Церковный календарь
Новости


2019-08-23 / russportal
А. С. Пушкинъ. Исторія села Горюхина (1921)
2019-08-23 / russportal
Ген. П. Н. Красновъ. "Отъ Двуглаваго Орла..." Томъ IV-й, Ч. 8-я, Гл. 36-я (1922)
2019-08-23 / russportal
Ген. П. Н. Красновъ. "Отъ Двуглаваго Орла..." Томъ IV-й, Ч. 8-я, Гл. 35-я (1922)
2019-08-23 / russportal
Ген. П. Н. Красновъ. "Отъ Двуглаваго Орла..." Томъ IV-й, Ч. 8-я, Гл. 34-я (1922)
2019-08-23 / russportal
Ген. П. Н. Красновъ. "Отъ Двуглаваго Орла..." Томъ IV-й, Ч. 8-я, Гл. 33-я (1922)
2019-08-23 / russportal
Ген. П. Н. Красновъ. "Отъ Двуглаваго Орла..." Томъ IV-й, Ч. 8-я, Гл. 32-я (1922)
2019-08-23 / russportal
И. А. Ильинъ. "Наши задачи". Томъ 1-й. Статья 136-я (1956)
2019-08-23 / russportal
И. А. Ильинъ. "Наши задачи". Томъ 1-й. Статья 135-я (1956)
2019-08-23 / russportal
Архіеп. Аверкій (Таушевъ). "Слова и рѣчи". Томъ 4-й. Слово 8-е (1976)
2019-08-23 / russportal
Архіеп. Аверкій (Таушевъ). "Слова и рѣчи". Томъ 4-й. Слово 7-е (1976)
2019-08-22 / russportal
Ген. П. Н. Красновъ. "Отъ Двуглаваго Орла..." Томъ IV-й, Ч. 8-я, Гл. 31-я (1922)
2019-08-22 / russportal
Ген. П. Н. Красновъ. "Отъ Двуглаваго Орла..." Томъ IV-й, Ч. 8-я, Гл. 30-я (1922)
2019-08-22 / russportal
И. А. Ильинъ. "Наши задачи". Томъ 1-й. Статья 134-я (1956)
2019-08-22 / russportal
И. А. Ильинъ. "Наши задачи". Томъ 1-й. Статья 133-я (1956)
2019-08-22 / russportal
Архіеп. Аверкій (Таушевъ). "Слова и рѣчи". Томъ 4-й. Слово 6-е (1976)
2019-08-22 / russportal
Архіеп. Аверкій (Таушевъ). "Слова и рѣчи". Томъ 4-й. Слово 5-е (1976)
Новости въ видѣ
RSS-канала: .
Сегодня - суббота, 24 августа 2019 г. Сейчасъ на порталѣ посѣтителей - 15.
Церковно-богослужебныя книги

ОКТОИХЪ, СИРѢЧЬ ОСМОГЛАСНИКЪ.
Кни́га моле́бна, cодержа́щая въ себѣ́ подоба́ющее возслѣ́дованіе Воскре́сныя слу́жбы осми́ гласо́въ съ шестію́ дне́й.
Ча́сть 1-я: съ 1-го гла́са по 4-й. (Тисне́ніе 4-е. М.: Сѵнода́льная Тѵпогра́фія, 1898.)

ПРИЛОЖЕНІЕ.

НАЧАЛО ВОСКРЕСНЫХЪ ЕКСАПОСТИЛАРІЙ И УТРЕННИХЪ САМОГЛАСНЫХЪ, СИРѢЧЬ ЕВАНГЕЛЬСКИХЪ СТИХИРЪ.
И у́треннія у́бо стихи́ры су́ть творе́ніе Льва́ царя́ Прему́драго; ексапостила́ріи же — сы́на его́, Константи́на царя́.

Ексапостила́рій 1-й:

Со ученики́ взы́демъ на го́ру Галиле́йскую вѣ́рою Христа́ ви́дѣти, глаго́люща вла́сть прія́ти вы́шнихъ и ни́жнихъ; научи́мся, ка́ко учи́тъ креща́ти во и́мя Отца́ и Сы́на и Свята́го Ду́ха язы́ки вся́, и пребыва́ти съ таи́нники, я́коже обѣща́ся, до сконча́нія вѣ́ка.

Богоро́диченъ:

Со ученики́ ра́довалася еси́, Богоро́дице Дѣ́во, я́ко Христа́ ви́дѣла еси́ воскре́сшаго отъ гро́ба тридне́вна, я́коже рече́; и́мже и яви́ся, науча́я и явля́я лу́чшая, и креща́ти во Отцѣ́ и Сы́нѣ и Ду́сѣ повелѣва́я, е́же вѣ́ровати на́мъ Того́ Воста́нію и сла́вити Тя́, Отрокови́це.

Утренняя стихи́ра, гла́съ 1:

На го́ру ученико́мъ иду́щимъ за земно́е [1] вознесе́ніе, предста́ Госпо́дь, и поклони́вшеся Ему́ и да́нныя вла́сти вездѣ́ научи́вшеся, въ поднебе́сную посыла́хуся проповѣ́дати е́же изъ ме́ртвыхъ Воскресе́ніе и е́же на небеса́ Возше́ствіе, и́мже и во вѣ́ки спребыва́ти нело́жный обѣща́ся Христо́съ Бо́гъ и Спа́съ ду́шъ на́шихъ.



Ексапостила́рій 2-й:

Ка́мень узрѣ́вша отвале́нъ, мѵроно́сицы ра́довахуся, ви́дѣша бо ю́ношу сѣдя́ща во гро́бѣ, и то́й тѣ́мъ рече́: се́, Христо́съ Воста́лъ е́сть; рцы́те съ Петро́мъ ученико́мъ: на го́ру приспѣ́йте Галиле́йскую, та́мо ва́мъ яви́тся, я́коже предрече́ друго́мъ.

Богоро́диченъ:

Ангелъ у́бо принесе́ Дѣ́вѣ, — е́же ра́дуйся! — пре́жде Твоего́ зача́тія, Христе́; а́нгелъ же ка́мень отвали́ гро́ба Твоего́. Вмѣ́сто печа́ли о́въ у́бо ра́дости неизрече́нныя зна́менія, о́въ же въ сме́рти мѣ́сто Пода́теля Тя́ жи́зни проповѣ́дуя и велича́я, и глаго́ля Воскресе́ніе жена́мъ и таи́нникомъ.

Утренняя стихи́ра, гла́съ 2:

Съ мѵ́ры прише́дшимъ я́же съ Марíею жена́мъ и недоумѣва́ющимся, ка́ко бу́детъ и́мъ улучи́ти жела́ніе, яви́ся ка́мень взя́тъ и боже́ственный ю́ноша, утоля́я мяте́жъ ду́шъ и́хъ, — Воста́ бо, — глаго́летъ, — Іису́съ Госпо́дь! Тѣ́мже проповѣ́дите проповѣ́дникомъ Его́, ученико́мъ, въ Галиле́ю тещи́ и ви́дѣти Его́ воскре́сша изъ ме́ртвыхъ, я́ко Жизнода́вца и Го́спода.



Ексапостила́рій 3-й:

Яко Христо́съ воскре́се, никто́же да не вѣ́руетъ [2]: яви́ся бо Марíи, пото́мъ же ви́дѣнъ бы́сть на село́ иду́щима; таи́нникомъ же па́ки яви́ся, возлежа́щимъ единона́десятимъ, и́хже креща́ти посла́въ, на небеса́ вознесе́ся, отню́дуже и сни́де, утвержда́я проповѣ́даніе мно́жествы зна́меній.

Богоро́диченъ:

Возсія́вшее Со́лнце, я́ко отъ черто́га жени́хъ, изъ гро́ба дне́сь, и а́дъ плѣни́въ, и сме́рть упраздни́въ, Тебе́ Ро́ждшія моли́твами свѣ́тъ на́мъ низпосли́, — свѣ́тъ, просвѣща́ющь сердца́ и ду́ши; свѣ́тъ, ходи́ти всѣ́хъ наставля́ющь на стези́ повелѣ́ній Твои́хъ и на пу́ть ми́ра.

Утренняя стихи́ра, гла́съ 3:

Магдали́нѣ Марíи, Спа́сово благовѣству́ющей изъ ме́ртвыхъ Воскресе́ніе и явле́ніе, не вѣ́рующе ученицы́, поноси́ми бы́ша о жестосе́рдіи; но зна́меньми воору́жшеся и чудесы́, ко проповѣ́данію посыла́хуся. И Ты́ у́бо, Го́споди, къ Нача́льному Свѣ́ту возне́слся еси́, Отцу́, они́ же проповѣ́даша всю́ду сло́во, чудесы́ увѣря́юще. Тѣ́мже просвѣти́вшеся тѣ́ми, сла́вимъ Твое́ е́же изъ ме́ртвыхъ Воскресе́ніе, Человѣколю́бче Го́споди.



Ексапостила́рій 4-й:

Добродѣ́тельми блиста́вшеся, ви́димъ предстоя́ща въ живоно́снѣмъ гро́бѣ му́жа въ блеща́щихся ри́захъ, мѵроно́сицамъ прекло́ншимъ ли́ца на зе́млю; небесы́ Влады́чествующаго Воскресе́нію да научи́мся, и къ Живота́ гро́бу съ Петро́мъ притеце́мъ и, содѣ́янному уди́вльшеся, пребу́демъ Христа́ ви́дѣти.

Богоро́диченъ:

Ра́доватися вѣща́вый, претвори́лъ еси́ печа́ль прароди́телей, Го́споди, ра́дость внося́ Воста́нія Твоего́ въ мíрѣ. Того́ у́бо, Живода́вче, Ро́ждшею Тя́, свѣ́тъ просвѣща́ющь сердца́, свѣ́тъ щедро́тъ Твои́хъ низпосли́, е́же вопи́ти Тебѣ́: Человѣколю́бче Богочеловѣ́че, сла́ва Твоему́ Воста́нію.

Утренняя стихи́ра, гла́съ 4:

Утро бѣ́ глубоко́, и жены́ пріидо́ша на гро́бъ Тво́й, Христе́, но Тѣ́ло не обрѣ́теся жела́емое и́ми. Тѣ́мже недоумѣва́ющимся, и́же въ ри́захъ блеща́щихся предста́вшіи глаго́лаху: что́ Жива́го съ ме́ртвыми и́щете? воста́, я́коже предрече́, что́ не по́мните глаго́лъ Его́? Имже вѣ́ровавша, ви́дѣнная проповѣ́даху, но мня́хуся лжа́ благовѣ́щенія, — та́ко бы́ша еще́ ко́сни ученицы́. Но Пе́тръ тече́ и, ви́дѣвъ, просла́ви Твоя́ въ себѣ́ чудеса́.



Ексапостила́рій 5-й:

Живо́тъ и Пу́ть, Христо́съ, воста́ изъ ме́ртвыхъ, Клео́пѣ и Луцѣ́ спутеше́ствова, и́маже и позна́ся во Еммау́сѣ, преломля́я хлѣ́бъ. Ею́же ду́ши и сердца́ горя́ща бя́ху, егда́ тѣ́ма глаго́лаше на пути́ и Писа́нія ска́зоваше, я́же претерпѣ́. Съ ни́маже, — воста́, — зове́мъ, — яви́ся же и Петро́ви.

Богоро́диченъ:

Пою́ безчи́сленную Твою́ ми́лость, Тво́рче мо́й, я́ко Себе́ истощи́лъ еси́, понести́ и спасти́ человѣ́ческое естество́ озло́бленное; и Бо́гъ сы́й, изво́лилъ еси́ отъ чи́стыя Богоотрокови́цы по мнѣ́ бы́ти и сни́ти да́же до а́да, хотя́ ми́ спасти́ся, моли́твами Ро́ждшія Тя́, Влады́ко Всеще́дрый.

Утренняя стихи́ра, гла́съ 5:

О, прему́дрыхъ суде́бъ Твои́хъ, Христе́! Ка́ко Петру́ у́бо плащани́цами еди́нѣми да́лъ еси́ разумѣ́ти Твое́ Воскресе́ніе, Луцѣ́ же и Клео́пѣ спутеше́ствуя, бесѣ́довалъ еси́, и бесѣ́дуяй не а́біе Себе́ явля́еши? Тѣ́мже и поноси́мь быва́еши, я́ко еди́нъ прише́льствуяй во Іерусали́мъ и не причаща́яйся въ коне́цъ совѣ́та и́хъ. Но Иже вся́ къ созда́нія по́льзѣ стро́я, и я́же о Тебѣ́ проро́чествія откры́лъ еси́, и внегда́ благослови́ти хлѣ́бъ, позна́лся еси́ и́мъ, и́хже и пре́жде того́ сердца́ къ позна́нію Твоему́ распала́стася. Иже и ученико́мъ со́браннымъ уже́ я́сно проповѣ́даста Твое́ Воскресе́ніе, и́мже поми́луй на́съ.



Ексапостила́рій 6-й:

Показу́я, я́ко человѣ́къ еси́, Спа́се, по существу́, посредѣ́ ста́въ воскре́съ отъ гро́ба, и бра́шна сопричасти́лся еси́, учи́лъ еси́ креще́нію покая́нія. Абіе же къ Небе́сному возне́слся еси́ Отцу́ и ученико́мъ Утѣ́шителя посла́ти обѣща́лъ еси́, Пребоже́ственный Богочеловѣ́че, сла́ва Твоему́ Воста́нію.

Богоро́диченъ:

Творе́цъ созда́нія и Бо́гъ всѣ́хъ пло́ть человѣ́ческую прія́тъ отъ пречи́стыхъ крове́й Твои́хъ, Всесвята́я Дѣ́во, и истлѣ́вшее мое́ все́ естество́ новосодѣ́ла, па́ки, я́коже пре́жде Рождества́ оста́вль по Рождествѣ́. Тѣ́мже Тя́ вѣ́рно вси́ восхваля́емъ, зову́ще: ра́дуйся, Влады́чице мíра.

Утренняя стихи́ра, гла́съ 6:

Истинный ми́ръ Ты́, Христе́, къ человѣ́комъ Бо́жій, ми́ръ Тво́й дая́ по воста́ніи ученико́мъ, пристра́шны показа́лъ еси́ я́, мня́щія ду́хъ ви́дѣти; но ути́шилъ еси́ мяте́жъ души́ и́хъ, показа́вый ру́цѣ и но́зѣ Твои́. Оба́че не вѣ́рующимъ еще́, бра́шенъ причаще́ніемъ и уче́ній воспомина́ніемъ отве́рзлъ еси́ и́хъ у́мъ, е́же разумѣ́ти Писа́нія. Имже и Оте́ческое обѣтова́ніе обѣща́въ и благослови́въ я́, отступи́лъ еси́ на не́бо. Тѣ́мже съ ни́ми покланя́емся Тебѣ́, Го́споди, сла́ва Тебѣ́.



Ексапостила́рій 7-й:

Яко взя́ша Го́спода, Марíи ре́кшей, на гро́бъ теча́ста, Си́монъ Пе́тръ и другíй таи́нникъ Христо́въ, его́же любля́ше; теча́ста же о́ба и обрѣто́ста плащани́цы еди́ны вну́трь лежа́ща, и главны́й же бѣ́ суда́рь кромѣ́ и́хъ. Тѣ́мже па́ки умолча́ста, до́ндеже Христа́ ви́дѣста.

Богоро́диченъ:

Ве́лія и пресла́вная мене́ ра́ди содѣ́ялъ еси́, Христе́ мо́й Многоми́лостиве: отъ Дѣ́вы бо Отрокови́цы роди́лся еси́ несказа́нно, и кре́стъ подъя́лъ еси́, и сме́рть претерпѣ́въ, воскре́слъ еси́ во сла́вѣ и на́ше естество́ отъ сме́рти свободи́лъ еси́. Сла́ва, Христе́, сла́вѣ Твое́й, сла́ва си́лѣ Твое́й.

Утренняя стихи́ра, гла́съ 7:

Се́ тма́ и ра́но, и что́ у гро́ба, Марíе, стои́ши, мно́гую тму́ имѣ́ющи въ ра́зумѣ, въ не́йже, — гдѣ́ положе́нъ бы́сть, — вопроша́еши, — Іису́съ? Но ви́ждь сри́щущася ученики́, ка́ко плащани́цами и сударе́мъ Воскресе́ніе обрѣто́ша и помяну́ша я́же о си́хъ Писа́нія. Съ ни́миже и и́миже и мы́ вѣ́ровавше, воспѣва́емъ Тя́, Жизнода́вца Христа́.



Ексапостила́рій 8-й:

Два́ а́нгела ви́дѣвши вну́трь гро́ба, Марíя удивля́шеся, и Христа́ не зна́ющи, я́ко вертогра́даря вопроша́ше: го́споди, гдѣ́ положи́лъ еси́ Тѣ́ло Іису́са моего́? Зва́ніемъ же Того́ позна́вши бы́ти Самого́ Спа́са, слы́ша: не прикаса́йся Мнѣ́, ко Отцу́ отхожду́, рцы́ бра́тіи Мое́й.

Богоро́диченъ:

Отъ Тро́ицы родила́ еси́, Отрокови́це, Еди́наго неизрече́нно, во двою́ естеству́ су́ща и сугу́ба дѣ́йствомъ и еди́наго ѵпоста́сію. Того́ у́бо моли́ при́сно о и́же вѣ́рою покланя́ющихся, отъ вся́каго навѣ́та вра́жія изба́витися, я́ко вси́ къ Тебѣ́ ны́нѣ прибѣга́емъ, Влады́чице Богоро́дице.

Утренняя стихи́ра, гла́съ 8:

Марíины сле́зы не всу́е пролива́ются те́плѣ, се́ бо сподо́бися и уча́щихъ а́нгеловъ и видѣ́нія Самого́ Іису́са. Но еще́ земна́я му́дрствуетъ, я́ко жена́ немощна́я, тѣ́мже и отсыла́ется не прикаса́тися Христу́, но оба́че проповѣ́дница посыла́ется Твои́мъ ученико́мъ, и́мже благовѣствова́ніе нося́щи, е́же ко Оте́ческому жре́бію восхо́дъ возвѣща́ющи. Съ не́юже сподо́би и на́съ явле́нія Твоего́, Влады́ко Го́споди.



Ексапостила́рій 9-й:

Заключе́ннымъ, Влады́ко, две́ремъ я́ко вше́лъ еси́, апо́столы испо́лнилъ еси́ Ду́ха Пресвята́го, ми́рно ду́нувъ, и́мже вяза́ти же и рѣша́ти грѣхи́ ре́клъ еси́; и по осми́ дне́хъ Твоя́ ре́бра Ѳомѣ́ показа́лъ еси́ и ру́цѣ. Съ ни́мже вопіе́мъ: Госпо́дь и Бо́гъ Ты́ еси́.

Богоро́диченъ:

Твоего́ Сы́на я́ко ви́дѣла еси́ отъ гро́ба воскре́сша тридне́вна, Богоневѣ́стная Пресвята́я Дѣ́во, всю́ ско́рбь отложи́ла еси́, ю́же подъя́ла еси́, я́ко Ма́ти, егда́ узрѣ́ла еси́ Стра́ждуща, и ра́дости испо́лншися, со ученики́ Его́ почита́ющи Того́ пое́ши. Тѣ́мже и́же Богоро́дицу Тя́ ны́нѣ исповѣ́дающихъ спаса́й.

Утренняя стихи́ра, гла́съ 5:

Яко въ послѣ́дняя лѣ́та, су́щу поздѣ отъ суббо́тъ, предста́лъ еси́ друго́мъ, Христе́, и чудесе́мъ чу́до извѣству́еши, заключе́нымъ вхо́домъ две́рнымъ, е́же изъ ме́ртвыхъ Твое́ Воскресе́ніе. Но испо́лнилъ еси́ ра́дости ученики́, и Ду́ха Свята́го препода́лъ еси́ и́мъ, и вла́сть по́далъ еси́ оставле́нія грѣхо́въ и Ѳомы́ не оста́вилъ еси́ въ невѣ́рствія погружа́тися бу́ри. Тѣ́мже пода́ждь и на́мъ ра́зумъ и́стинный и оставле́ніе прегрѣше́ній, Благоутро́бне Го́споди.



Ексапостила́рій 10-й:

Тиверіа́дское мо́ре съ дѣтьми́ Зеведе́евыми, Наѳана́ила съ Петро́мъ же, и со други́ма двѣма́ дре́вле, и Ѳому́ имя́ше на ло́вѣ, и́же Христо́вымъ повелѣ́ніемъ одесну́ю вве́ргше, мно́жество извлеко́ша ры́бъ. Его́же Пе́тръ позна́въ, къ Нему́ бродя́ше, и́мже тре́тіе явле́йся, и хлѣ́бъ показа́ и ры́бу на у́глехъ.

Богоро́диченъ:

Воскре́сшаго Го́спода тридне́вна отъ гро́ба, Дѣ́во, моли́ о воспѣва́ющихъ Тя́ и любо́вію блажа́щихъ; Тебе́ бо и́мамы вси́ прибѣ́жище спаси́тельное и хода́таицу къ Нему́; наслѣ́діе бо Твое́ и раби́ есмы́, Богоро́дице, и къ Твоему́ заступле́нію вси́ взира́емъ.

Утренняя стихи́ра, гла́съ 6:

По е́же во а́дъ соше́ствіи и е́же изъ ме́ртвыхъ Воскресе́ніи, скорбя́ще, я́коже досто́яше, о разлуче́ніи Твое́мъ, Христе́, ученицы́ на дѣ́ланіе обрати́шася; и па́ки — корабли́ и мре́жи, и ло́ва нигдѣ́же. Но Ты́, Спа́се, яви́вся я́ко Влады́ка всѣ́хъ, одесну́ю мре́жи повелѣва́еши воврещи́. И бы́сть сло́во дѣ́ло вско́рѣ, и мно́жество ры́бъ мно́гое, и ве́черя стра́нная гото́ва на земли́, ея́же причасти́вшимся тогда́ Твои́мъ ученико́мъ, и на́съ ны́нѣ мы́сленно сподо́би наслади́тися, Человѣколю́бче Го́споди.



Ексапостила́рій 11-й:

По Боже́ственнѣмъ Воста́ніи три́жды Петра́, — лю́биши ли Мя́? — вопроша́я Госпо́дь, Свои́хъ ове́цъ предлага́етъ пастыренача́льника. Иже ви́дя, его́же любля́ше Іису́съ, во слѣ́дъ гряду́ща, вопроша́ше Влады́ку: се́й же что́? — Аще хощу́, — рече́, — пребыва́ти сему́, до́ндеже и па́ки пріиду́, что́ къ тебѣ́, дру́же Пе́тре?

Богоро́диченъ:

О, стра́шное та́инство! О, пресла́вное чу́до! Сме́ртію сме́рть всеконе́чнѣ погубле́на бы́сть. Кто́ у́бо не воспое́тъ и кто́ не поклони́тся Твоему́ Воскресе́нію, Сло́ве, и чи́сто ро́ждшей Тя́ пло́тію Богоро́дицѣ? Ея́же моли́твами всѣ́хъ гее́нны изба́ви.

Утренняя стихи́ра, гла́съ 8:

Явля́я Себе́ ученико́мъ Твои́мъ, Спа́се, по Воскресе́ніи, Си́мону да́лъ еси́ ове́цъ па́ству, за любве́ воздая́ніе, я́же о па́ствѣ попече́нія ища́. Тѣ́мже и глаго́лалъ еси́: а́ще лю́биши Мя́, Пе́тре, паси́ а́гнцы Моя́, паси́ о́вцы Моя́. Онъ же а́біе показу́я друголю́бное, о друзѣ́мъ ученицѣ́ вопроша́ше. Ихже моли́твами, Христе́, ста́до Твое́ сохраня́й отъ волко́въ гу́бящихъ е́.

Примѣчанія:
[1] Еже отъ земли́.
[2] Не не вѣ́руй.

Источникъ: Окто́ихъ, си́рѣчь Осмогла́сникъ, съ 1-го гла́са по 4-й. — Тисне́ніе 4-е. — М.: Сѵнода́льная Тѵпогра́фія, 1898. — Л. 329 – 332.

Столпи Евангелія // Къ оглавленію Октоиха // Евангелія воскресны на утрени


Наверхъ / Къ титульной страницѣ

0



«Слава Россіи»
Малый герб Российской империи
Помощь Порталу
Просимъ Васъ поддержать нашъ Порталъ
© 2004-2019 г.