Церковный календарь
Новости


2019-07-21 / russportal
Ген. П. Н. Красновъ. "Отъ Двуглаваго Орла..." Томъ III-й, Ч. 6-я, Гл. 30-я (1922)
2019-07-21 / russportal
Ген. П. Н. Красновъ. "Отъ Двуглаваго Орла..." Томъ III-й, Ч. 6-я, Гл. 29-я (1922)
2019-07-21 / russportal
Ген. П. Н. Красновъ. "Отъ Двуглаваго Орла..." Томъ III-й, Ч. 6-я, Гл. 28-я (1922)
2019-07-21 / russportal
Ген. П. Н. Красновъ. "Отъ Двуглаваго Орла..." Томъ III-й, Ч. 6-я, Гл. 27-я (1922)
2019-07-21 / russportal
И. А. Ильинъ. "Наши задачи". Томъ 1-й. Статья 72-я (1956)
2019-07-21 / russportal
И. А. Ильинъ. "Наши задачи". Томъ 1-й. Статья 71-я (1956)
2019-07-21 / russportal
Архіеп. Аверкій (Таушевъ). "Слова и рѣчи". Томъ 3-й. Слово 46-е (1975)
2019-07-21 / russportal
Архіеп. Аверкій (Таушевъ). "Слова и рѣчи". Томъ 3-й. Слово 45-е (1975)
2019-07-21 / russportal
Архіеп. Аверкій (Таушевъ). "Слова и рѣчи". Томъ 3-й. Слово 44-е (1975)
2019-07-21 / russportal
Архіеп. Аверкій (Таушевъ). "Слова и рѣчи". Томъ 3-й. Слово 43-е (1975)
2019-07-21 / russportal
Ген. А. И. Деникинъ. «Очерки Русской Смуты». Томъ 1-й. Глава 30-я (1921)
2019-07-21 / russportal
Ген. А. И. Деникинъ. «Очерки Русской Смуты». Томъ 1-й. Глава 29-я (1921)
2019-07-20 / russportal
Ген. П. Н. Красновъ. "Отъ Двуглаваго Орла..." Томъ III-й, Ч. 6-я, Гл. 26-я (1922)
2019-07-20 / russportal
Ген. П. Н. Красновъ. "Отъ Двуглаваго Орла..." Томъ III-й, Ч. 6-я, Гл. 25-я (1922)
2019-07-20 / russportal
Ген. П. Н. Красновъ. "Отъ Двуглаваго Орла..." Томъ III-й, Ч. 6-я, Гл. 24-я (1922)
2019-07-20 / russportal
Ген. П. Н. Красновъ. "Отъ Двуглаваго Орла..." Томъ III-й, Ч. 6-я, Гл. 23-я (1922)
Новости въ видѣ
RSS-канала: .
Сегодня - понедѣльникъ, 22 iюля 2019 г. Сейчасъ на порталѣ посѣтителей - 7.
Церковно-богослужебныя книги

СЛУЖБЫ ПРЕПОДОБНЫМЪ ОТЦЕМЪ ПЕЧЕРСКИМЪ [МИНІЯ ПЕЧЕРСКАЯ].
(Кíевъ: Тѵпогра́фія Кíево-Пече́рской Ла́вры, 1855).

СЛУЖБА ОБЩА ПРЕПОДОБНОМУ ЕДИНОМУ,
Въ де́нь, въ о́ньже а́ще кто́ хо́щетъ, да пое́тъ.

ВЕЧЕРЪ,
На Го́споди воззва́хъ... стихи́ры, гла́съ 8. Подо́бенъ: Му́ченицы Госпо́дни.

Преподо́бенъ и че́стенъ свѣти́льникъ боже́ственный и свѣтоно́сный подъ спу́домъ жите́йскія толстоты́ никогда́же скрыва́ется, но на версѣ́ полага́етъ его́ высо́кихъ чуде́съ Человѣколю́бецъ. Того́ моли́твами, Христе́, да́руй лю́демъ Твои́мъ ве́лію ми́лость.

На ра́ло возложи́лъ еси́, всече́стне, дѣ́ланіе ру́къ твои́хъ, дѣ́лая всегда́ боже́ственная, и не возврати́лся еси́ зря́ вспя́ть, но бы́лъ еси́ упра́вленъ во Ца́рствіе Христа́, вопло́щшагося Бо́га, во спасе́ніе ду́шъ на́шихъ.

Въ лодіи́ тѣле́снѣй вози́мь, кро́ткими дыха́ніи кро́ткаго ду́ха легко́ преше́лъ еси́ жите́йскую пучи́ну, му́дре, и, на Би́серѣ многоцѣ́ннѣмъ твоя́ имѣ́нія прода́въ и обрѣ́тъ Его́, въ себѣ́ удержа́лъ еси́, блаже́нъ бы́въ Боже́ственными добро́тами Его́.

Сла́ва, и ны́нѣ, богоро́диченъ:

Помышле́нія нечи́ста и устна́ льсти́ва, дѣла́ же моя́ вся́ оскверне́на, и что́ сотворю́? Ка́ко усря́щу Судію́? Влады́чице Дѣ́во, моли́ Сы́на Твоего́, и Зижди́теля, и Го́спода, я́ко да въ покая́ніи пріи́метъ ду́хъ мо́й, я́ко еди́нъ Благоутро́бенъ.

Крестобогоро́диченъ:

Юница нескве́рная Юнца́ ви́дящи на Дре́вѣ, пригвожда́ема во́лею, рыда́ющи жа́лостнѣ, — увы́ Мнѣ́, — вопія́ше, — люби́мѣйшее Ча́до! Что́ Ти́ со́нмъ воздаде́ безблагода́тный евре́йскій, хотя́ Мя обезча́дствовати отъ Тебе́, Вселюбе́зне?

Аще пра́зднуеши съ поліеле́емъ: На Го́споди воззва́хъ... стихи́ры на 6.
Сла́ва, гла́съ 6:

Еже по о́бразу соблю́дъ невреди́мо, у́мъ влады́ку на стра́сти па́губныя по́стнически поста́вивъ, во е́же по подо́бію, я́ко мо́щно, возше́лъ еси́, му́жески бо естество́ пону́дивъ, потща́лся еси́ ху́ждшее покори́ти лу́чшему и пло́ть порабо́тити ду́ху. Тѣ́мже мона́шествующихъ яви́лся еси́ наста́вникъ, жи́тель пусты́нный, благотеку́щихъ обучи́тель, пра́вило добродѣ́тели извѣ́стнѣйшее. И ны́нѣ на небесѣ́хъ, зерца́ломъ разрѣ́шшимся, о́тче на́шъ [и́мярекъ], чи́стѣ зри́ши Святу́ю Тро́ицу, моля́ся несре́дственнѣ о и́же вѣ́рою и любо́вію чту́щихъ тя́.

И ны́нѣ, богоро́диченъ:

Кто́ Тебе́ не ублажи́тъ, Пресвята́я Дѣ́во? [Кто́ ли не воспое́тъ Твоего́ Пречи́стаго Рождества́? Безлѣ́тно бо отъ Отца́ возсія́вый Сы́нъ Единоро́дный, То́йже отъ Тебе́, Чи́стыя, про́йде, неизрече́нно вопло́щся: естество́мъ Бо́гъ Сы́й и естество́мъ бы́въ Человѣ́къ на́съ ра́ди; не во двою́ лицу́ раздѣля́емый, но во двою́ естеству́ несли́тно познава́емый. Того́ моли́, Чи́стая Всеблаже́нная, поми́ловатися душа́мъ на́шимъ].

Вхо́дъ. Проки́менъ дне́. И чте́нія три́. [Зри́ съ нача́ла кни́ги сея́, ли́стъ 1 на оборо́тѣ].

[Прему́дрости Соломо́ни чте́ніе. [Глава́ 3.]

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́ни чте́ніе. [Глава́ 5.]

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

Прему́дрости Соломо́ни чте́ніе. [Глава́ 4.]

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́].

На стихо́внѣ стихи́ры, гла́съ 1. Подо́бенъ: Небе́сныхъ чино́въ.

Наста́, богоно́се, со́лнца свѣтлѣ́йши тво́й пра́здникъ, озаря́етъ приходя́щія къ тебѣ́ вѣ́рою, и безсме́ртіемъ облагоуха́етъ, и душа́мъ источа́етъ исцѣле́нія, [и́мярекъ] преподо́бне, моли́твенниче о душа́хъ на́шихъ.

Сти́хъ: Честна́ предъ Го́сподемъ сме́рть преподо́бныхъ Его́.

Чу́вственныя стра́сти тѣле́сныя побѣди́въ воздержа́нія бразда́ми, чудодѣ́йственниче [и́мярекъ], и ре́вности безпло́тныхъ на земли́ показа́въ, вся́ плотска́я жела́нія ду́ху повину́лъ еси́, тѣ́мъ ны́нѣ въ небе́сныхъ селе́ніихъ водворя́яся, моли́ о душа́хъ на́шихъ.

Сти́хъ: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́.

Блаже́нне [и́мярекъ], основа́ніе положи́въ добродѣ́тели, дре́вняго человѣ́ка совле́клся еси́ съ похотьми́ и во Христа́ обле́клся вои́стинну, тѣ́мъ и обличи́лъ еси́, преподо́бне, мно́гая вра́жія ополче́нія, наста́вникъ мона́ховъ бы́въ. Моли́ спасти́ся душа́мъ на́шимъ.

Сла́ва, гла́съ 8:

Мона́ховъ мно́жества, наста́вника тя́ почита́емъ, о́тче на́шъ [и́мярекъ], твое́ю бо стезе́ю вои́стинну пра́во ходи́ти позна́хомъ. Блаже́нъ еси́, Христу́ рабо́тавъ, и вра́жію обличи́лъ еси́ си́лу, а́нгеловъ собесѣ́дниче, преподо́бныхъ соприча́стниче и пра́ведныхъ, съ ни́миже моли́ся Го́сподеви поми́ловатися душа́мъ на́шимъ.

И ны́нѣ, богоро́диченъ:

Безневѣ́стная Дѣ́во, Яже Бо́га [неизрече́нно заче́нши пло́тію, Ма́ти Бо́га Вы́шняго, Твои́хъ рабо́въ мольбы́ пріими́, Всенепоро́чная, всѣ́мъ подаю́щи очище́ніе прегрѣше́ній; ны́нѣ на́ша моле́нія пріе́млющи, моли́ спасти́ся всѣ́мъ на́мъ].

Аще ли не пра́зднуеши, глаго́ли се́й богоро́диченъ:

Чи́стая Дѣ́во, Сло́ва врата́, Бо́га на́шего Ма́ти, моли́ спасти́ся на́мъ.

Крестобогоро́диченъ:

Не терплю́, Ча́до, ви́дящи Тя́, на Дре́вѣ усну́вша, бо́дрость всѣ́мъ подаю́щаго, я́ко да дре́вле преступле́нія плодо́мъ, сно́мъ поги́бельнымъ усну́вшимъ, Боже́ственную и спаси́тельную бо́дрость пода́си, — Дѣ́ва глаго́лаше, пла́чущи, Юже велича́емъ.

Тропа́рь во Уста́вѣ. Аще ли нѣ́сть Уста́ва, глаго́ли се́й
Тропа́рь, гла́съ 8:

Въ тебѣ́, о́тче, извѣ́стно спасе́ся, е́же по о́бразу, пріи́мь бо кре́стъ, послѣ́довалъ еси́ Христу́, и дѣ́я, учи́лъ еси́ презира́ти у́бо пло́ть, прехо́дитъ бо, прилѣжа́ти же о души́, ве́щи безсме́ртнѣй. Тѣ́мже и со а́нгелы сра́дуется, преподо́бне [и́мярекъ], ду́хъ тво́й.

Сла́ва, и ны́нѣ, богоро́диченъ по гла́су тропаря́:

[Иже на́съ ра́ди рожде́йся отъ Дѣ́вы и распя́тіе претерпѣ́въ, Благíй, испрове́ргій сме́ртію сме́рть и Воскресе́ніе явле́й, я́ко Бо́гъ. Не пре́зри, я́же созда́лъ еси́ руко́ю Твое́ю; яви́ человѣколю́біе Твое́, Ми́лостиве; пріими́ ро́ждшую Тя́ Богоро́дицу моля́щуюся за ны́ и спаси́, Спа́се на́шъ, лю́ди отча́янныя].


НА УТРЕНИ,
На Бо́гъ Госпо́дь... Тропа́рь то́йже, [дважды. Слава, и нынѣ, богородиченъ].

По 1-й каѳи́смѣ сѣда́ленъ, гла́съ 4. Подо́бенъ: Ско́ро предвари́.

Зва́нію Го́спода твоего́ послѣ́довалъ еси́, мíръ отве́ргъ и вся́, я́же въ мíрѣ, кра́сная, всеблаже́нне [и́мярекъ], претерпѣ́лъ еси́ пусты́нное озлобле́ніе усе́рдно, полки́ же отрази́лъ еси́ де́моновъ му́жественнѣ. Тѣ́мже твою́ и па́мять при́сно пѣ́сньми восхваля́емъ вѣ́рно. [Два́жды.]

Сла́ва, и ны́нѣ, богоро́диченъ:

Обнови́ла еси́, Чи́стая, Боже́ственнымъ Рождество́мъ Твои́мъ истлѣ́вшее страстьми́ земноро́дныхъ ме́ртвенное существо́ и воздви́гла еси́ вся́ отъ сме́рти къ жи́зни нетлѣ́нія. Тѣ́мже Тя́ по до́лгу блажи́мъ вси́, Дѣ́во Препросла́вленная, я́коже прорекла́ еси́.

По 2-й каѳи́смѣ сѣда́ленъ, гла́съ 5. Подо́бенъ: Собезнача́льное Сло́во.

По́стника Госпо́дня пѣ́сньми почти́мъ, я́ко умертви́вша вся́ прило́ги страсте́й воздержа́ніемъ и тве́рдымъ терпѣ́ніемъ вои́стинну, и посрами́вша зѣло́ противоборца́ врага́ и всю́ сего́ горды́ню, и ны́нѣ моля́щася Го́сподеви поми́ловатися душа́мъ на́шимъ. [Два́жды.]

Сла́ва, и ны́нѣ, богоро́диченъ:

Ужа́сно чу́до зача́тія и несказа́ненъ о́бразъ Рождества́ въ Тебѣ́ позна́ся, Приснодѣ́во Чи́стая, ужаса́етъ мо́й у́мъ и удивля́етъ помышле́ніе. Сла́ва Твоя́, Богоро́дице, во всѣ́хъ простре́ся, ко спасе́нію ду́шъ на́шихъ.

На поліеле́и припѣ́въ:

Ублажа́емъ тя́, преподо́бне о́тче [и́мярекъ], и чте́мъ святу́ю па́мять твою́, наста́вниче мона́ховъ и собесѣ́дниче а́нгеловъ.

Псало́мъ избра́нный: Терпя́ потерпѣ́хъ Го́спода...

По поліеле́и сѣда́ленъ, гла́съ 1. Подо́бенъ: Гро́бъ Тво́й, Спа́се.

Погре́блъ еси́ страсте́й все́ воста́ніе умерщвле́ніемъ пло́ти, свяще́нный о́тче, жи́знь безконе́чную по сме́рти прія́лъ еси́. Тѣ́мже дне́сь Христо́ва Це́рковь пра́зднуетъ твою́ досточу́дную па́мять, преподо́бныхъ украше́ніе. [Два́жды.]

Сла́ва, и ны́нѣ, богоро́диченъ:

Наста́ви ны́ на пу́ть покая́нія, уклоня́ющіяся при́сно къ злы́мъ безпу́тіемъ и Преблага́го прогнѣ́вающія Го́спода, Неискусобра́чная, Благослове́нная Марíе, прибѣ́жище отча́янныхъ человѣ́ковъ, Бо́жіе обита́лище.

Степе́нна, 1-й антифо́нъ 4-го гла́са. Проки́менъ, [гла́съ 4]: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми? Вся́кое дыха́ніе да хва́литъ Го́спода... Ева́нгеліе отъ Матѳе́я, зача́ло 43.

По 50-мъ псалмѣ́ стихи́ра, гла́съ 6:

Преподо́бне о́тче, во всю́ зе́млю изы́де вѣща́ніе исправле́ній твои́хъ, тѣ́мже на небесѣ́хъ обрѣ́лъ еси́ мзду́ трудо́въ твои́хъ. Де́монская разори́лъ еси́ по́лчища и а́нгельскія дости́глъ еси́ чи́ны, и́хже житію́ непоро́чно поревнова́лъ еси́. Дерзнове́ніе имѣ́я ко Христу́ Бо́гу, ми́ръ испроси́ душа́мъ на́шимъ.

Аще пра́зднуеши съ поліеле́емъ: кано́нъ Богоро́дицы на 4 и свята́го на 8, гла́съ 8:

Пѣ́снь 1.

Ирмо́съ: Во́ду проше́дъ, я́ко су́шу, и еги́петскаго зла́ избѣжа́въ, изра́ильтянинъ вопія́ше: Изба́вителю и Бо́гу на́шему пои́мъ.

Благи́ми нра́вы украси́вся, Христу́ прилѣпи́лся еси́ отъ ю́ности, плотскíя стра́сти умертви́въ воздержа́ніемъ, и къ животу́, преподо́бне, преста́вился еси́.

Глаго́ловъ и зако́новъ Бо́жіихъ испо́лнитель бы́въ, испо́лнился еси́, о́тче прему́дре, Боже́ственныхъ даро́въ и чуде́съ, и всѣ́мъ лучи́ бога́тно испусти́лъ еси́.

Крѣ́постію Христа́ возмо́гъ, держа́ву низложи́лъ еси́ и си́лу вра́жію и, похвалу́ побѣ́дную и по́чести прія́лъ еси́, преподо́бне, чуде́сными сія́ніи.

Сла́ва: Со́вѣсть имѣ́лъ еси́ бла́гу и о́ко серде́чное, взира́ющее къ Бо́гу, тѣ́мже вня́тъ моли́твѣ твое́й, прему́дре, съ преподо́бными сочета́ тя́.

И ны́нѣ, [богоро́диченъ]: Стра́сти пло́ти моея́ и ума́ моего́ двиза́нія неподо́бная утоли́, молю́ Тя́, Пречи́стая Дѣ́во, и испра́ви мя́, заблу́ждшаго умо́мъ.

Пѣ́снь 3.

Ирмо́съ: Ты́ еси́ утвержде́ніе притека́ющихъ къ Тебѣ́, Го́споди, Ты́ еси́ Свѣ́тъ омраче́нныхъ, и пое́тъ Тя́ ду́хъ мо́й.

Ве́сь прилѣжа́ Вседержи́телеви, преподо́бне о́тче прему́дре, всея́ бѣсо́вскія зло́бы избѣ́глъ еси́.

Высото́ю смире́нія украша́емь, све́рглъ еси́ на зе́млю велехва́льнаго изря́дными дѣ́лы твои́ми.

Пло́тію обложе́нъ, о́тче прему́дре, смири́лъ еси́ превзя́тую вы́ю нечести́ваго смире́ніемъ слове́съ твои́хъ.

Сла́ва: Имѣ́я поспѣшеству́ющую тебѣ́ Бо́жію си́лу, прему́дре, я́ко чу́денъ, чудеса́ источа́еши и отго́ниши неду́ги.

И ны́нѣ, [богоро́диченъ]: Въ ложесна́ Твоя́ воплоща́емь, Всенепоро́чная, всели́ся Зижди́тель на благодѣя́ніе вѣ́рно пою́щимъ Тя́.

Сѣда́ленъ, гла́съ 4. Подо́бенъ: Ско́ро предвари́.

Стра́стное покори́лъ еси́ плотско́е мудрова́ніе, и, го́ршая порабо́тивъ лу́чшему, о́тче [и́мярекъ] пресла́вне, сокруши́лъ еси́ бѣсо́вскія ко́зни посто́мъ и возсія́лъ еси́ въ мíрѣ, я́ко луча́ со́лнечная, сія́ніи твои́хъ добродѣ́телей, сего́ ра́ди тя́ воспѣва́емъ.

Сла́ва, и ны́нѣ, богоро́диченъ:

Стѣна́ непобѣди́мая на́мъ, христіа́номъ, еси́, Богоро́дице Дѣ́во, къ Тебѣ́ прибѣга́юще, невреди́ми пребыва́емъ и, па́ки согрѣша́юще, и́мамы Тя́ Моли́твенницу. Тѣ́мъ, благодаря́ще, вопіе́мъ Ти́: ра́дуйся, Благода́тная, Госпо́дь съ Тобо́ю.

Крестобогоро́диченъ:

Дѣ́во Пренепоро́чная, Ма́ти Христа́ Бо́га, ору́жіе про́йде Твою́ пресвяту́ю ду́шу, егда́ распина́ема ви́дѣла еси́ во́лею Сы́на и Бо́га Твоего́. Его́же, Благослове́нная, моля́щи не преста́й проще́ніе прегрѣше́ній на́мъ дарова́ти.

Пѣ́снь 4.

Ирмо́съ: Услы́шахъ, Го́споди, смотре́нія Твоего́ та́инство, разумѣ́хъ дѣла́ Твоя́ и просла́вихъ Твое́ Божество́.

Содѣ́явъ, пресла́вне, ду́шу твою́ хра́мъ Свято́му Ду́ху, бы́лъ еси́ наслѣ́дникъ го́рняго Ца́рствія съ вы́шними си́лами.

Многоболѣ́зненныя стра́сти всегда́ врачу́еши приступа́ющихъ къ тебѣ́, благода́ть бо, преподо́бне, пріи́мъ отъ Го́спода содѣва́ти зна́менія и чудеса́.

Сла́ва: Краснѣ́йшимъ прозябе́ніемъ, о́тче, въ дому́ Бо́жіи прозя́блъ еси́, добродѣ́тельми укра́шенъ и плоды́ чуде́сными облагоуха́емь.

И ны́нѣ, [богоро́диченъ]: Ни́ва духо́вная, я́коже изъ бразды́ кла́съ, изнесла́ еси́ всю́ тва́рь Пита́ющаго, вся́ческихъ Бо́га, Приснодѣ́во.

Пѣ́снь 5.

Ирмо́съ: Утренююще, вопіе́мъ Ти́: Го́споди, спаси́ ны, Ты́ бо еси Бо́гъ на́шъ, ра́звѣ Тебе́, ино́го не вѣ́мы.

Умо́мъ очище́ннымъ, пресла́вне, зри́ши добро́ту неизрече́нную Христа́, вся́ческихъ Бо́га на́шего.

Якоже Илія́ на колесни́цѣ, о́тче, добродѣ́тельми твои́ми возше́лъ еси́ на не́бо, ду́хомъ облегчава́емь.

Сла́ва: Стя́гнувъ тѣ́ло твое́ воздержа́ніемъ и чистото́ю, въ вы́шняя селе́нія къ широтѣ́, о́тче, дости́глъ еси́.

И ны́нѣ, [богоро́диченъ]: Исцѣли́ неду́гующаго ума́ моего́ омраче́ніе, Врача́ ро́ждшая, Христа́, Всенепоро́чная Влады́чице.

Пѣ́снь 6.

Ирмо́съ: Моли́тву пролію́ ко Го́споду и Тому́ возвѣщу́ печа́ли моя́, я́ко зо́лъ душа́ моя́ испо́лнися и живо́тъ мо́й а́ду прибли́жися, и молю́ся, я́ко Іо́на: отъ тли́, Бо́же, возведи́ мя.

Лука́вый умертви́ся змíй свяще́нными твои́ми моли́твами, богоблаже́нне, и отъ того́ разрѣша́ются зло́бы и́же зна́менія отъ тебе́ испроси́вшіи, еси́ бо уго́дникъ Бо́жій всесвѣ́телъ, позна́нъ бы́лъ еси́ вѣ́ренъ.

Обнови́въ прилѣ́жнымъ ра́ломъ ду́шу твою́, свяще́нный о́тче, добродѣ́тельная въ ню́ вве́рглъ еси́ прему́дренно многопло́дная сѣ́мена и пожа́лъ еси́ многоразли́чныхъ исцѣле́ній бога́тыя кла́сы.

Сла́ва: Крѣ́постію Ду́ха, о́тче, возмо́гъ, держа́ву вра́жію и си́лу низложи́лъ еси́ и похвалу́ побѣ́дную по́чести прія́лъ еси́, преподо́бне, чуде́сными сія́ніи.

И ны́нѣ, [богоро́диченъ]: Госпо́дь съ Тобо́ю, Пречи́стая, я́коже изво́лилъ е́сть, бы́въ, Отрокови́це, всѣ́хъ на́съ отъ о́бласти льсти́ваго хода́тайствомъ Твои́мъ изба́вилъ е́сть, тѣ́мже Тя́ ны́нѣ по до́лгу, ро́дове родо́въ, ублажа́емъ.

Конда́къ во Уста́вѣ. Аще ли нѣ́сть Уста́ва, глаго́ли се́й
Конда́къ, гла́съ 2. Подо́бенъ: Вы́шнихъ ища́.

Чистото́ю душе́вною боже́ственно вооружи́вся и непреста́нныя моли́твы, я́ко копіе́, вручи́въ крѣ́пко, пробо́лъ еси́ бѣсо́вская ополче́нія, [и́мярекъ] о́тче на́шъ, моли́ непреста́нно о всѣ́хъ на́съ.

Икосъ:

Возлюби́въ, преподо́бне, Христо́вы Боже́ственныя за́повѣди и возненави́дѣвъ мíра сего́ наслажде́ніе, прише́лъ еси́ усе́рдно къ Тому́ и бы́лъ еси́ свѣти́льникъ, просвѣща́я концы́ блиста́ніемъ духо́внымъ. Тѣ́мъ, припа́дая, молю́ тя́: просвѣти́ мои́ о́чи душе́вныя воспѣ́ти твоя́ по́двиги, поще́ніе, и бдѣ́ніе, и сле́зы, болѣ́зни и изможде́ніе тѣ́ла блаже́нныя ра́ди бу́дущія жи́зни, ея́же ны́нѣ наслажда́ешися, моли́ непреста́нно о всѣ́хъ на́съ.

Пѣ́снь 7.

Ирмо́съ: Отъ Іуде́и доше́дше, о́троцы, въ Вавило́нѣ иногда́, вѣ́рою Тро́ическою пла́мень пе́щный попра́ша, пою́ще: отце́въ Бо́же, благослове́нъ еси́.

Проше́дъ по́двиги по́стныя, о́тче, умо́мъ крѣ́пкимъ у́мъ прего́рдый боже́ственнымъ смире́ніемъ смири́лъ еси́, поя́: благослове́нъ Бо́гъ оте́цъ на́шихъ.

Краснѣ́йшее прозябе́ніе, о́тче, въ дому́ Бо́жіи прозя́блъ еси́, добродѣ́тельми украше́нъ, и плоды́ чуде́сными облагоуха́лъ еси́.

Сла́ва: Просвѣти́въ твое́ се́рдце, нача́льникъ бы́лъ еси́ свяще́ннаго собо́ра о́тча, наказу́я, и уча́, и вся́ приводя́ къ Бо́жіей во́ли, поя́: оте́цъ на́шихъ Бо́же, благослове́нъ еси́.

И ны́нѣ, [богоро́диченъ]: Но́во Отроча́ ро́ждши, Пребезнача́льнаго Сло́ва, обветша́вшія ны́ грѣхо́мъ обнови́ла еси́, Дѣ́во, и пѣ́ти укрѣпи́ла еси́: оте́цъ на́шихъ Бо́же, благослове́нъ еси́.

Пѣ́снь 8.

Ирмо́съ: Богоглаго́ливіи о́троцы, въ пещи́ со огне́мъ пла́мень попира́юще, поя́ху: благослови́те, дѣла́ Госпо́дня, Го́спода.

Наслѣ́дниче боже́ственныхъ селе́ній, а́нгельски, о́тче, пожи́лъ еси́, тѣ́мъ со а́нгелы лику́етъ ду́хъ тво́й.

Невозвра́тно ше́ствовавъ, о́тче прему́дре и досточу́дне, веду́щими къ небеси́ боже́ственными стезя́ми, отъ злѣ́ веду́щихъ до конца́ уклони́лся еси́.

Благослови́мъ Отца́ и Сы́на и Свята́го Ду́ха, Го́спода.

Все́льшеюся благода́тію въ ду́шу твою́, о́тче, лука́вно живу́щіи въ человѣ́цѣхъ нечи́стіи ду́хи отгони́ми быва́ютъ.

И ны́нѣ, [богоро́диченъ]: Вода́ еси́ неисчерпа́емая, Дѣ́во, отъ нея́же вси́ пію́ще, благода́ти исполня́емся, душе́ю и тѣ́ломъ освяща́еми.

Пѣ́снь 9.

Ирмо́съ: Устраши́ся вся́къ слу́хъ неизрече́нна Бо́жія снизхожде́нія, я́ко Вы́шній во́лею сни́де да́же и до пло́ти, отъ дѣви́ческаго чре́ва бы́въ Человѣ́къ. Тѣ́мже Пречи́стую Богоро́дицу, вѣ́рніи, велича́емъ.

Исцѣле́ніе источа́етъ бога́тно честна́я твоя́ ра́ка Бо́жіимъ Ду́хомъ и стра́сти многовре́менныя исцѣля́етъ, о́тче, приходя́щихъ къ тебѣ́, и прого́нитъ лука́выя ду́хи лю́тыя, и воздвиза́етъ вѣ́рныя восхвали́ти твоя́ свѣ́тлыя по́двиги.

Яко вели́кое со́лнце, на́мъ вели́чіемъ по́двигъ твои́хъ возсія́лъ еси́ и озари́лъ еси́, богому́дре, вся́ земны́я концы́. Умеръ, преше́лъ еси́ отъ свѣ́та къ Свѣ́ту возсія́вшему, тѣ́мъ вопіе́мъ ти́: просвѣти́ и на́ша помышле́нія, о́тче преподо́бне [и́мярекъ].

Тѣ́ло твое́, блаже́нне, терпѣли́вое, связа́вшееся вери́гами, стра́сти неисцѣ́льныя прикоснове́ніемъ исцѣля́етъ, Бо́гу и Спа́су тя́ вельми́ просла́вльшу, о́тче прему́дре и досточу́дне [и́мярекъ], я́ко дѣ́лы твои́ми до́брыми просла́вльшуся, преподо́бне.

Сла́ва: Процвѣ́лъ еси́ въ по́стническихъ удолія́хъ, прехва́льне о́тче на́шъ, я́ко ши́покъ благоуха́ненъ, и, я́коже кри́нъ, облагоуха́лъ еси́ со́вѣсти вѣ́рныхъ добродѣ́тельми и чудесы́. Тѣ́мже, преподо́бне, отжени́ отъ на́съ стра́сти смердя́щія.

И ны́нѣ, [богоро́диченъ]: Просвѣти́, Чи́стая Дѣ́во, сѣ́тующее се́рдце мое́ при́сно преступле́ньми и жите́йскими мно́гими молва́ми, не оста́ви мене́ враго́мъ бы́ти въ ра́дость, я́ко да сла́влю Тя́ и любо́вію пою́, Препѣ́тая.

Свѣти́ленъ. Подо́бенъ: Жены́ услы́шите.

Процвѣ́лъ еси́ я́ко фи́никсъ, Дави́дски, о́тче, и оби́тель яви́лся еси́ Ду́ха Пресвята́го, и сла́вна тя́ вселе́ннѣй показа́. О на́съ непреста́нно моли́, почита́ющихъ вѣ́рою пречестну́ю па́мять твою́, преподо́бне [и́мярекъ].

Сла́ва, и ны́нѣ, богоро́диченъ:

Тя́, пѣ́сньми немо́лчными, ублажа́емъ, Дѣ́во, я́ко отъ Тро́ицы Еди́наго родила́ еси́, Богоро́дице, и но́сиши на боже́ственную руку́ пребога́тое Сло́во, непремѣ́нно и неизмѣ́нно.

Аще пра́зднуеши съ поліеле́емъ: на хвали́техъ стихи́ры, гла́съ 6.

Богоно́се преблаже́нне [и́мярекъ], все́ плотско́е мудрова́ніе ду́ху повину́лъ еси́, поще́нія страда́ньми утверди́вся, я́ко зла́то, въ горни́лѣ искуше́но, сія́я, яви́вся, прія́телище бы́лъ еси́ Ду́ха Пресвята́го. Собра́въ мона́шествующихъ мно́жества, и уче́ніи твои́ми, я́ко нѣ́коею лѣ́ствицею восхо́дною, на не́бо, на высоту́ добродѣ́телей возве́лъ еси́. Помина́й на́съ, чту́щихъ па́мять твою́ при́сно свяще́нную, и моли́ спасти́ся душа́мъ на́шимъ. [Два́жды.]

Возсія́ дне́сь пресвѣ́тлая и всепра́зднственная па́мять твоя́, пресла́вне [и́мярекъ], созыва́ющи многочи́сленное по́стникъ сосло́віе и преподо́бныхъ ликостоя́нія, а́нгелы же съ человѣ́ки, я́ко вои́стинну къ похвале́нію въ Тро́ицѣ покланя́ема Христа́ Бо́га на́шего. Тѣ́мже притека́юще ко свяще́ннѣй ра́цѣ моще́й твои́хъ, исцѣле́нія да́ры оби́льно пріе́млемъ и тебе́ вѣнча́вшаго Христа́ прославля́емъ, Спа́са ду́шъ на́шихъ.

Богоно́се, преблаже́нне о́тче [и́мярекъ], ты́ проро́чески слеза́ми зе́млю омака́лъ еси́ и не да́лъ еси́ сна́ твои́ма очи́ма, ни вѣ́ждома твои́ма дрема́нія, серде́чное жела́ніе ко Христу́ явля́я, Его́же возлюби́лъ еси́, тѣ́мъ мона́ховъ о́бразъ бы́лъ еси́ и вся́кія добродѣ́тели ви́дъ испра́вилъ еси́. Тѣ́мже тя́ ублажа́емъ, велича́юще тебе́ Просла́вльшаго.

Сла́ва, гла́съ 2:

Преподо́бне о́тче, изъ младе́нства добродѣ́тели прилѣ́жно обучи́вся, орга́нъ бы́лъ еси́ Свята́го Ду́ха и, отъ Него́ пріи́мъ чуде́съ дѣ́йство, увѣща́лъ еси́ человѣ́ки преоби́дѣти сла́дкая. Ны́нѣ же Боже́ственнымъ свѣ́томъ чистѣ́йше осіява́емь, просвѣти́ и на́ша мы́сли, [и́мярекъ] о́тче на́шъ.

И ны́нѣ, богоро́диченъ:

Все́ упова́ніе мое́ на Тя́ возлага́ю, Ма́ти Бо́жія, сохрани́ мя́ подъ кро́вомъ Твои́мъ.

Славосло́віе вели́кое. [Ектеніи́] и отпу́стъ.


НА ЛИТУРГІИ,

Блаже́нна отъ кано́на, пѣ́снь 3-я и 6-я. Проки́менъ, гла́съ 7: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми? Апо́столъ къ Гала́томъ, зача́ло 213. Аллилуія, гласъ 6: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́. Сти́хъ: Си́льно на земли́ бу́детъ сѣ́мя его́, [ро́дъ пра́выхъ благослови́тся]. Ева́нгеліе отъ Матѳе́я, зача́ло 43, или́ Луки́, зача́ло 24. Прича́стенъ: Въ па́мять вѣ́чную бу́детъ пра́ведникъ, [отъ слу́ха зла́ не убои́тся].

Источникъ: Слу́жбы преподо́бнымъ отце́мъ Пече́рскимъ, и́хже мо́щи въ Бли́жней и Да́льней пеще́рѣ нетлѣ́нно почива́ютъ. — Кíевъ: Въ тѵпогра́фіи Кíево-Пече́рскія Ла́вры, 1855. — Л. 114 – 117. [2-я паг.]

Назадъ // Къ оглавленію // Впередъ


Наверхъ / Къ титульной страницѣ

0



«Слава Россіи»
Малый герб Российской империи
Помощь Порталу
Просимъ Васъ поддержать нашъ Порталъ
© 2004-2019 г.