ́рнымъ исцѣле́ній дарова́нія, непреста́нно моля́щеся спасти́ся душа́мъ на́шимъ.

Ка́ко ва́шимъ подвиго́мъ не удиви́мся, святíи му́ченицы? Яко тѣ́ломъ умира́ющимъ обложе́ни, безпло́тныя враги́ побѣди́сте, не устраши́ша ва́съ мучи́тельская преще́нія, ни ужаси́ша ва́съ му́къ приложе́нія, вои́стинну досто́йно отъ Христа́ просла́вистеся.

Честна́ сме́рть святы́хъ Твои́хъ, Го́споди, мече́мъ бо, и огне́мъ, и душе́ю сокруше́нною пролія́ша кро́вь свою́, упова́ніе иму́ще на Тя́ воспрія́ти трудо́въ мзду́, претерпѣ́ша бо и прія́ша отъ Тебе́, Спа́се, ве́лію ми́лость.

Ме́ртвенъ: Въ поко́ищи Твое́мъ, Го́споди, идѣ́же вси́ святíи Твои́ почива́ютъ, усо́пшія рабы́ Твоя́ поко́й, я́ко еди́нъ сы́й Человѣколю́бецъ.

Сла́ва:

Гдѣ́ е́сть мíра пристра́стіе? Гдѣ́ е́сть привре́менное мечта́ніе? Гдѣ́ е́сть зла́то и сребро́? Гдѣ́ е́сть рабо́въ мно́жество и молва́? — Вся́ пра́хъ, вся́ пе́пелъ, вся́ сѣ́нь! Но пріиди́те, возопіи́мъ безсме́ртному Царю́: Го́споди, вѣ́чныхъ Твои́хъ бла́гъ сподо́би преста́вльшіяся отъ на́съ и упоко́й ты́я въ нестарѣ́емомъ блаже́нствѣ.

И ны́нѣ, богоро́диченъ:

Еди́на Чи́стая и Пречи́стая Дѣ́во, Яже Бо́га безсѣ́менно ро́ждшая, моли́ спасти́ся душа́мъ на́шимъ.

На стихо́внѣ стихи́ры поко́йны, гла́съ 4. Подо́бенъ: Да́лъ еси́ зна́меніе.

Вои́стинну стра́шно е́сть* та́инство сме́ртное!* Ка́ко душа́ отъ тѣ́ла ну́ждею разлуча́ется,* отъ соста́въ и сочета́нія есте́ственнаго соу́за* Боже́ственнымъ хотѣ́ніемъ раздѣля́ется?* Тѣ́мже Тебѣ́ мо́лимся:* преста́вленыя упоко́й въ кро́вѣ пра́ведныхъ Твои́хъ,* Жизнода́вче Человѣколю́бче.

Сти́хъ: Блаже́ни, я́же избра́лъ и прія́лъ еси́, Го́споди.

Со́нъ явля́ется* вѣ́рующимъ въ Тя́ сме́рть,* Тебѣ́ положе́ну во гро́бѣ,* всѣ́ми Владу́щему,* и сме́ртную держа́ву Разо́ршему,* и Упраздни́вшему ея́ наси́ліе многолѣ́тное.* Тѣ́мже Ти́ мо́лимся:* преста́вленыя учини́ въ ра́дости святы́хъ Твои́хъ* и въ пра́ведныхъ свѣ́тлости.

Сти́хъ: Ду́ши и́хъ во благи́хъ водворя́тся.

Ты́ Пра́вда же и Освяще́ніе на́мъ бы́лъ еси́* и душа́мъ Избавле́ніе,* Отцу́ бо приве́лъ еси́ опра́вданы и изба́влены,* воспріе́мъ на́ше до́лжное запреще́ніе.* И ны́нѣ мо́лимъ Тя́:* преста́вленыя упоко́й* въ ра́дости и свѣ́тлости святы́хъ Твои́хъ,* Благода́телю и Человѣколю́бче.

Сла́ва, и ны́нѣ, богоро́диченъ:

Словесе́мъ послѣ́дующе богоглаго́ливыхъ проро́къ, Богоро́дицу Тя́, Всенепоро́чная, му́дрствуемъ, Бо́га бо родила́ еси́ воплоти́вшагося недомы́сленно, изба́вльшаго на́съ, плѣне́нныхъ согрѣше́ніи. Его́же ны́нѣ моли́, Пречи́стая, преста́вленыя рабы́ Твоя́ Свои́мъ просвѣти́ти озаре́ніемъ.

Та́же: Бла́го е́сть... Трисвято́е, по Отче на́шъ... Тропа́рь, ектенія́ и ча́съ 1-й, псалмы́ обы́чныя, и отпу́стъ.


ВЪ СУББОТУ [НА ЛИТУРГІИ],
Блаже́нны, гла́съ 4:

Дре́вомъ Ада́мъ рая́ бы́сть изселе́нъ, дре́вомъ же Кре́стнымъ разбо́йникъ въ ра́й всели́ся: овъ у́бо вку́шъ, за́повѣдь отве́рже Сотво́ршаго; о́въ же сраспина́емь, Бо́га исповѣ́да тая́щагося, — помяни́ мя́, — вопія́, — во Ца́рствіи Твое́мъ.

Сти́хъ: Блаже́ни изгна́ни пра́вды ра́ди, я́ко тѣ́хъ е́сть Ца́рство небе́сное.

Распала́ющеся Христо́вою любо́вію, святíи му́ченицы, злоче́стія о́гнь ороше́ніемъ по́двигъ угаси́сте и свѣти́льницы многосвѣ́тліи Це́ркве яви́стеся, отгоня́юще бла́гостію тму́ неду́говъ и скорбе́й отъ ду́шъ на́шихъ. Тѣ́мже до́лжно похваля́емъ ва́съ.

Сти́хъ: Блаже́ни есте́, егда́ поно́сятъ ва́мъ, и изжену́тъ, и реку́тъ всякъ зо́лъ глаго́лъ на вы́, лжу́ще Мене́ ра́ди.

Святи́теліе свяще́нніи, и проро́къ боже́ственное сосло́віе, и преподо́бныхъ ли́цы, и же́нъ святы́хъ еди́нственное торжество́, Бо́гу угоди́вше добродѣ́тельными дѣя́ніи и просла́вишася. Тѣ́хъ ублажа́емъ, мольба́ми и́хъ моля́ще получи́ти вѣ́чный живо́тъ и просвѣще́ніе.

Сти́хъ: Ра́дуйтеся и весели́теся, я́ко мзда́ ва́ша мно́га на небесѣ́хъ.

Идѣ́же сія́етъ Тво́й свѣ́тъ и идѣ́же ли́цы святы́хъ ра́дуются, отню́дуже отбѣже́ воздыха́ніе и болѣ́знь, учини́ рабы́ Твоя́, пре́жде сконча́вшіяся и оста́вльшія житіе́ многоболѣ́зненное, пѣ́ти Твою́ неизрече́нную, Христе́, благосты́ню, презрѣ́въ и́хъ прегрѣше́нія, я́же на земли́ содѣ́яша.

Сла́ва, [тро́иченъ]: Неразлу́чная Тро́ице, Яже во Отцѣ́ и Сы́нѣ и Ду́сѣ соединя́ема вся́чески, неслива́ема со́бствы, Еди́нице Тріѵпоста́сная, уме́ршія вѣ́рно у Тебе́ поко́й мольба́ми святы́хъ Твои́хъ му́ченикъ, оте́цъ же и честны́хъ проро́къ, подаю́щи очище́ніе душа́мъ на́шимъ.

И ны́нѣ, [богоро́диченъ]: Его́же роди́ Оте́цъ пре́жде денни́цы, Сло́во зачала́ еси́ и родила́ еси́ пло́тію, бы́вша Человѣ́ка соверше́нна, двѣма́ познава́ема дѣ́йствы, Пречи́стая, и во́лема. Того́ у́бо моли́, я́ко Зижди́теля и Го́спода, уще́дрити на́съ, Тебе́ пою́щихъ, Отрокови́це Богоневѣ́стная.

Коне́цъ четве́ртому гла́су.

Источникъ: Окто́ихъ, си́рѣчь Осмогла́сникъ, съ 1-го гла́са по 4-й. — Тисне́ніе 4-е. — М.: Сѵнода́льная Тѵпогра́фія, 1898. — Л. 317 об. – 327 об.

Служба въ пятокъ 4-го гласа // Къ оглавленію Октоиха // Воскресная служба 5-го гласа


Наверхъ / Къ титульной страницѣ

0



«Слава Россіи»
Малый герб Российской империи
Помощь Порталу
Просимъ Васъ поддержать нашъ Порталъ
© 2004-2019 г.