Церковный календарь
Новости


2019-07-22 / russportal
Ген. П. Н. Красновъ. "Отъ Двуглаваго Орла..." Томъ III-й, Ч. 6-я, Гл. 34-я (1922)
2019-07-22 / russportal
Ген. П. Н. Красновъ. "Отъ Двуглаваго Орла..." Томъ III-й, Ч. 6-я, Гл. 33-я (1922)
2019-07-22 / russportal
Ген. П. Н. Красновъ. "Отъ Двуглаваго Орла..." Томъ III-й, Ч. 6-я, Гл. 32-я (1922)
2019-07-22 / russportal
Ген. П. Н. Красновъ. "Отъ Двуглаваго Орла..." Томъ III-й, Ч. 6-я, Гл. 31-я (1922)
2019-07-22 / russportal
И. А. Ильинъ. "Наши задачи". Томъ 1-й. Статья 76-я (1956)
2019-07-22 / russportal
И. А. Ильинъ. "Наши задачи". Томъ 1-й. Статья 75-я (1956)
2019-07-22 / russportal
И. А. Ильинъ. "Наши задачи". Томъ 1-й. Статья 74-я (1956)
2019-07-22 / russportal
И. А. Ильинъ. "Наши задачи". Томъ 1-й. Статья 73-я (1956)
2019-07-22 / russportal
Ген. А. И. Деникинъ. «Очерки Русской Смуты». Томъ 1-й. Глава 32-я (1921)
2019-07-22 / russportal
Ген. А. И. Деникинъ. «Очерки Русской Смуты». Томъ 1-й. Глава 31-я (1921)
2019-07-21 / russportal
Ген. П. Н. Красновъ. "Отъ Двуглаваго Орла..." Томъ III-й, Ч. 6-я, Гл. 30-я (1922)
2019-07-21 / russportal
Ген. П. Н. Красновъ. "Отъ Двуглаваго Орла..." Томъ III-й, Ч. 6-я, Гл. 29-я (1922)
2019-07-21 / russportal
Ген. П. Н. Красновъ. "Отъ Двуглаваго Орла..." Томъ III-й, Ч. 6-я, Гл. 28-я (1922)
2019-07-21 / russportal
Ген. П. Н. Красновъ. "Отъ Двуглаваго Орла..." Томъ III-й, Ч. 6-я, Гл. 27-я (1922)
2019-07-21 / russportal
И. А. Ильинъ. "Наши задачи". Томъ 1-й. Статья 72-я (1956)
2019-07-21 / russportal
И. А. Ильинъ. "Наши задачи". Томъ 1-й. Статья 71-я (1956)
Новости въ видѣ
RSS-канала: .
Сегодня - вторникъ, 23 iюля 2019 г. Сейчасъ на порталѣ посѣтителей - 8.
Церковно-богослужебныя книги

ОКТОИХЪ, СИРѢЧЬ ОСМОГЛАСНИКЪ.
Кни́га моле́бна, cодержа́щая въ себѣ́ подоба́ющее возслѣ́дованіе Воскре́сныя слу́жбы осми́ гласо́въ съ шестію́ дне́й.
Ча́сть 1-я: съ 1-го гла́са по 4-й. (Тисне́ніе 4-е. М.: Сѵнода́льная Тѵпогра́фія, 1898.)

ГЛАСЪ 1-Й.
СЛУЖБА ВЪ СУББОТУ, ВСѢМЪ СВЯТЫМЪ И УСОПШИМЪ.

ВЪ ПЯТОКЪ ВЕЧЕРА,
На Го́споди воззва́хъ.., стихи́ры святы́мъ му́ченикомъ, и святи́телемъ, и преподо́бнымъ, гла́съ 1. Подо́бенъ: Прехва́льніи му́ченицы.

Сти́хъ: Аще беззако́нія на́зриши, Го́споди, Го́споди, кто́ постои́тъ? Яко у Тебе́ очище́ніе е́сть.

Му́чениковъ еди́нственное торжество́* струя́ми свои́хъ крове́й* мно́жество бѣсо́въ удави́ша* и вся́кія уста́виша сту́дныя же́ртвы,* и́дольскую разруши́ша пре́лесть,* терпѣли́вно пострада́вше.* И ны́нѣ мо́лятся* Христу́ дарова́ти душа́мъ на́шимъ* ми́ръ и ве́лію ми́лость.

Сти́хъ: Имене ра́ди Твоего́ потерпѣ́хъ Тя́, Го́споди, потерпѣ́ душа́ моя́ въ сло́во Твое́, упова́ душа́ моя́ на Го́спода.

Па́стыріе всесвяще́нніи* му́дрыми словесы́ и уче́ніи* всѣ́хъ научи́ша* во Еди́нствѣ Божество́ Тро́ическое сла́вити,* Ли́цъ слія́нія и раздѣле́нія* Боже́ственнѣ убѣга́юще.* И ны́нѣ мо́лятся* дарова́ти душа́мъ на́шимъ* ми́ръ и ве́лію ми́лость.

Сти́хъ: Отъ стра́жи у́треннія до но́щи, отъ стра́жи у́треннія, да упова́етъ Изра́иль на Го́спода.

Преподо́бныхъ сосло́віе,* плотска́я хотѣ́нія успи́ша* и стремле́нія обузда́ша,* житіе́ равноа́нгельное показа́вше.* Тѣ́мже и въ жили́щахъ небе́сныхъ* ны́нѣ ликовству́ютъ,* Христу́ моля́щеся* дарова́ти душа́мъ на́шимъ* ми́ръ и ве́лію ми́лость.

Ины стихи́ры, му́ченичны, гла́съ то́йже:

Сти́хъ: Яко у Го́спода ми́лость и мно́гое у Него́ избавле́ніе, и То́й изба́витъ Изра́иля отъ всѣ́хъ беззако́ній его́.

Моли́твами, Го́споди, всѣ́хъ святы́хъ и Богоро́дицы Тво́й ми́ръ да́ждь на́мъ и поми́луй на́съ, я́ко еди́нъ Ще́дръ.

Сти́хъ: Хвали́те Го́спода, вси́ язы́цы, похвали́те Его́, вси́ лю́діе.

Еже на суди́щи ва́ше исповѣ́даніе, святíи, де́моновъ оплева́ си́лу и отъ пре́лести человѣ́ки свободи́. Тѣ́мже и глава́мъ усѣка́емымъ, взыва́сте: да бу́детъ, Го́споди, же́ртва ду́шъ на́шихъ благопрія́тна предъ Тобо́ю, я́ко Тебе́ возлюби́вше, неради́хомъ о вре́меннѣй жи́зни, Человѣколю́бче.

Сти́хъ: Яко утверди́ся ми́лость Его́ на на́съ и и́стина Госпо́дня пребыва́етъ во вѣ́къ.

О, до́брыя ва́шея ку́пли, святíи! Яко кро́ви да́сте и небеса́ наслѣ́довасте и, вре́менно искуси́вшеся, вѣ́чно ра́дуетеся. Вои́стинну добра́ ва́ша ку́пля, тлѣ́нная бо оста́вльше, нетлѣ́нная воспрія́сте и, со а́нгелы ликовству́юще, пое́те непреста́нно Тро́ицу Единосу́щную.

Сла́ва, и ны́нѣ, богоро́диченъ:

Всемíрную сла́ву, отъ человѣ́къ прозя́бшую и Влады́ку ро́ждшую, небе́сную две́рь воспои́мъ, Марíю Дѣ́ву, безпло́тныхъ пѣ́снь и вѣ́рныхъ удобре́ніе: Сія́ бо яви́ся не́бо и хра́мъ Божества́, Сія́, прегражде́ніе вражды́ разруши́вши, ми́ръ введе́ и Ца́рствіе отве́рзе. Сію́ у́бо иму́ще вѣ́ры утвержде́ніе, Побо́рника и́мамы изъ Нея́ ро́ждшагося Го́спода. Дерза́йте у́бо, дерза́йте, лю́діе Бо́жіи, и́бо То́й побѣди́тъ враги́, я́ко Всеси́ленъ.

Та́же: Свѣ́те Ти́хій...

На стихо́внѣ му́чениченъ, гла́съ 1:

Прехва́льніи му́ченицы,* ва́съ ни земля́ потаи́ла е́сть,* но не́бо прія́тъ вы́,* и отверзо́шася ва́мъ ра́йскія две́ри,* и вну́трь бы́вше,* дре́ва живо́тнаго наслажда́етеся.* Христу́ моли́теся* дарова́ти душа́мъ на́шимъ* ми́ръ и ве́лію ми́лость.

[Сти́хъ: Блаже́ни, я́же избра́лъ и прія́лъ еси́, Го́споди.]

Поко́инъ: Ка́я жите́йская сла́дость* пребыва́етъ печа́ли неприча́стна?* Ка́я ли сла́ва стои́тъ на земли́ непрело́жна?* Вся́ сѣ́ни немощнѣ́йша* и вся́ со́ній преле́стнѣйша:* во еди́нъ ча́съ вся́ сія́ сме́рть пріе́млетъ.* Но во свѣ́тѣ, Христе́, лица́ Твоего́* и въ наслажде́ніи Твоея́ красоты́,* я́же избра́лъ еси́ упоко́й, я́ко Человѣколю́бецъ.

[Сти́хъ: Ду́ши и́хъ во благи́хъ водворя́тся.]

Поко́инъ: Никто́же безгрѣ́шенъ,* никто́же отъ человѣ́къ бы́въ,* то́кмо Ты́, еди́не Безсме́ртне,* тѣ́мже рабы́ Твоя́, я́ко Бо́гъ ще́дрый,* во свѣ́тѣ со а́нгельскими ликостоя́ніи Твои́ми учини́* благоутро́біемъ Твои́мъ,* презира́я беззако́нія* и подая́ и́мъ проще́ніе.

Сла́ва, и ны́нѣ, богоро́диченъ:

Вои́стинну па́че ума́ чу́дная Твоя́ вели́чія рождества́ Твоего́, Богоневѣ́сто, я́же проповѣ́даша проро́цы вси́, вся́ пресла́вная: зача́тіе и рождество́, Всепѣ́тая, недомы́сленно и несказа́нно, и́мже мíръ спа́слъ е́сть, я́ко Милосе́рдъ.

Та́же: Ны́нѣ отпуща́еши... Трисвято́е, и по Отче на́шъ... Тропа́рь, и отпу́стъ.


ВЪ ПЯТОКЪ НА ПОВЕЧЕРІИ,
Кано́нъ Пресвятѣ́й Богоро́дицѣ, гла́съ 1:

Пѣ́снь 1.

Ирмо́съ: Пѣ́снь побѣ́дную пои́мъ вси́ Бо́гу, сотво́ршему ди́вная чудеса́ мы́шцею высо́кою и спа́сшему Изра́иля, я́ко просла́вися.

[Припѣ́въ: Пресвята́я Богоро́дице, спаси́ на́съ.]

Спаси́тельное еси́ приста́нище и покро́въ призыва́ющимъ Тя́, Богоро́дице Пречи́стая. Тѣ́мже и а́зъ отъ души́ призыва́ю Тя́ те́плѣ: Влады́чице, спаси́ мя́.

Марíе Пречи́стая, Зижди́теля Ма́ти, истлѣ́вшую страстьми́ и прегрѣше́ньми смире́нную мою́ ду́шу исцѣли́, я́ко Блага́я и Благопремѣ́нная.

Сла́ва: Безневѣ́стная Влады́чице, не отступа́й моля́щи всегда́ Творца́ моего́ и Бо́га о притека́ющемъ при́сно къ покро́ву Твоему́ улучи́ти ми́лость.

И ны́нѣ: Пала́то одушевле́нная Царе́ва и престо́ле огнеобра́зный, со святы́ми му́ченики и апо́столы Христа́ при́сно моли́ отъ напа́стей на́съ изба́вити.

Пѣ́снь 3.

Ирмо́съ: Ка́мень, его́же небрего́ша зи́ждущіи, се́й бы́сть во главу́ у́гла: то́й е́сть Ка́мень, на не́мже утверди́ Це́рковь Христо́съ, ю́же отъ язы́къ искупи́.

Тма́ прегрѣше́ній обдержи́тъ мое́ се́рдце, Влады́чице, и не смѣ́ю воззрѣ́ти на не́бо очи́ма, тѣ́мже зову́: просвѣти́ велѣ́ньми Христо́выми у́мъ, и ду́шу, и се́рдце мое́.

Взира́ю на боже́ственный Тво́й о́бразъ, и печа́ть Тя́ Влады́чню, и Пречи́стую Ма́терь, я́ко Первообра́зну, чту́, и Сію́ лобыза́ю, и покланя́юся, и хвалю́, еди́ну вѣ́дый Твою́ и Того́ че́сть.

Сла́ва: Уста́ви лю́тая стремле́нія тѣле́сная, угаси́ и пла́мень страсте́й, Дѣ́во, и́миже согрѣше́ній плѣни́цу многоплете́нную ми́ соплета́етъ змíй лю́тый, хотя́ восхи́тити къ поги́бели.

И ны́нѣ: Ве́сь во Ада́ма облече́ся изъ Тебе́, Богоро́дице, всетѣлоно́сно проше́дъ Сло́во. Того́ у́бо моли́ страсте́й на́съ изба́вити, и напа́стей разли́чныхъ, и огня́ вѣ́чнующаго.

Пѣ́снь 4.

Ирмо́съ: Ду́хомъ прови́дя, проро́че Авваку́ме, Словесе́ воплоще́ніе, проповѣ́далъ еси́, вопія́: внегда́ прибли́житися лѣ́томъ, позна́ешися, внегда́ пріити́ вре́мени, пока́жешися. Сла́ва си́лѣ Твое́й, Го́споди.

Ро́ждши Зижди́теля и всѣ́хъ Творца́, си́лу неизрече́нну и непобѣди́му крѣ́пость и́маши, Дѣ́во, и спаса́еши вѣ́рою къ Тебѣ́ приходя́щія. Сего́ ра́ди зову́ Ти: Влады́чице мíра, помози́ ми.

Бра́ни неви́димыхъ вра́гъ мы́сленныхъ низложи́, Влады́чице, всу́е на мое́ напа́дающихъ окая́нное се́рдце, тишину́ Боже́ственную и ми́ръ да́рующи, я́ко да ве́село воспѣва́ю Тя́.

Сла́ва: Наде́жде ненаде́жныхъ, помо́щнице ни́щихъ, пла́чущихъ утѣ́ха, согрѣша́ющихъ очище́ніе, руководи́тельница заблу́ждшихъ, боля́щихъ цѣле́бница и исправле́ніе па́дающихъ.

И ны́нѣ: Чи́стая и Благослове́нная, Яже еди́на кля́твы всѣ́хъ измѣни́вшая, Дѣ́во Марíе, со апо́столы, и му́ченики, и проро́ки моли́ изъ чре́ва Твоего́ Проше́дшаго спасти́ ду́ши пою́щихъ Тя́.

Пѣ́снь 5.

Ирмо́съ: Тво́й ми́ръ да́ждь на́мъ, Сы́не Бо́жій, ино́го бо, ра́звѣ Тебе́, Бо́га не зна́емъ, и́мя Твое́ имену́емъ, я́ко Бо́гъ живы́хъ и ме́ртвыхъ еси́.

Спаси́ мя́, Влады́чице, изъ глубины́ напа́стей, и скорбе́й, и печа́лей, и страсте́й тѣле́сныхъ, и въ тишинѣ́ Боже́ственнѣй сохрани́ ду́шу мою́.

Ты́ ми́ еси́ те́плое хране́ніе и тве́рдое во все́й жи́зни, Пренепоро́чная. Тѣ́мже молю́ Тя: и по сме́рти Твое́ мнѣ́ милосе́рдіе простри́ бога́тое.

Сла́ва: Яже Зижди́теля ро́ждшая и Изба́вителя всѣ́хъ, изба́ви мя́ страсте́й тѣле́сныхъ, опаля́ющихъ се́рдце мое́ и привлача́ющихъ къ дѣло́мъ неподо́бнымъ.

И ны́нѣ: Яко мѣ́сто свяще́нія я́вльшися мы́сленнаго, всего́ мя́ освяти́, Влады́чице, и со святы́ми моли́ся и му́дрыми апо́столы спасти́ мя́, Дѣ́во.

Пѣ́снь 6.

Ирмо́съ: Проро́ка Іо́ну подража́я, вопію́: живо́тъ мо́й, Бла́же, свободи́ изъ тли́, и спаси́ мя, Спа́се мíра, зову́ща: сла́ва Тебѣ́.

Ты́ жи́ва мя́ соблюда́еши, избавля́ющи напа́стей, Ты́ и отъ земли́ отходя́ща къ вѣ́чнѣй жи́зни преста́ви, Дѣ́во Ма́ти, милосе́рдіемъ Твои́мъ.

Ты́ еси́ стѣна́ неруши́ма, Ты́ еси́ покро́въ тве́рдъ, Богоро́дице Блага́я, Ты́ предста́тельница крѣпка́ рабу́ Твоему́, и сего́ ра́ди Тя́ призыва́ю при́сно.

Сла́ва: Ты́ моли́тву си́льну стяжа́вши къ Бо́гу, Богоро́дице Блага́я, не пре́зри мене́ те́плѣ къ покро́ву Твоему́ притека́ющаго и вопію́щаго: поми́луй мя́, Ма́ти всѣ́хъ Бо́га.

И ны́нѣ: Не отри́ни мене́, Христе́, не гнуша́йся мене́, Спа́се, — мо́литъ Тя́ Агница, Ро́ждшая Тя́ пло́тію, со апо́столы, и со проро́ки, и со страстоте́рпцы Твои́ми.

Та́же: Го́споди поми́луй, три́жды. Сла́ва, и ны́нѣ.

Сѣда́ленъ, гла́съ 1:

Облакъ Тя́ Свѣ́та Бо́жія присносу́щнаго, Дѣ́во, и ковче́гъ, и свѣ́щникъ, и ста́мну, и го́ру несѣко́мую проро́цы прорица́ху, Отрокови́це Пречи́стая, изъ Тебе́ бо про́йде безъ сѣ́мене въ послѣ́дняя Христо́съ Бо́гъ на́шъ, я́коже Оте́цъ благоизво́ли.

Пѣ́снь 7.

Ирмо́съ: Су́щимъ въ пещи́ отроко́мъ Твои́мъ, Спа́се, не прикосну́ся, ниже́ стужи́, о́гнь. Тогда́ тріе́, я́ко еди́нѣми усты́, поя́ху и благословля́ху, глаго́люще: благослове́нъ Бо́гъ оте́цъ на́шихъ.

Отча́янна су́ща мя́, Чи́стая, прегрѣше́ніи и сластьми́ плотски́ми и ко глубинѣ́ порѣва́ема поги́бели, приспѣ́вши, изба́ви мя́, Пречи́стая Влады́чице, милосе́рдіемъ Твои́мъ.

Прибѣ́жище, и покро́въ держа́венъ, и избавле́ніе, Богоро́дице, всѣ́мъ вѣ́рнымъ, Ты́ ми бу́ди руководи́тельница ко Творцу́, прегрѣше́ній избавле́ніе подаю́щи ми́ благоутро́біемъ Твои́мъ.

Сла́ва: Ты́ кля́тву потреби́ла еси́, Чи́стая, Ра́дость ро́ждшая, Христа́, Ты́ и кля́тву, отъ грѣха́ прибы́вшую ми́, разрѣши́ си́лою Твое́ю, Пренепоро́чная, и да́руй ми́ ра́дость.

И ны́нѣ: Тя́, Пресвята́я Чи́стая, раби́ Твои́ мо́лимъ всегда́ де́нь и но́щь, моля́щеся сокруше́нною мы́слію: избавле́ніе согрѣше́ній на́шихъ да́руй Твои́ми моли́твами.

Пѣ́снь 8.

Ирмо́съ: Его́же ужаса́ются а́нгели и вся́ во́инства, я́ко Творца́ и Го́спода, по́йте, свяще́нницы, просла́вите, о́троцы, благослови́те, лю́діе, и превозноси́те во вся́ вѣ́ки.

Воста́ни, предвари́, ра́туй враги́, и́же всу́е смуща́ющія и оскорбля́ющія на́съ, Твою́ си́лу явля́ющи, Свята́я Дѣ́во, Помо́щнице мíра.

Мíръ спасла́ еси́ отъ сме́рти и тли́ Боже́ственнымъ Рождество́мъ Твои́мъ, Дѣ́во Блага́я, и ны́нѣ же моли́твами Твои́ми и на́съ, восхваля́ющихъ Тя́, отъ страсте́й исхити́ и спаси́.

Сла́ва: Мно́гая Твоя́ и неизрече́нная, Дѣ́во, крѣ́пость, мно́ги и непобѣди́мы Боже́ственныя щедро́ты и благоутро́біе. Тѣ́мже спаса́й на́съ, вои́стинну Тя́ призыва́ющихъ.

И ны́нѣ: Яко одушевле́нъ виногра́дъ, Дѣ́во, прорасти́ла еси́ на́мъ Гро́здъ зрѣ́лый, источи́вшій вино́ оставле́нія и грѣхо́вное изсуши́вшій пія́нство.

Пѣ́снь 9.

Ирмо́съ: Свѣтоно́сный о́блакъ, въ о́ньже всѣ́хъ Влады́ка, я́ко до́ждь съ небесе́ на руно́, сни́де и воплоти́ся на́съ ра́ди, бы́въ Человѣ́къ, Безнача́льный, велича́емъ вси́ я́ко Ма́терь Бо́га на́шего Чи́стую.

Въ мо́ри житія́ обурева́емь зѣло́ сластьми́ плотски́ми, Тебѣ́ припа́даю и вопію́: поми́луй мя́, къ Тебѣ́ притека́ющаго, Влады́чице, и ру́ку ми́ спасе́нія пода́ждь, избавля́ющи поги́бельныя глубины́.

Тебѣ́ моя́ грѣхи́ исповѣ́даю, Дѣ́во, Твоему́ лицу́ мо́й представля́ю сту́дъ и вопію́ отъ души́: поми́луй и уще́дри, Пречи́стая, я́ко на Тя́ упова́ніе съ Бо́гомъ возложи́хъ тве́рдое.

Сла́ва: Тя́, безъ сѣ́мене ро́ждшую Творца́ и Влады́ку, призыва́ю отъ души́ и зову́ прилѣ́жно: Ты́ мя́ спаси́ отъ тли́ мно́гихъ прегрѣше́ній и изба́ви огня́ негаси́маго, Пресвята́я Богоро́дице Блага́я.

И ны́нѣ: Непроходи́мая две́ре, ра́йская врата́, спаса́емымъ пу́ть, спасе́нія стезя́, съ му́ченики и проро́ки, съ пра́ведными же и преподо́бными, и съ боже́ственными апо́столы моли́ся, Чи́стая, спасти́ся душа́мъ на́шимъ.

Та́же: Досто́йно е́сть... И про́чее обы́чно, и отпу́стъ.


ВЪ СУББОТУ НА УТРЕНИ,
По 1-мъ стихосло́віи сѣда́льны му́ченичны, гла́съ 1:

Страда́нія похвало́ю и вѣне́чною по́честію сла́вніи страстоте́рпцы одѣ́явшеся Тобо́ю, Го́споди, терпѣ́ніемъ у́бо ра́нъ беззако́нныхъ побѣди́ша и си́лою Боже́ственною отъ небе́съ побѣ́ду прія́ша. Тѣ́хъ моли́твами и на́съ свободи́ отъ неви́димаго врага́, Спа́се, и спаси́ на́съ.

Сти́хъ: Ди́венъ Бо́гъ во святы́хъ Свои́хъ, Бо́гъ Изра́илевъ.

Яко до́бріи во́ини единому́дренно вѣ́ровавше, преще́нія мучи́телей не убоя́стеся, святíи, пріидо́сте усе́рдно ко Христу́, взе́мше Честны́й Кре́стъ и сконча́вше тече́ніе, съ небесе́ побѣ́ду прія́сте. Сла́ва Укрѣ́пльшему вы́, сла́ва Вѣнча́вшему вы́, сла́ва Дѣ́йствующему ва́ми всѣ́мъ исцѣле́нія.

Подо́бенъ: Гро́бъ Тво́й, Спа́се.

Сти́хъ: Ду́ши и́хъ во благи́хъ водворя́тся.

Въ мѣ́стѣ свѣ́тлѣ, въ ли́цѣ пра́ведныхъ упоко́й, Спа́се, къ Тебѣ́ преста́вльшихся, на Тя́ бо упова́ніе, Человѣколю́бче, возложи́ша; пріими́ моле́ніе о отцѣ́хъ и ча́дѣхъ, и́мже соверша́емъ па́мять, и оправди́ тѣ́хъ, я́ко Многоми́лостивъ.

Сла́ва, и ны́нѣ, богоро́диченъ:

Гавріи́лу вѣща́вшу Тебѣ́, Дѣ́во, — ра́дуйся! — со гла́сомъ воплоща́шеся всѣ́хъ Влады́ка въ Тебѣ́, святѣ́мъ киво́тѣ, я́коже рече́ пра́ведный Дави́дъ, яви́лася еси́ ши́ршая небе́съ, поноси́вши Зижди́теля Твоего́. Сла́ва Все́льшемуся въ Тя́, сла́ва Проше́дшему изъ Тебе́, сла́ва Свободи́вшему на́съ рождество́мъ Твои́мъ.

По 2-мъ стихосло́віи сѣда́льны, гла́съ 1:

Ра́нами святы́хъ, и́же по Тебѣ́ пострада́ша, умоле́нъ бу́ди, Го́споди, и вся́ на́ша болѣ́зни и стра́сти исцѣли́, Человѣколю́бче, мо́лимся.

Сти́хъ: Мно́ги ско́рби пра́веднымъ, и отъ всѣ́хъ и́хъ изба́витъ я́ Госпо́дь.

Му́ченики Христо́вы мо́лимъ вси́ и любо́вію пріи́демъ къ ни́мъ съ вѣ́рою: сíи бо о на́шемъ спасе́ніи про́сятъ и сíи вси́ источа́ютъ исцѣле́ній благода́ть, сíи полки́ отгоня́ютъ бѣсо́вскія, я́ко сохра́нницы вѣ́ры.

Сти́хъ: Блаже́ни, я́же избра́лъ и прія́лъ еси́, Го́споди.

Сме́ртную держа́ву, Христе́, упраздни́въ, и нетлѣ́ніе земны́мъ источи́лъ еси́, и и́же въ Тя́ вѣ́рующіи не умира́ютъ, но живу́тъ вы́ну о Тебѣ́. Тѣ́мже упоко́й, Го́споди, ду́ши ра́бъ Твои́хъ и учини́ и́хъ со святы́ми Твои́ми моли́твами Богоро́дицы, да́руя тѣ́мъ проще́ніе и воскре́сеніе.

Сла́ва, и ны́нѣ, богоро́диченъ:

Еди́на крѣ́пкая и те́плая Предста́тельнице ро́да человѣ́ческаго, Богоро́дице Дѣ́во, непреста́нно моли́ со проро́ки и му́ченики, со святи́тели же, и по́стники, и преподо́бными, Его́же родила́ еси́ па́че естества́ Бо́га Сло́ва, спасти́ вся́ческая.

Кано́нъ святы́мъ му́ченикомъ, и святи́телемъ, и преподо́бнымъ и усо́пшимъ, его́же краегране́сіе: Бо́га возлю́бльшимъ боже́ственную воспѣва́ю пѣ́снь. Творе́ніе ки́ръ Іо́сифа, гла́съ 1.
Пѣ́снь 1.

Ирмо́съ: Столпо́мъ о́гненнымъ и о́блачнымъ Изра́иля наставле́й я́ко Бо́гъ, мо́ре разве́рже, колесни́цы же фарао́новы глубино́ю покры́, пои́мъ пѣ́снь побѣ́дную, я́ко еди́нъ просла́вися.

Му́ченикомъ: Щито́мъ благоче́стія огра́ждшеся боже́ственніи страда́льцы, устреми́шася къ боре́нію, погуби́ша же врага́ всю́ си́лу, пою́ще пѣ́снь побѣ́дную Христу́, укрѣ́пльшему и́хъ.

Святи́телемъ: Упасо́сте, боже́ственніи па́стыріе, ста́до Бо́жіе на па́жити та́йнѣй, во́лки отгна́вше па́лицею слове́съ свяще́нныхъ, и всели́стеся, ра́дующеся, во огра́ду небе́сную, идѣ́же е́сть Вели́кій Па́стырь.

Преподо́бнымъ: Иже стра́сти поще́ніемъ и болѣ́зньми умертви́вше пло́ти Боже́ственнымъ манове́ніемъ, живете́ по сме́рти, преподо́бніи; на́съ ра́ди ме́ртва бы́вшаго, Христа́, всегда́ моли́те уще́дрити на́съ.

Сла́ва, [поко́инъ]: Ме́ртвъ бы́въ и ме́ртвымъ дарова́лъ еси́ Боже́ственный Тво́й живо́тъ и безсме́ртную жи́знь. Иже вѣ́рою преше́дшія отъ житія́ тлѣ́ннаго, Ца́рствія Твоего́ сотвори́ прича́стники, я́ко Благоутро́бенъ и еди́нъ Многоми́лостивъ.

[И ны́нѣ,] богоро́диченъ: Иже любо́вію Христо́вою уязвля́еми му́ченицы и вѣнча́вшіяся отъ Бо́га жены́, Тебе́, Всенепоро́чную и До́брую въ жена́хъ, вси́ преподо́бніи почита́ютъ, ра́дующеся вѣ́рно, я́ко Цари́цу Всечестну́ю.

Другíй кано́нъ усо́пшимъ, [пое́мъ его́ на ряду́, идѣ́же нѣ́сть Мине́и, или́ при возслѣ́дованіи усо́пшимъ надъ кутіе́ю,] его́же краегране́сіе: Вѣ́рою усо́пшимъ пе́рвую пѣ́снь приноша́ю. Гла́съ 1.
Пѣ́снь 1.

Ирмо́съ: Твоя́ побѣди́тельная десни́ца боголѣ́пно въ крѣ́пости просла́вися: та́ бо, Безсме́ртне, я́ко всемогу́щая, проти́вныя сотре́, изра́ильтяномъ пу́ть глубины́ новосодѣ́лавшая.

Припѣ́въ: Ди́венъ Бо́гъ во святы́хъ Свои́хъ, Бо́гъ Изра́илевъ.

Врата́ сме́рти и вереи́ Твое́ю сме́ртію сокруши́лъ еси́, Безсме́ртне, врата́ отве́рзи, Влады́ко, па́че ума́ безсме́ртія у́спшимъ моли́твами страстоте́рпецъ Твои́хъ.

Припѣ́въ: Упоко́й, Го́споди, ду́ши усо́пшихъ ра́бъ Твои́хъ.

Да Боже́ственнаго живота́ сподо́бимся, соше́лъ еси́ къ сме́рти, тоя́ же испрове́ргъ сокро́вища, на́съ отту́ду извле́клъ еси́; ны́нѣ же, Жизнода́вче, преста́вленныя упоко́й.

Сла́ва: Ты́ мое́ тлѣ́нное же и ме́ртвенное воспріи́мъ, въ нетлѣ́ніе обле́клъ еси́ и къ безконе́чному житію́ и блаже́нному возне́слъ еси́, идѣ́же, я́ко Ще́дръ, и́хже прія́лъ еси́, упоко́й.

[И нынѣ,] богоро́диченъ: Ро́ждшую Еже отъ Бо́га Бо́жіе Сло́во, вѣ́рніи, воспои́мъ, Та́ бо Всечи́стая пу́ть жи́зни уме́ршимъ бы́сть, Юже, я́ко Богопріе́мницу и Богоро́дицу, просла́вимъ.

Пѣ́снь 3.

Ирмо́съ: Да утверди́тся се́рдце мое́ въ во́ли Твое́й, Христе́ Бо́же, и́же надъ вода́ми не́бо утвержде́й второ́е и основа́вый на вода́хъ зе́млю, Всеси́льне.

Мно́гія му́ки претерпѣ́вше и благи́хъ мно́гихъ сподо́бистеся, мно́жество му́ченикъ свяще́нное, тѣ́мже моли́твами ва́шими зо́лъ мои́хъ безмѣ́рное мно́жество очи́стите.

Свяще́нніи, одѣ́явшеся пра́ведною благода́тію и весе́ліе кра́сное преподо́бныхъ собо́ръ стяжа́вше, невеще́ственнымъ служи́телемъ уподо́бишася.

Христо́вы проро́цы, боже́ственніи му́ченицы, свяще́нныхъ же́нъ сосло́віе, и́же пострада́вше му́жески и въ постѣ́ просла́вистеся, и́хже моли́твами ми́лости Твоя́, Спа́се, всѣ́мъ да́руй.

Сла́ва: Иже отъ земли́, Христе́, человѣ́ка руко́ю Твое́ю созда́въ во́лею, и я́же отъ на́съ вся́ вѣ́рою преста́вльшіяся рабы́ Твоя́ небе́сныхъ бла́гъ сподо́би.

[И ны́нѣ,] богоро́диченъ: Богороди́тельнице Неискусобра́чная, проше́нія всѣ́хъ принеси́ Содѣ́телю на́шему Бо́гу, ро́ждшемуся отъ утро́бы Твоея́, я́ко да обря́щемъ соверше́нное лю́тыхъ избавле́ніе.

Инъ.

Ирмо́съ: Еди́не Вѣ́дый человѣ́ческаго существа́ не́мощь и ми́лостивно въ не́ вообра́жся, препоя́ши мя́ съ высоты́ си́лою, е́же вопи́ти Тебѣ́, Святы́й: одушевле́нный хра́ме неизрече́нныя сла́вы Твоея́, Человѣколю́бче.

Яко еди́нъ Бла́гъ сы́й, я́ко еди́нъ Многоми́лостивъ, я́же благоче́стно къ Тебѣ́ отше́дшія, въ небе́сныхъ селе́ніихъ упоко́й, идѣ́же неизрече́нная ра́дость и наслажде́ніе, и идѣ́же собо́ръ му́ченическій весели́тся.

Ты́ Еди́нъ яви́лся еси́ на земли́, Спа́се мо́й, безгрѣ́шенъ, Иже грѣхи́ мíра взе́мляй, я́ко Милосе́рдъ, отъ мíра сего́ преста́вльшихся вѣ́рою ду́ши упоко́й во дво́рѣхъ святы́хъ Твои́хъ, въ сла́дости ра́йстѣй, Человѣколю́бче.

Сла́ва: Сме́рти держа́ву низло́жъ, живо́тъ неконча́емый всѣ́мъ вѣ́рнымъ источи́лъ еси́, Влады́ко; въ то́мъ у́бо учини́ благоче́стно отше́дшія, презира́я безмѣ́рная прегрѣше́нія и проща́я грѣхи́ и́хъ, Человѣколю́бче.

[И ны́нѣ,] богоро́диченъ: Безъ сѣ́мене зача́тъ, Чи́стая, Сло́во присносу́щное, пло́тски къ на́мъ прише́дшее, и сме́рти крѣ́пость разори́вшее, и ме́ртвымъ воскре́сеніе и жи́знь вѣ́чную Свои́мъ милосе́рдіемъ да́рующее.

Пѣ́снь 4.

Ирмо́съ: Услы́шахъ, Го́споди, слу́хъ Тво́й и убоя́хся, разумѣ́хъ дѣла́ Твоя́, — проро́къ глаго́лаше, — и просла́вихъ си́лу Твою́.

Претерпѣ́вше, му́ченицы, вся́кія ра́ны, нра́вомъ до́блественнымъ, я́коже овча́та непоро́чная Христу́ приведо́стеся, за всѣ́хъ закла́вшемуся Животу́.

Уста́ Боже́ственная бы́вше, святи́теліе, Бо́жіимъ Сло́вомъ науча́еми, ду́ши изба́виша отъ у́стъ льсти́ваго; и́хже благочестному́дреннѣ почита́емъ.

Крѣ́пцы Боже́ственнымъ Ду́хомъ бы́вше, отцы́ боже́ственніи, крѣ́пко побѣди́сте духо́въ лука́вствія, преподо́бніи, благода́тію.

Сла́ва: Умертви́вся, Животе́ на́шъ, во́лею на Дре́вѣ, и́же вѣ́рою преше́дшія живота́ сподо́би вѣ́чнаго, Человѣколю́бче.

[И ны́нѣ,] богоро́диченъ: Не отверго́шася Го́спода же́нскій ли́къ, стра́ждуще му́жески; и не побѣди́шася тѣле́сными сластьми́ святíи, споспѣ́шницу Тя́ иму́ще, Пречи́стая.

Инъ.

Ирмо́съ: Го́ру Тя́, благода́тію Бо́жіею приосѣне́нную, прозорли́выма Авваку́мъ усмотри́въ очи́ма, изъ Тебе́ изы́ти Изра́илеву провозглаша́ше Свято́му, во спасе́ніе на́ше и обновле́ніе.

Умертви́въ а́дъ непобѣди́мою Твое́ю си́лою, вмѣне́нъ бы́лъ еси́ въ ме́ртвыхъ, Еди́нъ сы́й свобо́дь, Христе́, ду́ши свободи́ благочести́выхъ и е́же въ не́мъ осужде́нія, святы́хъ му́ченикъ мольба́ми.

Иже всѣ́хъ Сы́й, я́ко Влады́ка, противодосто́йную, и́же отъ Ада́ма, Твоего́ заколе́нія изба́ву да́лъ еси́ и цѣ́ну. Тѣ́мже мо́лимся Твои́мъ щедро́тамъ: преста́вльшіяся упоко́й, согрѣше́ній подая́ оставле́ніе.

Сла́ва: Прія́лъ еси́, Спа́се мо́й, е́же во гро́бѣ положе́ніе, и я́же во гробѣ́хъ жи́ти осужде́нныя мертвецы́, я́ко Бо́гъ, воскреси́лъ еси́. Ны́нѣ же жи́зни присносу́щныя сподо́би преста́вленныя, я́ко еди́нъ Человѣколю́бецъ.

[И ны́нѣ,] богоро́диченъ: Спасе́ся ро́дъ человѣ́ческій Рождество́мъ Твои́мъ, Ты́ бо родила́ еси́ на́мъ Ѵпоста́сный Живо́тъ, сме́рти Потребле́ніе и къ жи́зни содѣ́ловающій Восхо́дъ, Богороди́тельнице Пренепоро́чная Влады́чице.

Пѣ́снь 5.

Ирмо́съ: Свѣ́тлый на́мъ возсія́й Свѣ́тъ Присносу́щный, у́тренюющимъ о судьба́хъ за́повѣдей Твои́хъ, Влады́ко Человѣколю́бче, Христе́, Бо́же на́шъ.

Вооружи́вшеся благоче́стіемъ, не уя́звлени яви́стеся, му́ченицы, борца́ стрѣла́ми и побѣдоно́сцы благода́тію бы́вше, вѣнцы́ получи́сте.

Пома́за ма́стію Боже́ственною Госпо́дь свяще́нники Своя́, упа́сшія въ преподо́біи вѣ́рныхъ мно́жества и наста́вльшія ко огра́дѣ небе́снѣй.

Священному́ченицы свяще́ннѣйшіи, преподо́бніи вси́, и́же Ду́ха уста́вы соблю́дше и Ца́рствію прича́стницы бы́вше, Боже́ственно прославля́етеся.

Сла́ва: Ихже ны́нѣ преста́вилъ еси́ повелѣ́ніемъ Твои́мъ, Влады́ко Го́споди, сподо́би Ца́рствія Твоего́ со святы́ми, вся́ презира́я и́мъ дре́вняя согрѣше́нія.

[И ны́нѣ,] богоро́диченъ: Иже посто́мъ и страда́ніемъ сла́ву обрѣ́тше небе́сную жены́, Пречи́стая, Тебе́ Предста́тельницу иму́ще, змíеву держа́ву разруши́ша.

Инъ.

Ирмо́съ: Просвѣти́вый сія́ніемъ прише́ствія Твоего́, Христе́, и освѣти́вый кресто́мъ Твои́мъ мíра концы́, сердца́ просвѣти́ свѣ́томъ Твоего́ богоразу́мія правосла́вно пою́щихъ Тя́.

Исцѣля́яй отъ я́да сме́ртнаго, сме́рть прія́тъ и сме́рти жа́ло притупи́лъ еси́; но Са́мъ упоко́й, и́хже прія́лъ еси́, Жизнода́вче, му́ченикъ мольба́ми.

Умерщвле́нія и тлѣ́нія человѣ́ки свободи́вый, ду́ши вѣ́рно преста́вленныхъ учини́ во дво́рѣхъ святы́хъ Твои́хъ, отню́дуже отбѣже́ вся́ка ско́рбь и весе́ліе водворя́ется.

Сла́ва: Ра́й у́бо съ Тобо́ю повѣ́шенному я́ко отве́рзлъ еси́, ны́нѣ пріими́ ду́ши, Влады́ко, къ Тебѣ́ вѣ́рою преста́вльшіяся, подая́ и́мъ въ Це́ркви пе́рвенецъ водвори́тися.

[И ны́нѣ,] богоро́диченъ: Избавля́ющи на Тя́ наде́жды держа́ву иму́щихъ, къ приста́нищу Боже́ственныя во́ли ти́хо наста́ви Ма́тернимъ Твои́мъ дерзнове́ніемъ къ Сы́ну Твоему́, Благослове́нная Всенепоро́чная.

Пѣ́снь 6.

Ирмо́съ: Проро́ка Іо́ну подража́я, вопію́: живо́тъ мо́й, Бла́же, свободи́ изъ тли́ и спаси́ мя, Спа́се мíра, зову́ща: сла́ва Тебѣ́.

Умерщвле́ни бы́вше ра́нъ мно́гихъ наведе́ньми, жи́знь и́стинную наслѣ́довасте вку́пѣ, моля́щеся спасти́ся всѣ́мъ на́мъ, святíи му́ченицы.

Денни́цы свѣтоза́рныя позна́ни бы́сте на земли́, благоче́стія свѣ́томъ озари́сте вѣ́рныя, пресла́вніи Христо́вы ору́жницы и святи́теліе прему́дріи.

Стра́нни яви́стеся на земли́ и гра́ждане небе́сніи, богоно́сніи по́стницы, умертви́вше пло́ти мудрова́нія воздержа́ніемъ и смире́ніемъ.

Сла́ва: Невече́рнему Твоему́ свѣ́ту и сла́дости и́стиннѣй, я́же преста́вилъ еси́ вѣ́рныя, покажи́ прича́стники, Человѣколю́бче, и святы́хъ собо́ромъ си́хъ сопричти́.

[И ны́нѣ,] богоро́диченъ: Иже пострада́вшія крѣ́пко и пости́вшіяся те́плѣ, Тобо́ю псало́мски во слѣ́дъ приведо́шася Христу́, Всепѣ́тая Богороди́тельнице, вся́ческихъ Царю́.

Инъ.

Ирмо́съ: Обы́де на́съ послѣ́дняя бе́здна, нѣ́сть избавля́яй, вмѣни́хомся, я́ко о́вцы заколе́нія, спаси́ лю́ди Твоя́, Бо́же на́шъ, Ты́ бо крѣ́пость немощству́ющихъ и исправле́ніе.

Яко Милосе́рдъ, преста́вленнымъ да́руй прегрѣше́ній проще́ніе и вѣ́чное наслажде́ніе подая́, идѣ́же сія́етъ лица́ Твоего́ свѣ́тлость и озаря́етъ страстоте́рпцы Твоя́.

Иже Кро́вію, отъ ре́бръ Твои́хъ исте́кшею, мíръ искупи́лъ еси́, вѣ́рою усо́пшія у́бо, Христе́, изба́ви честны́ми Страстьми́ Твои́ми, Ты́ бо цѣ́ну за всѣ́хъ Себе́ да́лъ еси́.

Иже Созда́вый мя́ рука́ма пречи́стыми пе́рвѣе и ду́хъ Дарова́вый, и къ земли́ низпа́дша злѣ́, па́ки Обнови́вый краснѣ́йше, ны́нѣ ду́ши преста́вльшихся Са́мъ упоко́й.

Сла́ва: Черто́гу Твоему́ свѣтоно́сному, Го́споди, всели́ти сподо́би, я́же въ вѣ́рѣ къ Тебѣ́ усо́пшія, тѣ́хъ презира́я прегрѣше́нія, я́ко Бла́гъ и Милосе́рдъ и Многоми́лостивъ.

[И ны́нѣ,] богоро́диченъ: Пое́мъ Тя́, Благослове́нная Чи́стая, Ея́же ра́ди на́мъ возсія́, су́щимъ во тмѣ́ и сѣ́ни сме́ртнѣй, Пра́вды незаходи́мое Со́лнце, Ты́ бо на́шего спасе́нія Хода́таица была́ еси́.

Пѣ́снь 7.

Ирмо́съ: Су́щимъ въ пещи́ отроко́мъ Твои́мъ, Спа́се, не прикосну́ся, ниже́ стужи́ о́гнь. Тогда́ тріе́ я́ко еди́нѣми усты́ поя́ху и благословля́ху, глаго́люще: благослове́нъ Бо́гъ оте́цъ на́шихъ.

Искуси́вшеся я́ко зла́то во огни́, му́ченицы, всѣ́ми му́ками, свѣтлѣ́йше вся́каго зла́та въ любви́ Боже́ственнѣй яви́шася и въ сокро́вищахъ небе́сныхъ сохране́ни бы́ша.

Яко свяще́нницы, я́ко Боже́ственніи слуги́ бы́вше вси́, святи́теліе свяще́нніи, принесо́сте Бо́гу же́ртвы безкро́вныя и лю́ди упа́сше, идѣ́же Вели́кій Па́стырь всели́стеся.

Не покори́вшеся страсте́мъ пло́ти, безстра́стіемъ, я́ко въ ри́зу та́йну, преподо́бніи обле́кшеся, сожи́теліе а́нгеломъ яви́шася. Ихже моли́твами, Христе́, изба́ви на́съ отъ искуше́ній.

Сла́ва: Идѣ́же пи́ща е́сть та́йная, идѣ́же сія́етъ свѣ́тъ лица́ Твоего́, Христе́, я́же отъ на́съ преста́вльшіяся въ вѣ́рѣ, Благода́телю, всели́, сла́вити благоче́стно Твою́ благосты́ню.

[И ны́нѣ,] богоро́диченъ: Тебе́, Всесвята́я Пречи́стая, святы́я жены́ иму́ще добро́ту, лику́ютъ со а́нгелы ра́достно и Бо́га Сло́ва сла́вятъ, ро́ждшагося пло́тію изъ Тебе́ за милосе́рдіе мно́гое.

Инъ.

Ирмо́съ: Тебе́, у́мную, Богоро́дице, пе́щь разсмотря́емъ, вѣ́рніи, я́коже бо о́троки спасе́ три́ Превозноси́мый, мíръ обнови́, во чре́вѣ Твое́мъ всецѣ́лъ, хва́льный отце́въ Бо́гъ и препросла́вленъ.

Сія́ніи пречи́стыя сла́вы Твоея́ озари́тися, Христе́, подава́й, отъ бу́ри мірскíя къ Тебѣ́ отше́дшимъ, и тѣ́хъ сподо́би съ му́ченики взыва́ти Тебѣ́: хвали́мый отце́въ Бо́же, благослове́нъ еси́.

Но́въ Ада́мъ вои́стинну бы́въ, Ада́мовъ Содѣ́телю, Иже кля́тву бо Ада́мову еди́нъ потреби́лъ еси́. Тѣ́мже мо́лимся Тебѣ́: преста́вленныя упоко́й въ сла́дости ра́йстѣй, Христе́, я́ко еди́нъ Милосе́рдъ.

Сла́ва: Иже на́шу есте́ственную не́мощь Еди́нъ свѣ́дый, я́ко Бо́гъ, Бла́гъ же и Ми́лостивъ, вся́, и́хже преста́вилъ еси́, идѣ́же свѣ́тъ незаходи́мый присѣща́етъ лица́ Твоего́, учини́, Христе́, хвали́мый отце́въ Бо́же и препросла́вленъ.

[И ны́нѣ,] богоро́диченъ: Зако́на сѣ́ни и дре́вняя гада́нія Твои́мъ преидо́ша Рождество́мъ, Богома́ти, Ты́ бо на́мъ Боже́ственныя благода́ти Свѣ́тъ возсія́ла еси́, Имже дре́внихъ изба́вихомся долго́въ, Чи́стая, воспѣва́юще Бо́га препросла́вленнаго.

Пѣ́снь 8.

Ирмо́съ: Его́же ужаса́ются а́нгели и вся́ во́инства, я́ко Творца́ и Го́спода, по́йте, свяще́нницы, просла́вите, о́троцы, благослови́те, лю́діе, и превозноси́те во вся́ вѣ́ки.

Льво́въ зія́нія преидо́ша невре́дно и коно́бовъ врѣ́нія претеко́ша крѣ́пко му́ченицы вси́, прохлажда́еми огне́мъ Боже́ственнаго Ду́ха пресла́вно.

Дая́ проро́комъ Свои́мъ предвѣ́дѣти да́льняя, и святи́тели Твоя́ умудри́лъ еси́ свяще́нно. Тѣ́хъ моли́твами, Христе́ Бо́же, просвѣти́ сердца́ вѣ́рно пою́щихъ Тя́.

Распе́нше себе́ преподо́бніи мíрови, живо́тъ премíрный наслѣ́довасте по́стницы, съ су́щими отъ вѣ́ка всѣ́хъ Бо́гу угоди́вшими преподо́бно и пра́ведно.

Сла́ва: Иже Созда́вый человѣ́ка отъ земли́ богодѣ́льно, я́же отъ земли́ преста́вилъ еси́ вѣ́рныя, я́ко Бла́гъ, пи́щи ра́йскія сподо́би, вся́ презира́я, я́же отъ ни́хъ содѣ́янная.

[И ны́нѣ,] богоро́диченъ: До́брую и непоро́чную, Чи́стая, въ жена́хъ, жены́ пострада́вшія зна́юще Тя́ я́вѣ, Дѣ́во, моли́твы творя́тъ съ Тобо́ю къ Бо́гу спасти́ся отъ бѣ́дъ рабо́мъ Твои́мъ.

Инъ.

Ирмо́съ: Въ пещи́ о́троцы Изра́илевы, я́коже въ горни́лѣ, добро́тою благоче́стія чистѣ́е зла́та блеща́хуся, глаго́люще: благослови́те, вся́ дѣла́ Госпо́дня, Го́спода, по́йте и превозноси́те во вся́ вѣ́ки.

Скве́рну всю́ Твои́хъ рабо́въ усо́пшихъ, Твоего́ человѣколю́бія росо́ю отмы́въ, Тя́ пѣ́сньми воспѣва́ти сподо́би: благослови́те, вся́ дѣла́ Госпо́дня, Го́спода, по́йте и превозноси́те Его́ во вся́ вѣ́ки.

Предстоя́тели, Спа́се, десны́я, вѣ́рою оправда́въ моли́твами страстоте́рпецъ, я́же преста́вилъ еси́ вѣ́рныя, покажи́ пою́щія: благослови́те, вся́ дѣла́ Госпо́дня, Го́спода, по́йте и превозноси́те Его́ во вся́ вѣ́ки.

Сла́ва: Иже сме́рти и живота́ Имѣ́яй вся́кую вла́сть, я́же вѣ́рою усо́пшія Твоего́ сія́нія улучи́ти благоволи́, взыва́ющія: благослови́те, вся́ дѣла́ Госпо́дня, Го́спода, по́йте и превозноси́те Его́ во вѣ́ки.

[И ны́нѣ,] богоро́диченъ: Спасе́нія Хода́таица на́мъ была́ еси́, Всенепоро́чная, и въ непреходи́мыя вѣ́ки пребыва́нія же и свѣ́тлости. Тебе́, Дѣ́во Чи́стая, при́сно вся́ дѣла́ благослови́мъ и превозно́симъ во вся́ вѣ́ки.

Та́же пѣ́снь Богоро́дицы: Вели́читъ душа́ Моя́ Го́спода... И про́чія стихи́ съ припѣ́вы.

Пѣ́снь 9.

Ирмо́съ: Живопріе́мный исто́чникъ приснотеку́щій, свѣтоно́сный свѣти́льникъ благода́ти, хра́мъ одушевле́нный, сѣ́нь пречи́стую, небесе́ и земли́ простра́ннѣйшую, Богоро́дицу, вѣ́рніи, велича́емъ.

Свяще́нныхъ му́ченикъ почти́мъ свяще́нная боре́нія ра́дующеся, страда́нія же, и ра́ны, пригвожде́нія, и изгна́нія, и заколе́ніе блаже́нное, и́мже Христу́ наслѣ́дницы яви́шася.

Яко свяще́нницы Бо́жіи, облеко́шася въ пра́вду Боже́ственніи уго́дницы, я́ко въ преподо́біи пожи́вше, и́же въ постѣ́ я́вѣ сконча́вшіися, ра́дуются, Христа́ велича́юще.

Уста́ Боже́ственная Госпо́дня бы́вше, проро́цы вси́, всѣ́мъ Его́ провозвѣсти́ша свѣ́тъ; съ ни́миже ны́нѣ веселя́тся и жены́, крѣ́пко подвиза́вшіяся и посто́мъ Бо́гу угоди́вшія.

Сла́ва: Иже всѣ́ми ца́рствующая Си́ло, Твоего́ Ца́рствія покажи́ прича́стники со святы́ми Твои́ми, я́же отъ земли́ преста́вилъ еси́, и я́же содѣ́янная и́ми, Бо́же всѣ́хъ, пре́зри премно́гою бла́гостію Твое́ю.

[И ны́нѣ,] богоро́диченъ: Яже Свѣ́тъ Ро́ждшая Боже́ственный, Безлѣ́тный, вся́ моя́ разрѣши́ лѣ́тная прегрѣше́нія Твои́ми мольба́ми и у́мъ мо́й просвѣти́, омрача́емый при́сно лѣ́ностію, да Тя́ пою́ и вѣ́рно велича́ю.

Инъ.

Ирмо́съ: Образъ чи́стаго рождества́ Твоего́ огнепали́мая купина́ показа́ неопа́льная; и ны́нѣ на на́съ напа́стей свирѣ́пѣющую угаси́ти, мо́лимся, пе́щь, да Тя́, Богоро́дице, непреста́нно велича́емъ.

Пощади́, я́ко Бо́гъ человѣколюби́въ и ми́лостивъ, Твое́ созда́ніе и упоко́й въ селе́ніихъ святы́хъ Твои́хъ, идѣ́же му́ченицы вси́ веселя́тся, вѣ́рою преста́вленыя отъ вре́менныхъ, Многоми́лостиве.

Имѣ́яй ми́лостей бе́здну, препобѣжда́ющую рабо́въ Твои́хъ прегрѣше́нія, и́хже пріе́мъ избра́, упоко́й въ нѣ́дрѣхъ Авраа́млихъ, Человѣколю́бче, и съ Ла́заремъ во свѣ́тъ Тво́й всели́.

Сла́ва: Изба́витель и Спа́съ бы́въ ро́ду человѣ́ческому распя́тія ра́ди, я́же ны́нѣ отъ на́съ преста́вилъ еси́, я́ко Благода́тель, наслажде́нія Боже́ственнаго сподо́би, и живота́ нетлѣ́ннаго, и весе́лія, и свѣ́тлости.

[И ны́нѣ,] богоро́диченъ: О, я́же па́че ума́ чуде́съ Твои́хъ! Ты́ бо, Дѣ́во, еди́на всѣ́мъ, и́же подъ со́лнцемъ, подала́ еси́ разумѣ́ти новѣ́йшее чу́до, Пречи́стая, Твоего́ рождества́ недоуме́ннаго. Тѣ́мже Тя́ вси́ велича́емъ.

Та́же: Досто́йно е́сть... И ектенія́, и свѣти́ленъ, и псалмы́ обы́чныя.

На хвали́техъ стихи́ры му́ченичны, гла́съ 1:

Страстоте́рпцы Христо́вы пріиди́те, лю́діе вси́, почти́мъ пѣ́ньми и пѣ́сньми духо́вными, просвѣ́щники мíра и проповѣ́дники вѣ́ры, исто́чники приснотеку́щія, отъ ни́хже истека́ютъ вѣ́рнымъ исцѣле́нія. Тѣ́хъ моли́твами, Христе́ Бо́же на́шъ, ми́ръ мíру Твоему́ да́руй и душа́мъ на́шимъ ве́лію ми́лость.

Сíи во́ини Царя́ Вели́каго проти́вишася повелѣ́ніемъ мучи́телевымъ, до́блественнѣ неради́ша о му́кахъ и ле́сть всю́ попра́вше, досто́йнѣ вѣнча́ни бы́ша. Про́сятъ отъ Спа́са ми́ра и душа́мъ на́шимъ ве́лія ми́лости.

Ва́съ, прехва́льніи му́ченицы, ни ско́рбь, ни тѣснота́, ни гла́дъ, ни гоне́ніе, ниже́ ра́ны, ни я́рость звѣре́й, ни ме́чь, ниже́ о́гнь претя́й разлучи́ти отъ Бо́га возмого́ша, любо́вію же па́че, я́же къ Нему́, я́ко въ чужди́хъ подви́гшеся тѣлесѣ́хъ, естество́ забы́вше и сме́рть презрѣ́сте. Тѣ́мже и досто́йно трудо́въ ва́шихъ мзду́ прія́ли есте́, небе́сному Ца́рствію наслѣ́дницы бы́вше, Христу́ моли́теся о душа́хъ на́шихъ.

Весели́теся, му́ченицы, о Го́сподѣ, я́ко по́двигомъ до́брымъ подвиза́стеся, и проти́вистеся царе́мъ, и мучи́тели побѣди́сте, огня́ и меча́ не устраши́стеся и звѣре́й ди́віихъ, снѣда́ющихъ тѣлеса́ ва́ша. Христу́ со а́нгелы пѣ́снь возсыла́юще, съ небесе́ вѣнцы́ прія́сте. Испроси́те дарова́ти ми́ръ мíру и душа́мъ на́шимъ ве́лію ми́лость.

Ме́ртвенъ: Дѣ́ломъ, Спа́се мо́й, явля́еши, я́ко Ты́ еси́ всѣ́хъ Воскре́сеніе, сло́вомъ, Сло́ве, Ла́заря отъ ме́ртвыхъ возста́вилъ еси́. Егда́ же ме́ртвіи отъ гробо́въ воскресо́ша и врата́ а́дова смято́шася, тогда́ человѣ́комъ сме́рть со́нъ явля́шеся. Но Иже на спасе́ніе Своего́ созда́нія, а не на осужде́ніе прише́дый, и́хже избра́лъ еси́, упоко́й, я́ко Человѣколю́бецъ.

Сла́ва, и ны́нѣ, богоро́диченъ:

Ра́дуйся отъ на́съ, Свята́я Богоро́дице Дѣ́во, чи́стый сосу́де всея́ вселе́нныя, свѣще́ неугаси́мая, вмѣсти́лище Невмѣсти́маго, хра́ме необори́мый; ра́дуйся, изъ Нея́же роди́ся Агнецъ Бо́жій, взе́мляй грѣхи́ всего́ мíра.

На стихо́внѣ стихи́ры поко́йны. Творе́ніе ки́ръ Ѳеофа́на, гла́съ 1. Подо́бенъ: Прехва́льніи му́ченицы.

Тебѣ́, Спа́се, мо́лимся:* Твоего́ сла́дкаго прича́стія* преста́вльшихся сподо́би,* и всели́ во оби́телехъ преподо́бныхъ* со святы́ми Твои́ми* и въ небе́сная жили́ща,* благоутро́біемъ Твои́мъ* презря́ беззако́нія* и подая́ си́мъ поко́й.

Сти́хъ: Блаже́ни, я́же избра́лъ и прія́лъ еси́, Го́споди.

Па́че ви́димыхъ Твоя́, Спа́се, обѣща́нія,* я́же о́ко не ви́дѣ, и у́хо не слы́ша,* и на се́рдце человѣ́ка никогда́же взы́де!* Мо́лимъ Тя́, Влады́ко,* сла́дкаго Твоего́ прича́стія* получи́ти сподо́би* къ Тебе́ преста́вльшіяся* и пода́ждь и́мъ вѣ́чную жи́знь.

Сти́хъ: Ду́ши и́хъ во благи́хъ водворя́тся.

О Крестѣ́ Твое́мъ веселя́щеся,* о Крестѣ́ Твое́мъ надѣ́ющеся раби́ Твои́,* къ Тебѣ́ преста́вишася, Человѣколю́бче.* Имже ны́нѣ избавле́ніе тѣ́хъ прегрѣше́ній* Кре́стъ Тво́й да́руй* и Кро́вь, пролія́нную за мірскíй живо́тъ,* благосе́рдіемъ Твои́мъ проща́я согрѣше́нія* и просвѣща́я свѣ́томъ лица́ Твоего́.

Сти́хъ: И па́мять и́хъ въ ро́дъ и ро́дъ.

Никто́же безгрѣ́шенъ, никто́же отъ человѣ́къ бы́въ, то́кмо Ты́, еди́не Безсме́ртне. Тѣ́мже рабы́ Твоя́, я́ко Бо́гъ Ще́дрый, во свѣ́тѣ со а́нгельскими ликостоя́ніи Твои́ми учини́ благоутро́біемъ Твои́мъ, презира́я беззако́нія и подая́ и́мъ проще́ніе.

Сла́ва, и ны́нѣ, богоро́диченъ:

Христа́ умоли́, Твое́ Рожде́ніе, Ма́ти Дѣ́во, согрѣше́ній проще́ніе дарова́ти рабо́мъ Твои́мъ, Тебе́ Богоро́дицу проповѣ́давшимъ вои́стинну и сло́вомъ благочести́вымъ благослови́вшимъ, и свѣ́тлости святы́хъ и весе́лія сподо́би во Ца́рствіи Твое́мъ.


ВЪ СУББОТУ, [НА ЛИТУРГІИ,]

Блаже́нны, гла́съ 1:

Снѣ́дію изведе́ изъ рая́ вра́гъ Ада́ма, Кресто́мъ же введе́ Христо́съ въ о́нь разбо́йника, — помяни́ мя́, Го́споди, — вопію́ща, — егда́ пріи́деши во Ца́рствіи Твое́мъ.

Сти́хъ: Блаже́ни изгна́ни пра́вды ра́ди, я́ко тѣ́хъ е́сть Ца́рство небе́сное.

Страда́лецъ мно́жество безчи́сленное, святи́телей, и прему́дрыхъ же́нъ, и проро́къ пресла́вныхъ мо́лятъ Тя́, Іису́се Бо́же: пода́ждь на́мъ оставле́ніе прегрѣше́ній и ве́лію ми́лость.

Сти́хъ: Блаже́ни есте́, егда́ поно́сятъ ва́мъ, и изжену́тъ, и реку́тъ всякъ зо́лъ глаго́лъ на вы́, лжу́ще Мене́ ра́ди.

Иже тече́ніе соверши́вше, свяще́ннѣйшіи Христо́вы страда́льцы, со святи́тели свяще́нными и проро́ки, сподо́бистеся во гра́дѣ небе́снѣмъ жи́ти, со а́нгелы веселя́щеся.

Сти́хъ: Ра́дуйтеся и весели́теся, я́ко мзда́ ва́ша мно́га на небесѣ́хъ.

Во свѣ́тѣ, Христе́, учини́ невече́рнѣмъ, я́же преста́вилъ еси́, прегрѣше́нія и́хъ презрѣ́въ, я́ко Ще́дрый Бо́гъ, да Твою́ сла́вимъ, Благода́телю, безчи́сленную ми́лость.

Сла́ва, [тро́иченъ]: Отцу́ поклони́мся, и Сы́на славосло́вимъ, и Пресвята́го Ду́ха, вси́ вѣ́рніи, воспои́мъ: помяни́ на́съ, зову́щихъ, Единосу́щная Тро́ице, Еди́нице Бо́же.

И ны́нѣ, [богоро́диченъ]: Яко пала́ту простра́нную, и престо́лъ сла́вы, и о́блакъ свѣ́телъ пѣсносло́вимъ Тя́, Чи́стая, и мо́лимъ: разори́ о́блакъ мра́чный отъ ду́шъ на́шихъ боже́ственными моли́твами Твои́ми.

Коне́цъ пе́рвому гла́су.

Источникъ: Окто́ихъ, си́рѣчь Осмогла́сникъ, съ 1-го гла́са по 4-й. — Тисне́ніе 4-е. — М.: Сѵнода́льная Тѵпогра́фія, 1898. — Л. 87 об. – 98.

О святѣмъ, имущемъ поліелей // Къ оглавленію Октоиха // Воскресная служба 2-го гласа


Наверхъ / Къ титульной страницѣ

0



«Слава Россіи»
Малый герб Российской империи
Помощь Порталу
Просимъ Васъ поддержать нашъ Порталъ
© 2004-2019 г.