Церковный календарь
Новости


2019-07-23 / russportal
Ген. А. И. Деникинъ. «Очерки Русской Смуты». Томъ 1-й. Глава 34-я (1921)
2019-07-23 / russportal
Ген. А. И. Деникинъ. «Очерки Русской Смуты». Томъ 1-й. Глава 33-я (1921)
2019-07-22 / russportal
Ген. П. Н. Красновъ. "Отъ Двуглаваго Орла..." Томъ III-й, Ч. 6-я, Гл. 34-я (1922)
2019-07-22 / russportal
Ген. П. Н. Красновъ. "Отъ Двуглаваго Орла..." Томъ III-й, Ч. 6-я, Гл. 33-я (1922)
2019-07-22 / russportal
Ген. П. Н. Красновъ. "Отъ Двуглаваго Орла..." Томъ III-й, Ч. 6-я, Гл. 32-я (1922)
2019-07-22 / russportal
Ген. П. Н. Красновъ. "Отъ Двуглаваго Орла..." Томъ III-й, Ч. 6-я, Гл. 31-я (1922)
2019-07-22 / russportal
И. А. Ильинъ. "Наши задачи". Томъ 1-й. Статья 76-я (1956)
2019-07-22 / russportal
И. А. Ильинъ. "Наши задачи". Томъ 1-й. Статья 75-я (1956)
2019-07-22 / russportal
И. А. Ильинъ. "Наши задачи". Томъ 1-й. Статья 74-я (1956)
2019-07-22 / russportal
И. А. Ильинъ. "Наши задачи". Томъ 1-й. Статья 73-я (1956)
2019-07-22 / russportal
Ген. А. И. Деникинъ. «Очерки Русской Смуты». Томъ 1-й. Глава 32-я (1921)
2019-07-22 / russportal
Ген. А. И. Деникинъ. «Очерки Русской Смуты». Томъ 1-й. Глава 31-я (1921)
2019-07-21 / russportal
Ген. П. Н. Красновъ. "Отъ Двуглаваго Орла..." Томъ III-й, Ч. 6-я, Гл. 30-я (1922)
2019-07-21 / russportal
Ген. П. Н. Красновъ. "Отъ Двуглаваго Орла..." Томъ III-й, Ч. 6-я, Гл. 29-я (1922)
2019-07-21 / russportal
Ген. П. Н. Красновъ. "Отъ Двуглаваго Орла..." Томъ III-й, Ч. 6-я, Гл. 28-я (1922)
2019-07-21 / russportal
Ген. П. Н. Красновъ. "Отъ Двуглаваго Орла..." Томъ III-й, Ч. 6-я, Гл. 27-я (1922)
Новости въ видѣ
RSS-канала: .
Сегодня - вторникъ, 23 iюля 2019 г. Сейчасъ на порталѣ посѣтителей - 16.
Церковно-богослужебныя книги

МИНІА ДОПОЛНИТЕЛЬНАЯ.
(СПб: Сѵнода́льная Тѵпогра́фія, 1909).

Мѣ́сяца Іаннуа́рія въ 28-й де́нь.
Слу́жба преподо́бному отцу́ на́шему Ѳеодо́сію, То́темскому чудотво́рцу.

Твори́мъ бдѣ́ніе, идѣ́же почива́ютъ мо́щи его́, или́ идѣ́же е́сть хра́мъ его́.

НА МАЛѢЙ ВЕЧЕРНИ,
[На Го́споди, воззва́хъ...] стихи́ры на 4, гла́съ 1. Подо́бенъ: Небе́сныхъ чино́въ ра́дованіе.

Небе́сная возжелѣ́лъ еси́ ви́дѣти,* до́лу влеку́щая презрѣ́лъ еси́,* тве́рдымъ смы́сломъ чистоту́ соблю́дъ.* Не пре́зри у́бо на́съ, къ ра́цѣ твое́й прибѣга́ющихъ,* тя́ бо къ Бо́гу и́мамы хода́тая* и моли́твенника о душа́хъ на́шихъ. [Два́жды.]

Непреста́ннымъ раче́ніемъ влеко́мь* къ го́рнимъ добро́тамъ Царя́ Христа́,* сле́зными струя́ми и всено́щными бдѣ́ніи* злостра́стія те́рніе искорени́лъ еси́* и, я́коже кри́нъ, Дави́дски процвѣ́лъ еси́,* богоблаже́нне о́тче Ѳеодо́сіе.

Яви́ся на́мъ исто́чникъ спасе́нія* и рѣка́ цѣльбоно́сныхъ во́дъ* гро́бъ преподо́бнаго Ѳеодо́сія,* струи́ исцѣле́ній излива́я,* пріиди́те, почерпе́мъ усе́рдно вси́* злолю́тыхъ всѣ́хъ избавле́ніе.

Сла́ва, гла́съ 6:

Пріиди́те, вси́ вѣ́рніи, духо́вно торжеству́йте, пріиди́те и ви́дите, е́же ны́нѣ яви́ся отъ веще́ственного сосу́да, невеще́ственную благода́ть, отъ гро́ба богому́драго Ѳеодо́сія кипя́щую, къ нему́же съ весе́ліемъ возопіи́мъ, глаго́люще: о всеблаже́нне, Христа́ моли́ непреста́нно спасти́ся душа́мъ на́шимъ.

И ны́нѣ, богоро́диченъ:

Богоро́дице, Ты́ еси́ лоза́ и́стинная, [возрасти́вшая на́мъ Пло́дъ живота́, Тебѣ́ мо́лимся: моли́ся, Влады́чице, со святы́ми апо́столы поми́ловати ду́ши на́ша.]

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.

Две́ри небе́сныя* воспрія́ша по́стника,* пустыннолю́бную го́рлицу,* свѣ́тло сія́ющую чуде́съ зарю́,* Ѳеодо́сія богому́драго.

Сти́хъ: Честна́ предъ Го́сподемъ* сме́рть преподо́бныхъ Его́.

Ду́ха Свята́го* озаре́нъ благода́тію,* гра́дъ оте́чества земна́го оста́вилъ еси́,* пресѣ́льникъ яви́лся еси́, о́тче,* и ны́нѣ въ вы́шнихъ Влады́цѣ предстои́ши.

Сти́хъ: Блаже́нъ му́жъ, боя́йся Го́спода,* въ за́повѣдехъ Его́ восхо́щетъ зѣло́.

Небе́снаго граждани́на,* земна́го а́нгела,* мо́лимъ тя́, о́тче Ѳеодо́сіе,* испроси́ у Христа́ Бо́га* спасе́ніе душа́мъ на́шимъ.

Сла́ва, гла́съ 8:

Преподо́бне о́тче, орга́нъ бы́лъ еси́ Пресвята́го Ду́ха, по́стническими по́двиги пло́ть покори́лъ еси́ ду́хови, тѣ́мже и чуде́съ дарова́ніе воспрія́лъ еси́, богому́дре Ѳеодо́сіе. И ны́нѣ со а́нгелы ликовству́еши у Христа́ Бо́га и Спа́са ду́шъ на́шихъ.

И ны́нѣ, богоро́диченъ:

Влады́чице, пріими́ [моли́твы ра́бъ Свои́хъ и изба́ви на́съ отъ вся́кія ну́жды и печа́ли].

Тропа́рь, гла́съ 1:

Отъ ю́ности, преподо́бне Ѳеодо́сіе, жела́ніе свое́ ко Христу́ Бо́гу впери́въ, Его́же ра́ди гра́дъ и оте́чество оста́вль и сла́ву су́етную, я́ко пра́хъ, вмѣни́въ, послѣ́довалъ еси́ преподо́бному Дими́трію и оби́тели его́ сожи́тель бы́лъ еси́, пресели́вся ко гра́ду То́тьмѣ и въ междорѣ́чіе всели́вся, посто́мъ и бдѣ́ніемъ, и власяны́мъ одѣя́ніемъ, и вери́гами тѣ́ло свое́ удручи́лъ еси́. Сего́ ра́ди Бо́гъ, ви́дѣвъ твоя́ труды́, и по преставле́ніи чудесы́ обогати́ тя́: бѣ́сы изгоня́еши и слѣпы́я просвѣща́еши, отъ вся́кихъ неду́гъ и бѣ́дъ избавля́еши приходя́щихъ къ тебѣ́ съ вѣ́рою и вопію́щія: сла́ва Да́вшему ти́ крѣ́пость, сла́ва Вѣнча́вшему тя́, сла́ва Даю́щему тобо́ю всѣ́мъ исцѣле́ніе.

Инъ тропа́рь, гла́съ 2:

Отъ мірска́го мяте́жа изше́дъ, преподо́бне о́тче на́шъ Ѳеодо́сіе, и въ ти́хое приста́нище дости́гъ, преподо́бному Дими́трію сожи́тель бы́лъ еси́, и отту́ду, Бо́жіимъ Ду́хомъ направля́емъ, во гра́дъ То́тьму пересели́лся еси́, и во ото́цѣхъ водны́хъ оби́тель себѣ́ воздви́глъ еси́, идѣ́же равноа́нгельное житіе́ пожи́въ, послѣ́довалъ еси́ Христу́, Его́же ра́ди влася́ну ри́зу и вери́ги на тѣ́лѣ свое́мъ носи́лъ еси́. Смире́ніемъ и нищелю́біемъ украси́вся, сла́ву су́етную презрѣ́лъ еси́ и оте́ческое имѣ́ніе до́брѣ расточи́лъ еси́, моле́ніемъ къ Бо́гу и сле́зными струя́ми бѣсо́въ посрами́лъ еси́, тѣ́мже по сме́рти Христо́съ чуде́съ да́ромъ обогати́ тя́. Имѣ́я у́бо дерзнове́ніе ко Го́споду, преподо́бне о́тче на́шъ Ѳеодо́сіе, моли́ Христа́ Бо́га, да спасе́тъ ду́ши на́ша.

Сла́ва, и ны́нѣ, богоро́диченъ 2-го гла́са:

[О, чудесе́ но́ваго, всѣ́хъ дре́внихъ чуде́съ! Кто́ бо позна́ Ма́терь, безъ му́жа ро́ждшую и на руку́ нося́щую всю́ тва́рь Содержа́щаго? Бо́жіе е́сть изволе́ніе Ро́ждшееся. Его́же я́ко Младе́нца, Пречи́стая, Твои́ма рука́ма носи́вшая, и ма́тернее дерзнове́ніе къ Нему́ иму́щая, не преста́й моля́щи о чту́щихъ Тя́, уще́дрити и спасти́ ду́ши на́ша.]


НА ВЕЛИЦѢЙ ВЕЧЕРНИ,
Блаже́нъ му́жъ.., 1-й антифо́нъ. На Го́споди воззва́хъ... поста́вимъ стихо́въ 8 и пое́мъ стихи́ры, гла́съ 4. Подо́бенъ: Зва́нный свы́ше.

Преподо́бне о́тче,* мяте́жъ мірскíй оста́вивъ* и кре́стъ сво́й взе́мъ,* послѣ́довалъ еси́ на́съ ра́ди распе́ншемуся Христу́,* посто́мъ и жа́ждею* плотскíя стра́сти умертви́лъ еси́,* грѣхо́вное же те́рніе* всено́щными по́двиги искорени́лъ еси́,* сле́зными исто́чники напои́лъ еси́ ни́ву души́ твоея́,* воздѣ́лавъ пло́дъ стори́чный.* И ны́нѣ предстои́ши всѣ́хъ Царю́,* Его́же моли́* спасти́ и просвѣти́ти ду́ши на́ша. [Два́жды.]

Преподо́бне о́тче,* ю́ностная взыгра́нія покори́въ ду́хови,* яви́лся еси́ на́мъ безме́здный вра́чь,* многоразли́чныя неду́ги исцѣля́яй къ ра́цѣ твое́й притека́ющихъ,* небовосхо́дная добродѣ́телей лѣ́стница,* по не́йже восте́клъ еси́ къ воспрія́тію трудо́въ по́чести,* къ жела́емому Христу́,* Его́же моли́* спасти́ и просвѣти́ти ду́ши на́ша.

Преподо́бне о́тче Ѳеодо́сіе,* кто́ исповѣ́сть труды́ твоя́,* бдѣ́ніе же и сухояде́ніе,* и е́же на земли́ лега́ніе,* и пусты́нное озлобле́ніе?* Безстра́стія сосу́дъ бы́лъ еси́,* благода́ти испо́лненъ Свята́го Ду́ха,* а́нгеломъ собесѣ́дниче* и преподо́бнымъ сожи́телю,* Вседержи́телю Бо́гу возложи́лъ еси́ себе́,* Его́же моли́* спасти́ и просвѣти́ти ду́ши на́ша.

Ины стихи́ры, гла́съ то́йже. Подо́бенъ: Яко до́бля.

Яко свѣти́ло, просія́лъ еси́* по́двиги и терпѣ́ніемъ,* яви́вся благоче́стія тве́рдое основа́ніе* и стѣна́ незы́блема гра́ду на́шему,* міротлѣ́нную красоту́ презрѣ́лъ еси́* любве́ ра́ди Вседержи́теля Бо́га,* Его́же о на́съ моли́, усе́рдно творя́щихъ* всечестну́ю па́мять твою́. [Два́жды.]

Яко непобѣди́мый ратобо́рецъ,* богому́дре Ѳеодо́сіе,* ору́жіемъ кре́стнымъ* побѣди́лъ еси́ вра́жія полки́,* вмѣ́сто мя́гкихъ ри́зъ* вери́гами стягну́въ тѣ́ло твое́,* и воспрія́лъ еси́ отъ Бо́га безконе́чное блаже́нство,* Его́же моли́* о чту́щихъ твое́ честно́е успе́ніе.

Яко на ка́мени вѣ́ры* утверди́въ себе́, Ѳеодо́сіе,* ника́коже поколеба́лся еси́* жите́йскими прило́ги,* власяни́цею тѣ́ло твое́ одѣ́явъ,* обнажи́лъ еси́ кова́рство* дре́вле въ раи́ предобнажи́вшаго,* и, во свѣ́тѣ невече́рнѣмъ веселя́ся,* помина́й тя́ воспѣва́ющихъ.

Сла́ва, гла́съ 6:

Возсія́ на́мъ пресвѣ́тлое торжество́ цѣлому́дрія стяжа́теля, соше́дшеся у́бо, пѣ́сненными похвала́ми досто́йно сего́ ублажи́мъ, глаго́люще: ра́дуйся, по́стникомъ наслѣ́дниче и печа́ть извѣ́стная; ра́дуйся, свѣти́льниче пресвѣ́тлый, чудесы́ многоразли́чными притека́ющія озаря́яй; ра́дуйся, скорбя́щихъ утѣше́ніе и въ бѣда́хъ су́щимъ те́плый засту́пниче. И ны́нѣ, богому́дре Ѳеодо́сіе, не преста́й моля́ся о чту́щихъ вѣ́рно па́мять твою́.

И ны́нѣ, богоро́диченъ, [гла́съ то́йже]:

Кто́ Тебѣ́ не ублажи́тъ, [Пресвята́я Дѣ́во? Кто́ ли не воспое́тъ Твоего́ Пречи́стаго Рождества́? Безлѣ́тно бо отъ Отца́ возсія́вый Сы́нъ Единоро́дный, То́йже отъ Тебе́, Чи́стыя, про́йде, неизрече́нно вопло́щся: естество́мъ Бо́гъ Сы́й и естество́мъ бы́въ Человѣ́къ на́съ ра́ди; не во двою́ лицу́ раздѣля́емый, но во двою́ естеству́ несли́тно познава́емый. Того́ моли́, Чи́стая Всеблаже́нная, поми́ловатися душа́мъ на́шимъ].

Вхо́дъ. Проки́менъ дне́ и чте́нія три́ [пи́саны въ се́й кни́зѣ на оборо́тѣ листа́ 12-го].

[Прему́дрости Соломо́новы чте́ніе. [Глава́ 3.]

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́новы чте́ніе. [Глава́ 5 и 6.]

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

Прему́дрости Соломо́новы чте́ніе. [Глава́ 4.]

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.]

На литíи стихи́ра хра́ма и свята́го стихи́ры самогла́сны, гла́съ 1:

По́стника и́стиннаго почти́мъ дне́сь, съ весе́ліемъ ше́ствовавша по стопа́мъ Влады́чнимъ, во пло́ти безпло́тныя враги́ побѣди́вшаго. Да ликовству́ютъ у́бо вси́ благоче́стно, изря́днѣе же со́бранное и́мъ честно́е ста́до. Тѣ́мже, соше́дшеся въ па́мять его́, воспое́мъ Христа́ Бо́га на́шего, да пода́стъ на́мъ моли́твами его́ ми́ръ и ве́лію ми́лость.

Гла́съ 2:

Яви́лся еси́ дѣ́латель милосе́рдаго Влады́ки, Иже и во единонадеся́тый ча́съ прише́дшія и дѣ́лавшія отъ пе́рваго часа́ дѣ́лавшимъ уподобля́етъ; ты́ же, вся́ дни́ житія́ твоего́ недрема́нно дѣ́тели духо́вныя соверша́я и въ послѣ́днее вре́мя по́стническія по́двиги обновля́я, къ неизрече́ннѣй ра́дости дости́глъ еси́, возду́шная мыта́рства прелетѣ́въ. Моли́ у́бо спасти́ся душа́мъ на́шимъ.

Вѣ́чная въ вы́шнихъ взыска́лъ еси́, до́лу же влеку́щая вся́ оста́вилъ еси́, кре́стною па́лицею стра́стное житія́ мо́ре пресѣ́клъ еси́, мы́сленнаго же фарао́на погрузи́лъ еси́; дѣ́тельми, я́ко заря́ми, облиста́еши, хра́му у́бо, въ не́мже лежа́тъ честны́я мо́щи твоя́, я́ко ца́рскую у́тварь, иму́щу, гра́ду же, я́ко трубѣ́, велегла́сно вопію́щу и хва́лящуся неисчерпа́емымъ исто́чникомъ чуде́съ и моли́твенникомъ о душа́хъ на́шихъ.

Сла́ва, гла́съ 5:

Воспои́мъ согла́сно въ пѣ́снехъ духо́вною цѣвни́цею преблаже́ннаго Ѳеодо́сія, свѣ́тлость благоче́стія, любве́ Христо́вы дѣ́лателя усе́рднаго, рѣку́ незави́стну смире́нія, чистоты́ сокро́вище, пра́вило воздержа́нія, сто́лпъ терпѣ́нія, Ду́ха Боже́ственнаго си́лою злоко́зненнаго лестца́ побѣди́вшаго, ни́щимъ утѣше́ніе, боля́щимъ исцѣле́ніе, стра́ннымъ пріе́мника, гра́ду на́шему засту́пника. Тѣ́мже, похваля́юще его́, вси́ та́ко рце́мъ: въ вы́шнихъ всѣ́хъ Влады́цѣ предстоя́, Ѳеодо́сіе, предста́ни, о́тче, чту́щимъ тя́ всегда́ и спаси́ ста́до твое́ моли́твами твои́ми.

И ны́нѣ, [пра́здника], гла́съ то́йже:

Ве́тхій де́ньми, младе́нствовавъ пло́тію, Ма́терію Дѣ́вою въ це́рковь прино́сится, Своего́ зако́на исполня́я обѣща́ніе, Его́же Симео́нъ пріи́мъ, глаго́лаше: ны́нѣ отпуща́еши съ ми́ромъ, по глаго́лу Твоему́, раба́ Твоего́, ви́дѣша бо о́чи мои́ спасе́ніе Твое́, Святы́й.

На стихо́внѣ стихи́ры, гла́съ 2. Подо́бенъ: Егда́ отъ Дре́ва.

Егда́ распали́ тя́, богому́дре,* Боже́ственное жела́ніе,* преоби́дѣлъ еси́ пло́ти мудрова́ніе,* невозвра́тно послѣ́дуя Христу́,* тѣ́ло твое́ удручи́лъ еси́ бдѣ́ніемъ,* омыва́я ду́шу сле́зъ тече́ньми,* сокруши́лъ еси́ бѣсо́вская стремле́нія* и, я́коже зла́то горни́ломъ,* очи́стивъ себе́ добродѣ́тельми,* ра́дуяся, взыва́еши:* сла́ва, Человѣколю́бче, Твоему́ снизхожде́нію.

Сти́хъ: Честна́ предъ Го́сподемъ* сме́рть преподо́бныхъ Его́.

Егда́ основа́ніе крѣ́пко* положи́лъ еси́ въ души́ твое́й, о́тче,* тогда́ Авраа́мле стяжа́въ удобре́ніе,* гра́дъ оте́чества оста́вилъ еси́* и по пло́ти сро́дники* и, вся́ во уме́ты вмѣни́въ,* я́ко пресе́льникъ, уедини́лся еси́ въ междорѣ́чіи,* еди́нъ Еди́ному рабо́тая Христу́,* немо́лчнымъ славосло́віемъ ра́дуяся и вопія́:* сла́ва, Человѣколю́бче, Твоему́ смотре́нію.

Сти́хъ: Блаже́нъ му́жъ, боя́йся Го́спода,* въ за́повѣдехъ Его́ восхо́щетъ зѣло́.

Егда́ преставле́нія твоего́ къ Бо́гу вре́мя приспѣ́,* тогда́ непоро́чная твоя́ душа́* непреткнове́нно отъ возду́шныхъ мыта́рствъ,* я́ко небопа́рный оре́лъ,* крило́ма добродѣ́телей на высоту́ востече́,* и ра́дости избра́нныхъ сподо́бися,* и та́мо съ серафи́мы Го́сподеви вопіе́тъ:* сла́ва, Человѣколю́бче, Твоему́ смотре́нію.

Сла́ва, гла́съ то́йже:

Благода́ть Боже́ственная созыва́етъ на́съ къ похвале́нію Спа́сова и́стиннаго рачи́теля, се́й бо, ду́шу и тѣ́ло очи́стивъ отъ страсте́й, Пресвято́му Ду́ху яви́ся прекра́сное селе́ніе, а́нгельскимъ чино́мъ присовокупи́ся, и́хже житію́ на земли́ поревнова́, сего́ ра́ди со дерзнове́ніемъ предстои́тъ Святѣ́й Тро́ицѣ и мо́литъ спасти́ся душа́мъ на́шимъ.

И ны́нѣ, богоро́диченъ, [гла́съ то́йже]:

О, чудесе́ но́ваго, [всѣ́хъ дре́внихъ чуде́съ! Кто́ бо позна́ Ма́терь, безъ му́жа ро́ждшую и на руку́ нося́щую всю́ тва́рь Содержа́щаго? Бо́жіе е́сть изволе́ніе Ро́ждшееся. Его́же я́ко Младе́нца, Пречи́стая, Твои́ма рука́ма носи́вшая, и ма́тернее дерзнове́ніе къ Нему́ иму́щая, не преста́й моля́щи о чту́щихъ Тя́, уще́дрити и спасти́ ду́ши на́ша].

На благослове́ніи хлѣ́бовъ: Тропа́рь преподо́бнаго, два́жды. [Пи́санъ на ма́лѣй вече́рни.] И Богоро́дице Дѣ́во.., еди́ножды.


НА УТРЕНИ,
На Бо́гъ Госпо́дь: Тропа́рь преподо́бнаго. Сла́ва, и́нъ тропа́рь. И ны́нѣ, богоро́диченъ втора́го гла́са.

По 1-й стихоло́гіи сѣда́ленъ, гла́съ 8. Подо́бенъ: Прему́дрости Сло́ва.

Воздержа́нія крѣ́постію изобрази́лъ еси́ зако́нная велѣ́нія не на дсцѣ́, но на скрижа́лехъ се́рдца: свое́ю во́лею, о́тче Ѳеодо́сіе, а́ки ко кресту́, пригвозди́въ себе́, претерпѣ́лъ еси́ жесто́кое одѣя́ніе и пусты́нное озлобле́ніе, неви́димыя же враги́ побѣди́лъ еси́ му́жески. Тѣ́мже успе́ніе твое́ пра́зднуемъ и вѣ́рно пѣ́сньми восхваля́емъ. [Два́жды.]

Сла́ва, и ны́нѣ, богоро́диченъ:

Возбра́нной воево́дѣ и засту́пницѣ на́шей, къ Тебѣ́ прибѣга́емъ, Пречи́стая Богоро́дице: возбрани́, Чи́стая, плѣну́ющу на́съ діа́волу и вводя́щу въ стра́сти безче́стія. Тѣ́мже припа́даемъ ко Твоему́ пречестно́му о́бразу, прося́ще изба́витися вся́кія му́ки и огня́ вѣ́чнаго. Заступи́ на́съ, Ма́ти Христа́, Царя́ Небе́снаго, да зове́мъ Ти́: ра́дуйся, Невѣ́сто неневѣ́стная.

По 2-й стихоло́гіи сѣда́ленъ, гла́съ 4. Подо́бенъ: Ско́ро предвари́.

Притеце́мъ усе́рдно ко гро́бу моще́й преподо́бнаго Ѳеодо́сія и почерпе́мъ сугу́бую благода́ть, душа́мъ спасе́ніе и тѣлесе́мъ здра́віе, восхваля́юще Христа́ Бо́га на́шего, Иже Своего́ уго́дника просла́ви и да́ромъ чуде́съ обогати́, па́мять же преподо́бнаго святу́ю почита́юще. [Два́жды.]

Сла́ва, и ны́нѣ, богоро́диченъ:

Умъ человѣ́ческій по достоя́нію пѣ́ти Тя́, Влады́чице Пречи́стая Богоро́дице, недоумѣ́етъ. Но мы́ зове́мъ Ти́, я́коже арха́нгелъ Гавріи́лъ провѣща́: ра́дуйся, Ада́мово свобожде́ніе; ра́дуйся, прама́тере Евы оправда́ніе; ра́дуйся, мíру спасе́ніе; ра́дуйся, Ма́ти Христа́ Бо́га.

[Велича́ніе:

Ублажа́емъ тя́, преподо́бне о́тче Ѳеодо́сіе, и чте́мъ святу́ю па́мять твою́, наста́вниче мона́ховъ и собесѣ́дниче а́нгеловъ.

Псало́мъ избра́нный: Терпя́ потерпѣ́хъ Го́спода, и вня́тъ ми́ и услы́ша моли́тву мою́...]

По поліеле́и сѣда́ленъ, гла́съ 8. Подо́бенъ: Прему́дрости на пе́рси возле́гъ.

Весели́ся, гра́де Во́логда, воспита́вый въ по́стницѣхъ просія́вшаго, о́трасль благу́ю; красу́йся, гра́де, при не́мже обита́ преподо́бный, и лику́й, междорѣ́чіе, я́ко имѣ́я въ себѣ́ сожи́тельствующа богому́драго Ѳеодо́сія, ра́ку же моще́й его́, точа́щу исцѣле́нія и бѣсо́вскія полки́ прогоня́ющу. Сего́ ра́ди вси́ просла́вимъ Христа́ Бо́га на́шего: о Влады́ко! Ве́ліе милосе́рдіе Твое́, я́ко прояви́лъ еси́ на́мъ вели́ка чуде́съ дарова́теля, земли́ Россíйстѣй украше́ніе и моля́щася изба́витися на́мъ отъ вся́кихъ лю́тыхъ обстоя́ній. [Два́жды.]

Сла́ва, и ны́нѣ, богоро́диченъ:

О Тебѣ́ ра́дуется, Благода́тная, вся́кая тва́рь, а́нгельскій собо́ръ и человѣ́ческій ро́дъ, освяще́нный хра́ме и раю́ слове́сный, дѣ́вственная похвало́, изъ Нея́же Бо́гъ воплоти́ся и Младе́нецъ бы́сть, пре́жде вѣ́къ сы́й Бо́гъ на́шъ, ложесна́ бо Твоя́ престо́лъ сотвори́ и чре́во Твое́ простра́ннѣе небе́съ содѣ́ла. О Тебѣ́ ра́дуется, Благода́тная, вся́кая тва́рь, сла́ва Тебѣ́.

Степе́нна, 1-й антифо́нъ 4-го гла́са. Проки́менъ, гласъ 4: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми́? Вся́кое дыха́ніе... Ева́нгеліе отъ Матѳе́я, зача́ло 43.

По 50-мъ псалмѣ́ стихи́ра, гла́съ 6:

Дне́сь свѣ́тло торжеству́етъ Це́рковь Твоя́, Го́споди, я́ко багряни́цею многоцѣ́нною, крася́щися неистощи́мымъ сокро́вищемъ моще́й богому́драго Ѳеодо́сія, и, я́ко ца́рскимъ ски́петромъ, хва́лящися, вопіе́тъ: сицева́ моя́ рожде́нія, таковíи мои́ сы́нове, и́хже породи́хъ креще́ніемъ, воспита́хъ же стра́хомъ Госпо́днимъ, ны́нѣ ви́жду и́стиннѣ вѣне́чника избра́ннаго, да мо́лится ко Го́споду о вселе́ннѣй, о ца́рствующихъ градѣ́хъ, и о христолюби́вомъ на́шемъ ИМПЕРАТОРѢ, и о чту́щихъ вѣ́рно честну́ю па́мять преподо́бнаго.

Кано́нъ Богоро́дицы на 6 и преподо́бнаго два́ кано́на на 8.

Кано́нъ преподо́бному Ѳеодо́сію пе́рвый, гла́съ 8:
Пѣ́снь 1.

Ирмо́съ: Пои́мъ Го́сподеви, прове́дшему лю́ди Своя́ сквозѣ́ Чермно́е мо́ре, я́ко Еди́нъ сла́вно просла́вися.

Озари́, Христе́ Бо́же Превѣ́чный, Свѣ́те отъ Свѣ́та, омраче́ннаго мя́, да богому́драго пою́ Ѳеодо́сія.

Свѣ́та сподо́би, о́тче, прине́сшаго тебѣ́ пѣ́ніе невече́рняго улучи́ти, въ не́мже лику́еши.

Любве́ Боже́ственныя теплото́ю разже́гся, преподо́бне, изсуши́лъ еси́ пото́ки стра́стнаго взыгра́нія.

Богоро́диченъ: Во утро́бѣ Твое́й вмѣ́щши Невмѣсти́маго, всѣ́хъ Творца́, изба́ви отъ лю́тыхъ пою́щія Тя́, Всенепоро́чная.

Инъ кано́нъ, въ не́мже о чудесѣ́хъ преподо́бнаго, гла́съ 6:
Пѣ́снь 1.

Ирмо́съ: Сѣче́ное сѣче́тся мо́ре Чермно́е, волнопита́емая же изсуша́ется глубина́, та́яжде ку́пно безору́жнымъ бы́вши проходи́ма, и всеору́жнымъ гро́бъ. Пѣ́снь же богокра́сная воспѣва́шеся: сла́вно просла́вися Христо́съ, Бо́гъ на́шъ.

Агнче Пречи́сте, Бо́жій Сло́ве, низпосли́ мнѣ́ сло́во, недосто́йному, воспѣ́ти чудеса́ преподо́бнаго Твоего́ Ѳеодо́сія, его́же въ по́двизѣхъ просла́вилъ еси́, усе́рдно къ Тебѣ́ воспѣва́юща: сла́вно просла́вися Христо́съ Бо́гъ на́шъ.

Ве́сь возло́жься Зижди́телеви и сла́ву вре́менную презрѣ́ти жела́я, желѣ́зы тѣ́ло твое́ стягну́въ, къ по́двигу устреми́лся еси́, Боже́ственною разже́гся ре́вностію, въ моли́твахъ же къ Бо́гу воспѣва́я: сла́вно просла́вися Христо́съ Бо́гъ на́шъ.

Го́рдаго змíя смире́ніемъ твои́мъ попра́въ, плотска́я взыгра́нія умертви́лъ еси́, и жите́йскія сла́сти терпѣ́ніемъ, а́ки мече́мъ, посѣ́клъ еси́, преподо́бне Ѳеодо́сіе, Го́сподеви вопія́: сла́вно просла́вися Христо́съ Бо́гъ на́шъ.

Богоро́диченъ: Дѣ́вство сохрани́вши некра́домо, отъ Ду́ха Свя́та заче́нши, родила́ еси́ Бо́га Сло́ва и по Рождествѣ́ пребыла́ еси́, я́коже и пре́жде, Богоневѣ́сто Влады́чице. Тѣ́мже спаси́ на́съ, вопію́щихъ: сла́вно просла́вися Христо́съ Бо́гъ на́шъ.

Пѣ́снь 3.

Ирмо́съ: Ты́ еси́ утвержде́ніе притека́ющихъ къ Тебѣ́, Го́споди, Ты́ еси́ Свѣ́тъ омраче́нныхъ, и пое́тъ Тя́ ду́хъ мо́й.

Возлюби́лъ еси́ отъ ю́ности усе́рдно Христо́ви рабо́тати, Его́же ра́ди вся́ презрѣ́лъ еси́, до́лу влеку́щая.

Очи́стивъ у́мъ, тѣ́ло и ду́хъ, треблаже́нне, до́мъ бы́лъ еси́ Трисо́лнечнаго Свѣ́та, укра́шенъ добродѣ́тельми.

Естество́ пло́ти воздержа́ніемъ утончи́лъ еси́, Христа́ имѣ́я, Ѳеодо́сіе, укрѣпля́юща тя́ къ по́двигомъ.

Богоро́диченъ: Моли́, Всечи́стая и Неискусобра́чная Марíе, Сы́на Твоего́ и Бо́га на́шего, посла́ти на́мъ ве́лію ми́лость.

Инъ.

Ирмо́съ: Госпо́дь, Сы́й, всѣ́хъ и Зижди́тель Бо́гъ, созда́нное, Безстра́стный, обнища́въ, Себѣ́ соедини́, и Па́сха, за я́же хотя́ше умре́ти, Са́мъ Сы́й Себе́ предпожре́, — яди́те, — вопія́, — Тѣ́ло Мое́ и вѣ́рою утверди́теся.

Еди́наго возлюби́лъ еси́ Христа́, преподо́бне Ѳеодо́сіе, во пло́ти безпло́тныхъ полки́ посрами́лъ еси́ и по преставле́ніи твое́мъ чудеса́ то́чиши, явле́ніемъ бо со ико́ною Пречи́стыя Богома́тере дѣви́цу разсла́бленную отъ одра́ возста́вилъ еси́.

Житіе́ непоро́чно на земли́ соверши́лъ еси́, преподо́бне, ны́нѣ же стра́сти неду́жныхъ исцѣля́еши, стра́ждущему бо на но́вый мѣ́сяцъ отъ лука́ваго ду́ха трилѣ́тное вре́мя здра́віе по́далъ еси́, прише́дшу ко свято́му гро́бу твоему́.

Зижди́телю предстои́ши и къ Нему́ дерзнове́ніе и́маши, о́тче. Къ ра́цѣ бо твое́й прише́дшая жена́, шу́мъ, и дво́ицы глаго́ланіе, и пѣ́нія у́бо слы́шавши, ужасе́ся; ма́ніемъ же каса́нія оче́съ прозрѣ́ніе по́далъ еси́ е́й, назна́менуя святы́я воды́ кропле́ніе.

Богоро́диченъ: Изъ ко́рене Іессе́ова изра́стши же́злъ, Цвѣ́тъ нося́щій — Христа́, Содѣ́теля вся́кія тва́ри, увяди́вшаго сады́ непло́днаго ра́зума, Дѣ́во Богоро́дице, спаси́ ны́ отъ грѣхо́вныхъ страсте́й, прибѣга́ющія въ кро́въ Тво́й съ вѣ́рою.

[Инъ конда́къ, гла́съ 4:

Чистото́ю душе́вною боже́ственнѣ вооружи́вся, Христу́ усе́рдно послѣ́довалъ еси́, преподо́бне о́тче на́шъ Ѳеодо́сіе, и ны́нѣ непреста́нныя моли́твы, я́ко копіе́, въ ру́ки си́хъ прія́лъ еси́, и ри́зу же́стоку носи́лъ еси́, отъ вла́съ исплете́ну, и вери́ги тя́жки на плеща́хъ свои́хъ имѣ́лъ еси́. Юностная двиза́нія увяди́въ, бдѣ́ніемъ и всено́щнымъ стоя́ніемъ тѣ́ло свое́ утончи́лъ еси́, и сле́зными тече́ніи бѣсо́вская ополче́нія до конца́ потопи́лъ еси́. Тѣ́мже отъ Христа́ Бо́га исцѣле́нія да́ръ прія́лъ еси́: слѣпы́я просвѣща́ти, и глухи́мъ слы́шати твори́ши, и нѣмы́мъ глаго́лати, и вся́кими неду́ги одержи́мымъ, съ вѣ́рою приходя́щимъ ко свято́му твоему́ гро́бу, неоску́дно подава́еши проше́нія. Тѣ́мъ вопіе́мъ ти́: ра́дуйся, пусты́нный жи́телю и ни́щихъ корми́телю, преподо́бне о́тче на́шъ Ѳеодо́сіе, и гра́ду на́шему То́тьмѣ похвала́ и вели́кое утвержде́ніе.] [1]

Сѣда́ленъ, гла́съ 8. Подо́бенъ: Прему́дрости наста́вниче.

Премно́жествомъ добродѣ́телей отъ младе́нства житіе́ украси́лъ еси́, помы́сливъ отъ земны́хъ на небе́сная, и, дѣ́ломъ соверши́въ, о́тче Ѳеодо́сіе, сла́ву и бога́тство тлѣ́нное ни во что́же вмѣни́лъ еси́; посто́мъ и власяны́мъ одѣя́ніемъ пло́ть твою́ изнуря́лъ еси́, всено́щнымъ же стоя́ніемъ и моли́твами собесѣ́дникъ а́нгельскимъ лико́мъ показа́лся еси́. Моли́ Христа́ Бо́га согрѣше́ній оставле́ніе дарова́ти чту́щимъ любо́вію святу́ю па́мять твою́. [Два́жды.]

Сла́ва, и ны́нѣ, богоро́диченъ:

Яко Дѣ́ву и еди́ну въ жена́хъ, Тя́, безъ сѣ́мене ро́ждшую Бо́га пло́тію, вси́ ублажа́емъ, ро́ди человѣ́честіи, о́гнь бо всели́ся въ Тя́ Божества́ и я́ко Младе́нца млеко́мъ пита́еши Зижди́теля и Го́спода. Тѣ́мъ, а́нгельскій и человѣ́ческій ро́дъ, досто́йно сла́вимъ пресвято́е Рождество́ Твое́ и согла́сно вопіе́мъ Ти́: моли́ Христа́ Бо́га согрѣше́ній оставле́ніе дарова́ти покланя́ющимся вѣ́рою пресвято́му Рождеству́ Твоему́.

Пѣ́снь 4.

Ирмо́съ: Услы́шахъ, Го́споди, смотре́нія Твоего́ та́инство, разумѣ́хъ дѣла́ Твоя́ и просла́вихъ Твое́ Божество́.

Си́лою Влады́чнею лестца́ кова́рство разруши́лъ еси́, преше́дъ немяте́жно въ ра́йская селе́нія.

Па́че бу́дущаго ничто́же и́но предпочти́лъ еси́ и сего́ ра́ди наслѣ́довалъ еси́ вѣ́чное блаже́нство, о́тче на́шъ Ѳеодо́сіе.

Сле́зными пото́ки омы́лъ еси́ нечистоту́ грѣхо́вную, бдѣ́ніемъ же и моли́твами лико́мъ святы́хъ сопричте́нъ бы́лъ еси́.

Богоро́диченъ: Еди́ну Тя́ пое́мъ и по рождествѣ́ Дѣ́ву, Богоро́дице, Ты́ бо Сло́во пло́тію нетлѣ́нно родила́ еси́ мíрови.

Инъ.

Ирмо́съ: Удиви́ся Тво́й ра́зумъ отъ мене́, услы́шавшу пресла́вная велѣ́нія смотре́нія Твоего́, укрѣпи́ся же возлюбле́ніемъ Твоего́ схожде́нія: Ты́ бо моея́ нищеты́ не отве́рглся еси́.

Ѳеодо́сіе блаже́нне, воздержа́ніемъ во пло́ти стра́сти чу́вственныя умертви́лъ еси́ и по успе́ніи твое́мъ стра́сти неду́жныхъ разрѣша́еши: одержи́маго бо тряса́вицею свободи́лъ еси́ отъ неду́га.

Исто́чники сле́зными напои́въ ни́ву души́ твоея́, о́тче, чудесы́ просія́лъ еси́, я́ко звѣзда́ многосвѣ́тлая: болѣ́знующаго очи́ма уврачева́лъ еси́, младе́нца же спа́слъ еси́, му́чима отъ лука́ваго ду́ха.

Ко Творцу́ о на́съ мо́лишися, преподо́бне, и да́руеши цѣльбы́ неоску́дно припа́дающимъ къ ра́цѣ твое́й: хрома́го отъ болѣ́зни уврачева́лъ еси́ и ходи́ти непреткнове́нно устро́илъ еси́.

Богоро́диченъ: Лю́демъ яви́ся обновле́ніе, Влады́чице: Ты́ бо родила́ еси́ во вре́мени отъ Отца́ Рожде́ннаго пре́жде вѣ́къ, на́съ же ра́ди отъ Тебе́ Воплоти́вшагося и Спа́сшаго отъ пе́рвыя кля́твы ро́дъ человѣ́ческій.

Пѣ́снь 5.

Ирмо́съ: Просвѣти́ на́съ повелѣ́ніи Твои́ми, Го́споди, и мы́шцею Твое́ю высо́кою Тво́й ми́ръ пода́ждь на́мъ, Человѣколю́бче.

Око се́рдца упра́вивъ ко Творцу́ всѣ́хъ, Ѳеодо́сіе, и разсмотри́въ, ко́зни вра́жія твои́мъ тве́рдымъ смы́сломъ низложи́лъ еси́.

Мудрова́нія пло́ти покори́лъ еси́ ду́хови, умо́мъ къ Вы́шнему возревнова́въ, и отъ Него́ прія́лъ еси́ духо́вную благода́ть.

Основа́ніе, его́же проти́вникъ не подви́же, крѣ́пко положи́въ въ души́ твое́й, живу́ща имѣ́лъ еси́ Свята́го Ду́ха.

Богоро́диченъ: Щедро́тъ бе́здну иму́щи, Дѣ́во Богоро́дице, при́зри на мя́, озло́бленнаго грѣхми́, и въ ро́въ па́дша возведи́ къ покая́нію.

Инъ.

Ирмо́съ: Богоявле́нія Твоего́, Христе́, къ на́мъ ми́лостивно бы́вшаго, Иса́ія, Свѣ́тъ ви́дѣвъ Невече́рній, изъ но́щи у́треневавъ взыва́ше: воскре́снутъ ме́ртвіи, и воста́нутъ су́щіи во гробѣ́хъ, и вси́ земноро́дніи возра́дуются.

Мно́гое имѣ́я дерзнове́ніе къ Зижди́телю, о́тче Ѳеодо́сіе, мно́гими мя́, лю́тыми страстьми́ содержи́маго, исцѣли́, я́коже и дѣви́цу, всѣ́ми у́ды разсла́бленную, прикосну́вшуюся ра́цѣ твое́й, исцѣли́лъ еси́.

Недрема́нно послѣ́дуя Христу́, пло́ть на́съ ра́ди пріе́мшу и о́чи слѣпа́го отве́рзшу, Ѳеодо́сіе, женѣ́ слѣпѣ́й и о́комъ неви́дящему прозрѣ́ніе по́далъ еси́, и на́съ просвѣти́, пою́щихъ тя́.

Къ серафи́момъ пріобщи́вся, преподо́бне Ѳеодо́сіе, вся́ческихъ Творца́ и Влады́ку преклони́лъ еси́ на милосе́рдіе: седмолѣ́тное вре́мя не слы́шавшему уши́ма, дарова́лъ еси́ здра́віе.

Богоро́диченъ: Огнь Боже́ственный во утро́бѣ поне́сши, Богоневѣ́сто Пречи́стая, попали́ на́ша стра́сти душетлѣ́нныя и просвѣти́ сердца́ пою́щихъ, да вси́ Тебе́ прославля́емъ, ро́ждшую Го́спода, всю́ тва́рь содержа́щаго.

Пѣ́снь 6.

Ирмо́съ: Ри́зу мнѣ́ пода́ждь свѣ́тлу, одѣя́йся свѣ́томъ, я́ко ри́зою, Многоми́лостиве Христе́ Бо́же на́шъ.

Авраа́му подо́бяся, оста́вивъ земна́го оте́чества гра́дъ, мно́гимъ тща́ніемъ Христу́ послѣ́довалъ еси́.

Бога́тство и сла́ву презрѣ́въ, одѣя́ніе жесто́кое носи́лъ еси́, си́мъ истка́въ себѣ́ оде́жду нетлѣ́нія.

Удобри́лъ еси́ себе́, богому́дре, кра́сными восхожде́ніи къ небе́снымъ восте́къ, Боже́ственными кри́лы.

Богоро́диченъ: Дѣ́вство чи́сто соблю́дши и Безлѣ́тное Сло́во подъ коне́цъ лѣ́томъ ро́ждши, Твои́мъ моле́ніемъ спаси́ пою́щія Тя́.

Инъ.

Ирмо́съ: Звѣ́рю бе́здны предае́тся проро́къ Іо́на, глубинѣ́ морско́й, прообразу́я Твое́, Сло́ве, тридне́вное воста́ніе. Тѣ́мъ и взыва́ше: изъ глубины́ преиспо́днія возведи́ живо́тъ мо́й, Благоутро́бне.

Пресвятѣ́й Тро́ицѣ до́мъ себе́ устро́ивъ, пусты́ню возлюби́лъ еси́ и по преселе́ніи твое́мъ къ Бо́гу посѣща́еши ученики́ твоя́, ста́рца разсла́бленнаго укрѣпи́лъ еси́ и младе́нцу разрѣши́лъ еси́ слѣпоту́.

Ра́ка моще́й твои́хъ, о́тче Ѳеодо́сіе, неоску́дно исцѣле́нія источа́етъ приходя́щимъ съ вѣ́рою: главну́ю болѣ́знь и разслабле́ніе тѣ́ла женѣ́ разрѣши́лъ еси́, человѣ́ка же одержи́маго отъ лука́ваго ду́ха свободи́лъ еси́.

Свѣ́томъ Боже́ственнымъ озаря́емь свы́ше, чудесы́ просія́лъ еси́ и мра́къ де́монскій разруша́еши; на́съ же, прегрѣше́ньми объюродѣ́вшихъ, уцѣлому́дри, я́коже изсту́пльшихъ ума́ уцѣлому́дрилъ еси́.

Богоро́диченъ: Тя́ прови́дѣ Даніи́лъ несѣ́ченную го́ру, изъ нея́же отто́ржеся Ка́мень безъ руку́, прообразу́я отъ Тебе́ воплоще́ніе Безлѣ́тнаго въ лѣ́то. На́съ же, во глубинѣ́ злы́хъ прегрѣше́ній тружда́ющихся, спаса́еши, Богоро́дице, еди́на земны́мъ прибѣжи́ще.

Конда́къ, гла́съ 8. Подо́бенъ: Возбра́нной.

Воздержа́ніемъ пло́ть изнури́лъ еси́ и непреста́нными моли́твами, я́ко а́нгелъ, возвы́сился еси́, струя́ми же сле́зными бѣсо́вскія полки́ погрузи́лъ еси́. И ны́нѣ во свѣ́тѣ невече́рнѣмъ лику́еши у Христа́ Бо́га и приходя́щимъ ко свято́му твоему́ гро́бу неоску́дно исцѣле́ніе подае́ши, вѣ́рою вопію́щимъ тебѣ́: ра́дуйся, о́тче Ѳеодо́сіе богому́дре.

Икосъ:

Возревнова́въ о Боже́ственныхъ бдѣ́ніихъ и тѣ́снымъ на земли́ ше́ствовавъ путе́мъ, небе́сныхъ простра́нствія ра́достнѣ дости́глъ еси́, идѣ́же зри́ши Пресвяту́ю Тро́ицу, дарова́ньми чуде́съ обогаща́емь. Мы́ же, терпѣ́нію твоему́ дивя́щеся, си́це вопіе́мъ: ра́дуйся, чи́стое Свята́го Ду́ха прія́телище; ра́дуйся, земны́й а́нгеле и небе́сный человѣ́че; ра́дуйся, любве́ ра́ди Христо́вы гра́дъ оте́чества земна́го оста́вивый и въ междорѣ́чіи жи́ти изво́ливый; ра́дуйся, дре́во добродѣ́телей, при вода́хъ насажде́нное; ра́дуйся, я́ко пло́дъ прине́слъ еси́ благоцвѣту́щь послуша́нія; ра́дуйся, я́ко терпѣ́ніемъ твои́мъ стра́сти плотскíя умертви́лъ еси́; ра́дуйся, я́ко ору́жіемъ кре́стнымъ мы́сленнаго Амали́ка посѣ́клъ еси́; ра́дуйся, сто́лпе, непоколеби́мый жите́йскими вѣ́тры; ра́дуйся, лука́выхъ духо́въ прогони́телю; ра́дуйся, я́ко исцѣле́ній источа́еши рѣку́; ра́дуйся, я́ко стра́ждущихъ отъ бѣ́дъ избавля́еши; ра́дуйся, и́нокомъ исправле́ніе; ра́дуйся, о́тче Ѳеодо́сіе богому́дре.

Пѣ́снь 7.

Ирмо́съ: Ангеломъ о́троки изъ огня́ спасы́й и гремя́щую пе́щь преложи́вый на ро́су, благослове́нъ еси́, Бо́же оте́цъ на́шихъ.

Пло́тію обложе́нъ, безпло́тныя побѣди́лъ еси́, непреста́нно Христо́ви зовы́й: благослове́нъ еси́, Бо́же оте́цъ на́шихъ.

Огне́мъ Боже́ственнымъ те́рніе грѣхо́вныхъ страсте́й попали́лъ еси́, богому́дре, поя́: благослове́нъ еси́, Бо́же оте́цъ на́шихъ.

Юности раче́нія оплева́въ разу́мно, всего́ себе́ Бо́гови возложи́лъ еси́, поя́: благослове́нъ еси́, Бо́же оте́цъ на́шихъ.

Богоро́диченъ: Небесе́ ши́ршую Дѣ́ву показа́ Пра́вды Со́лнце, изъ Нея́ возсія́въ, Спа́съ пою́щихъ: благослове́нъ еси́, Бо́же оте́цъ на́шихъ.

Инъ.

Ирмо́съ: Три́ ю́ноши не опали́ дре́вле возвыша́емый пла́мень, неща́дно мя́ зно́й къ тлѣ́нію положи́. Но, я́ко о́ныя изба́вилъ еси́ сія́ніемъ Твои́мъ, пою́щаго съ ни́ми спаси́ мя́: благослове́нъ еси́, Бо́же оте́цъ на́шихъ.

У Влады́ки Творца́ предстоя́ въ вы́шнемъ Ца́рствіи, Ѳеодо́сіе преподо́бне, болѣ́знующую очи́ма исцѣли́лъ еси́; просвѣти́ и на́ша серде́чная очеса́ свѣ́томъ богоразу́мія и научи́ къ Нему́ пѣ́ти: благослове́нъ еси́, Бо́же оте́цъ на́шихъ.

Фарисе́йское киче́ніе отве́ргше, усе́рдно присту́пимъ вси́ ко гро́бу богому́драго Ѳеодо́сія, источа́етъ бо на́мъ неоску́дную струю́ исцѣле́ній. Отроку стра́сть тѣлесе́ и соу́зъ язы́ка разрѣши́въ, да отве́рзетъ и на́ши устнѣ́ пѣ́ти Христу́: благослове́нъ еси́, Бо́же оте́цъ на́шихъ.

Излія́ніемъ чуде́съ отъ Бо́га обогати́лся еси́, о́тче, тѣ́мже приходя́щихъ облегча́еши болѣ́зни, растѣ́нія утро́бы, и стру́пъ ноги́, и кро́ви тече́ніе уста́вилъ еси́. Утверди́ у́бо и на́ша мы́сли зва́ти Христу́: благослове́нъ еси́, Бо́же оте́цъ на́шихъ.

Богоро́диченъ: Христа́ ро́ждши, Влады́ку и Врача́ вся́ческихъ, Богоро́дице, ра́нами грѣхо́вными на́съ, уя́звленныхъ лю́тѣ отъ душетлѣ́ннаго стрѣльца́ и неисцѣ́льно боля́щихъ, исцѣли́, Влады́чице, моли́твами Твои́ми и пла́стырь приложи́ покая́нія Сы́ну Твоему́ зову́щимъ: благослове́нъ еси́, Бо́же оте́цъ на́шихъ.

Пѣ́снь 8.

Ирмо́съ: Богоглаго́ливіи о́троцы въ пещи́, со огне́мъ пла́мень попира́юще, поя́ху: благослови́те, дѣла́ Госпо́дня, Го́спода.

Славосло́віемъ всено́щнымъ при́сно соодолѣ́лъ еси́ страсте́мъ, преблаже́нне, поя́: благослови́те, дѣла́ Госпо́дня, Го́спода.

Неприкоснове́ннаго улучи́въ свѣ́та, съ ли́ки святы́хъ водворя́ешися, о́тче, поя́: благослови́те, дѣла́ Госпо́дня, Го́спода.

Го́рняго Іерусали́ма дости́гнути сподо́би, о́тче Ѳеодо́сіе, пою́щія: благослови́те, дѣла́ Госпо́дня, Го́спода.

Богоро́диченъ: Обожи́лъ е́сть, изъ Тебе́ вопло́щься, Госпо́дь, Влады́чице, земны́хъ существо́, пою́щихъ: благослови́те, дѣла́ Госпо́дня, Го́спода.

Инъ.

Ирмо́съ: За зако́ны оте́ческія блаже́нніи въ Вавило́нѣ ю́ноши, предбѣ́дствующе, царю́ющаго оплева́ша повелѣ́ніе безу́мное и, совоку́плени, и́мже не свари́шася огне́мъ, Держа́вствующему досто́йную воспѣва́ху пѣ́снь: Го́спода по́йте, дѣла́, и превозноси́те во вся́ вѣ́ки.

Псало́мски процвѣ́лъ еси́, я́ко фи́никсъ, въ постѣ́ и по́двизѣхъ, и бѣсо́вскія полки́ прогоня́еши, и да́руеши цѣльбы́ незави́стно. Жите́йскими помышле́ньми мо́й у́мъ мяту́щійся уцѣлому́дри, да воспою́: Го́спода по́йте, дѣла́, и превозноси́те во вся́ вѣ́ки.

Царе́ви всѣ́хъ и Бо́гу предстоя́, о́тче Ѳеодо́сіе, Благочести́вому ИМПЕРАТОРУ на́шему испроси́ одолѣ́ніе на враги́ ви́димыя и неви́димыя и дви́жимая сердца́ на́ша утверди́, да въ ра́дости душе́внѣй воспое́мъ: Го́спода по́йте, дѣла́, и превозноси́те во вся́ вѣ́ки.

Чи́стѣ зрѣ́ти сподо́бився Пресвяту́ю Тро́ицу, до конца́ чи́сто житіе́ сохрани́лъ еси́ и чистото́ю а́нгелы удиви́лъ еси́. Мене́ же, жите́йскими сластьми́ оскверне́ннаго, очи́сти моли́твами твои́ми, да воспою́: Го́спода по́йте, дѣла́, и превозноси́те во вся́ вѣ́ки.

Богоро́диченъ: О, Свѣ́та прія́телище, пресвѣ́тлаго Со́лнца о́блаче, Богора́дованная Влады́чице, лѣ́ствице мы́сленная, небе́сная врата́, спасе́нія две́ри! Бо́гъ бо изъ Твои́хъ ложе́снъ про́йде неизрече́нно, Его́же прославля́емъ во вѣ́ки.

Пѣ́снь 9.

Ирмо́съ: Чи́стую сла́вно почти́мъ, лю́діе, Богоро́дицу, о́гнь Божества́ пріи́мшую во чре́вѣ неопа́льно, пѣ́сньми велича́емъ.

Любе́зно по́двигъ сконча́въ и воздѣ́лавъ ни́ву душе́вную, пло́дъ стори́чный пожа́лъ еси́, о́тче Ѳеодо́сіе, тя́ чту́щихъ.

Вѣ́чныя дости́глъ еси́ жи́зни кра́йнимъ воздержа́ніемъ и Свѣ́тъ Присносу́щныя Тро́ицы зрѣ́ти сподо́бился еси́, о́тче богому́дре.

Ко Влады́цѣ имѣ́я дерзнове́ніе, то́чиши исцѣле́нія, и всѣ́мъ, чту́щимъ па́мять твою́, о́тче, ми́лость испроси́.

Богоро́диченъ: Ада́мовымъ вкуше́ніемъ приста́вленное ору́жіе Тобо́ю, Пречи́стая, вхо́дъ дае́тъ, стыдя́ся копія́, пробо́дшаго Ро́ждшагося изъ Тебе́.

Инъ.

Ирмо́съ: Стра́нствія Влады́чня и безсме́ртныя трапе́зы на го́рнѣмъ мѣ́стѣ высо́кими умы́, вѣ́рніи, пріиди́те наслади́мся, возше́дша Сло́ва, отъ Сло́ва научи́вшеся, Его́же велича́емъ.

Граждани́нъ вы́шній жела́я бы́ти, земна́го оте́чества гра́дъ оста́вилъ еси́, пресе́льникъ яви́вся, о́тче Ѳеодо́сіе, къ го́рнимъ легко́ преше́лъ еси́, во свѣ́тѣ пра́ведныхъ водворя́яся, ду́хомъ же неотсту́пно съ на́ми пребыва́еши; сохраня́й у́бо на́съ, тя́ воспѣва́ющихъ.

Распросте́ръ преподо́бніи твои́ ру́цѣ, принеси́ моле́ніе ко Всеще́дрому Бо́гу, о́тче богому́дре Ѳеодо́сіе, сохрани́ти гра́дъ тво́й невреди́мь отъ ва́рварскаго наше́ствія и междоусо́бныя бра́ни и спасти́ на́съ, тебе́ велича́ющихъ.

Глаго́лъ мои́хъ недосто́йныхъ гру́бое вѣща́ніе, е́же по си́лѣ принесо́хъ тебѣ́, преподо́бне Ѳеодо́сіе, пріими́ и не пре́зри, но Творца́ на́шего, Влады́ку и Го́спода, моли́ за мя́, въ де́нь стра́шнаго испыта́нія ми́лость обрѣсти́ и та́мошняго муче́нія изба́витися.

Богоро́диченъ: Ря́сны златы́ми преукра́шена, одесну́ю Царя́ Бо́га предстои́ши, Богоро́дице Дѣ́во, моли́ у́бо Сы́на Твоего́ и Влады́ку ми́лость обрѣсти́ на́мъ въ де́нь послѣ́дняго испыта́нія, и стоя́нія сподо́би на́съ со избра́нными, и стра́шнаго муче́нія свободи́, да вси́ Тебе́ велича́емъ.

Свѣти́ленъ. Подо́бенъ: Ученико́мъ зря́щимъ.

Умертви́лъ еси́ до́лу влеку́щая мудрова́нія, и, мірска́го пристра́стія удали́вся, я́ко скве́рны, процвѣ́лъ еси́, я́ко фи́никсъ, Дави́дски, о́тче Ѳеодо́сіе, и небе́сною сла́вою со а́нгелы обогати́лся еси́ отъ Бо́га, Его́же въ пѣ́снехъ восхваля́емъ. [Два́жды.]

Сла́ва, и ны́нѣ, богоро́диченъ:

Честнѣ́йши еси́ всея́ тва́ри, Богоро́дице Дѣ́во, Христа́ ро́ждшая, Того́ у́бо моли́ сохрани́тися ста́ду Твоему́ невреди́му отъ вся́каго навѣ́та сопроти́внаго.

На хвали́техъ пое́мъ стихи́ры на 4, гла́съ 8. Подо́бенъ: О, пресла́внаго чудесе́!

О, пресла́внаго чудесе́! Въ ме́ртвеннѣмъ тѣлеси́, я́ко безпло́тенъ, подвиза́вся, Бо́гови себе́ усе́рдно возложи́лъ еси́, преподо́бне Ѳеодо́сіе, любве́ ра́ди Его́ всю́ твою́ жи́знь въ по́двизѣхъ сконча́лъ еси́, брозда́ми воздержа́нія плотскíя стра́сти смири́лъ еси́ и чудесы́ обогати́лся еси́. Съ тобо́ю у́бо вопіе́мъ Христу́: спаси́ ду́ши на́ша, я́ко еди́нъ Милосе́рдъ. [Два́жды.]

Отче блаже́нне Ѳеодо́сіе, я́ко тезоимени́тъ Бо́жію дая́нію бы́лъ еси́, сего́ ра́ди и ра́ку моще́й твои́хъ Госпо́дь человѣ́комъ показа́, я́же я́ко неистощи́мый исто́чникъ чуде́съ и рѣка́ дарова́ній духо́вныхъ, слѣпы́мъ е́же ви́дѣти подае́тъ и всѣ́мъ боля́щимъ исцѣле́ніе да́руетъ, одержи́мыя отъ нечи́стыхъ духо́въ избавля́етъ и цѣлому́дрствовати твори́тъ.

Богому́дре Ѳеодо́сіе, а́ще и на небесѣ́хъ жи́тельствуеши, ду́хомъ же назира́еши на́съ съ Пречи́стою Богома́терію: хва́лящагося крестопресту́пника, я́ко пти́цу ху́ду, пре́далъ еси́ въ ру́ки безору́жныхъ, гра́дъ же тво́й отъ междоусо́бныя бра́ни спа́слъ еси́. О, вели́кое Бо́жіе дарова́ніе, я́ко даде́ на́мъ вели́каго въ ско́рбехъ помо́щника!

Сла́ва, гла́съ 2:

Пріиди́те, и́ночестіи ли́цы и христолюби́віи лю́діе, ко гро́бу досточу́днаго отца́ Ѳеодо́сія: дне́сь бо па́мять его́ почита́емъ, ду́ховнѣ торжеству́юще, моля́щеся Христу́ Бо́гу на́шему и прося́ще грѣхо́въ проще́нія и соедине́нія Це́рквамъ, ИМПЕРАТОРУ на́шему посо́бія на сопоста́ты, и плѣне́ннымъ свобожде́нія, и душа́мъ на́шимъ ве́лія ми́лости.

И ны́нѣ, богоро́диченъ, гла́съ то́йже:

Все́ упова́ніе [мое́ на Тя́ возлага́ю, Ма́ти Бо́жія, сохрани́ мя подъ кро́вомъ Твои́мъ].

Славосло́віе вели́кое. [Ектеніи́] и отпу́стъ.


НА ЛИТУРГІИ,

Блаже́нна отъ кано́на 8-го гла́са, пѣ́снь 3-я, на 4, и 6-го гла́са, пѣ́снь 6-я, на 4. Проки́менъ, гла́съ 7: Честна́ предъ Го́сподемъ* сме́рть преподо́бныхъ его́. Сти́хъ: Что́ возда́мъ Го́сподеви о всѣ́хъ, я́же воздаде́ ми́? Апо́столъ, къ Гала́томъ, зача́ло 213. Аллилу́ія, [гла́съ 6]: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́. [Сти́хъ: Си́льно на земли́ бу́детъ сѣ́мя его́.] Ева́нгеліе отъ Луки́, зача́ло 24. Прича́стенъ: Въ па́мять вѣ́чную бу́детъ пра́ведникъ, [отъ слу́ха зла́ не убои́тся].

Примѣчаніе:
[1] Инъ кондакъ приводится по изданію: Слу́жба преподо́бному отцу́ на́шему Ѳеодо́сію, То́темскому чудотво́рцу. М.: Моско́вская Тѵпогра́фія, 1798, л. 13.

Источникъ: Минíа дополни́тельная. — СПб.: С.-Петербургская Сѵнодальная Тѵпогра́фія, 1909. — Л. 90 – 99 об.

Назадъ // Къ оглавленію // Впередъ


Наверхъ / Къ титульной страницѣ

0



«Слава Россіи»
Малый герб Российской империи
Помощь Порталу
Просимъ Васъ поддержать нашъ Порталъ
© 2004-2019 г.